Wase 4—Na Ka me Caka Mera Toso Kina Noda Vuli iVolatabu
Tuberi Gonevuli me Vakavakarau
1 Na gonevuli e wilika rawa na lesoni, makataka na isaunitaro, qai vakasamataka na sala me sauma kina ena nona vosa ga, ena tubu totolo vakayalo. Ni o sa vakadeitaka ni rawa ni vakayacori wasoma na vuli, vakaraitaka sara vua na sala me vakavakarau kina. Ena veivuke sara vei ira e levu na gonevuli ke drau vakarautaka vata e dua taucoko na wase se lesoni.
2 Makamaka kei na Volai ni Tikina Bibi: Vakaraitaka vua na sala me kunea kina na isaunitaro ena parakaravu. Vakaraitaka tale ga vei gonevuli na nomu ivola o sa vakavola tu kina na veitikina bibi. Ni drau veivosakitaka tiko e dua na lesoni, ena rawa ni vakatotomuri iko o gonevuli ena nona makataka ga ena nona ivola na tikina me nanuma lesu kina na isaunitaro. (Luke 6:40) Kerei koya me sauma na taro ena nona vosa ga. O na raica kina se sa kila vinaka na ka e vulica tiko se sega.
3 E tiki bibi ni nodra vuli iVolatabu na gonevuli na kena dikevi vinaka na tikinivolatabu e sega ni lavetaki. (Caka. 17:11) Vakaraitaka vua ni tikinivolatabu kece e dau lavetaki ena tokona e dua na tikina ena parakaravu. Vakaraitaka tale ga se me dau vola vakacava na veitikina bibi ena yasa ni parakaravu. Vakabibitaka vua ni ka e vulica tiko e yavutaki ena iVolatabu. Uqeti koya me dau vakamacala mai na tikinivolatabu e sega ni lavetaki ena gauna ni vuli.
4 Raica Vakalekaleka, Railesuva Tale Ga: Ni bera ni vakavakarau o gonevuli, e vinaka me raica rawa vakalekaleka na ka ena vulica. Tukuna vua me raica vakalekaleka na ulutaga levu, na ulutaga lalai, kei na iyaloyalo. Vakamacalataka vua ni bera ni oti nona vakavakarau, e vinaka me railesuva na veitikina bibi, vakayagataka na kato ni railesuvi ke tiko e dua. Oqo ena vukea me kasa vua na lesoni ena vulica.
5 Nida vakavulici ira vinaka na gonevuli mera dau vakavakarau ena gauna ni vuli, ena totoka tale ga kina na nodra ivakamacala ena soqoni ni ivavakoso. Ena yaga tiko ga vua na ivakarau ni vakavakarau oqo ni sa cava nona vakavulici tiko ena iVolatabu.