iTuvatuva Vakavuvale—Cakacaka Vakavunau
1 E marautaka o Jiova nodra dau vakacaucautaka na yacana na gonelalai. (Same 148:12, 13) Ena gauna mada ga se bula tu kina e vuravura o Jisu, era dau ‘vakarokorokotaka na Kalou na gonelalai.’ (Maciu 21:15, 16) E vakatale ga kina nikua. Ra itubutubu, oni na uqeti ira vakacava na luvemuni mera vakacaucautaki Jiova vagumatua ena cakacaka vakavunau? Me vaka ga sa vakabibitaki ena ulutaga ni soqoni mai cake, e bibi sara ga na nomuni ivakaraitaki. E kaya e dua na tama me baleta na ka era vakadinadinataka e levu na itubutubu: “Era sega ni muria na gone na ka o kaya; na ka ga o cakava!”
2 E kaya e dua na tacida yalewa a tuberi ena vuvale dau qaravi Kalou: “Ni keitou yadra ena mataka ni Vakarauwai, keitou na sega ni taroga tale se keitou lako ina vunau se sega. Sa kilai tu ga.” E rawa sara ga vei kemuni na itubutubu mo ni vakavulica vei luvemuni na bibi ni cakacaka vakavunau vakavuvale ena nomuni tuvanaka oqori e veimacawa. Era na sega wale ga ni vuli na gone ena nodra raica tiko na nomuni ivakaraitaki, ia oni na dikeva tale ga kina na nodra itovo kei na nodra ivalavala, mo ni raica kina se ra sa matau cake tiko se sega ena cakacaka vakavunau.
3 Nodra Vakavulici: Mera na marautaka na gone na cakacaka vakavunau, e dodonu mera vakavakarau ra qai vakaitavi sara ga kina. E kaya tale na tacida yalewa a tukuni mai cake: “Keitou sega ni muri wale tu ga ni rau vunau o Ta kei Na. Keitou kila ni dodonu tale ga me keitou vakaitavi, ke neitou cakacaka tu mada ga na qiria na lali e katuba se na soli ivolacebaceba. Keitou dau vakarau vinaka ni bera na vunau ena muanimacawa, me keitou kila kina na ka me keitou tukuna.” E rawa tale ga ni oni cakava oqo mo ni vakavulici luvemuni kina, mo ni vakavakarau rawa ena vica na miniti e veimacawa. Oqo e rawa ni caka ena gauna ni vuli vakavuvale se dua tale na gauna.
4 Na vunau vakavuvale e dua na sala oni rawa ni tugana kina e loma i luvemuni na ka dina. E dua na tama e dau kauti luvena yalewa me rau taubaletaka e 10 na kilomita me rau lai soli ivolacebaceba ina dua tale na koro. E nanuma lesu na goneyalewa oya: “Ena gauna vaka oya ni keirau taubale voli, e dau tugana kina i lomaqu na ka dina o Ta.” (Vkru. 6:7) Oni na vakalougatataki dina ke oni okata na cakacaka vakavunau me tiki ni nomuni ituvatuva vakavuvale e veimacawa.