“Tubu Cake e na Vosa ni Vakabauta”
1 E gadrevi na sasaga vagumatua ena noda sokalou se lotu. (1 Tim. 4:7-10) Ia eda na rawa ni wawale da qai bale ke da qaravi Kalou ena noda kaukaua ga. (Aisea 40:29-31) Dua gona na sala e rawa ni vakaukauataki keda kina o Jiova oya na noda “tubu cake e na vosa ni vakabauta.”—1 Tim. 4:6, VV.
2 Kakana Vakayalo e Yaga: E vakarautaka o Jiova na kakana vakayalo e yaga ena nona Vosa kei na nona vakayagataka “na dauveiqaravi yalo dina ka vuku.” (Maciu 24:45, VV) Vakacava, eda sa cakava tiko beka noda itavi me yaga kina vei keda? Eda dau wilika beka e veisiga na iVolatabu? E tiko beka e dua noda ituvatuva ni vuli vakataki keda, kei na noda dau vakananuma na veika eda sa vulica? (Same 1:2, 3) Na kakana bulabula vakayalo oqo e vakaukauataki keda qai taqomaki keda mai na idre ni vuravura e liutaka tu o Setani. (1 Joni 5:19) Ke da vakaosota na noda vakasama ena veika vinaka da qai bulataka, ena tiko vata kei keda o Jiova.—Fpai. 4:8, 9.
3 E vakaukauataki keda tale ga o Jiova ena gauna ni soqoni. (Iper. 10:24, 25) Na ivakasala vakayalo kei na veimaliwai vinaka ena soqoni ena vakaukauataki keda meda dei tiko ga nida vakatovolei. (1 Pita 5:9, 10) E kaya e dua na itabagone lotu Vakarisito: “Au dau oca dina niu tiko e koronivuli ena loma ni dua taucoko na siga. Ia, na soqoni e vaka e dua na ivakavakacegu ena vanua dravuisiga, e vakabulabulataki au meu tiko tale ena siga ni vuli e tarava.” Eda vakalougatataki dina nida saga meda dau tiko ena soqoni!
4 Vunautaka na Ka Dina: E vaka na kakana vei Jisu na nona dau vunau. E vakaukauataki koya. (Joni 4:32-34) E vakaukauataki keda tale ga na noda tukuna yani na veika totoka e yalataka na Kalou. Na noda vakaogai keda ena cakacaka vakavunau ena vakavuna me dei tiko ga na lomada kei na noda vakasama ina Matanitu ni Kalou, kei na veivakalougatataki e sa vakarau vakavatukana. E veivakacegui dina.—Maciu 11:28-30.
5 Eda kalougata dina nida vakayagataka na kakana vakayalo e vakarautaka tu o Jiova vei ira nona tamata nikua! Meda tomana tiko ga noda vakacaucautaki koya ena sere ni marau.—Aisea 65:13, 14.