Wase 10—Na Ka me Caka Mera Toso Kina Noda Vuli iVolatabu
Vakavulici Ira na Vuli iVolatabu ena Vunau e Veivale
1 Nira sa vakadonuya na qase ni sa rawa vua e dua na vuli iVolatabu me dautukutuku bera ni papitaiso, sa rawa sara ga ni vakaitavi ena cakacaka vakavunau ni ivavakoso. (Raica na ivola iSoqosoqo e Cakava na Loma i Jiova, t. 79-81.) Eda na tuberi ira vakacava na noda vuli iVolatabu mera sauva na isausau ni vunau e veivale?
2 Drau Vakavakarau Vata: E bibi na vakavakarau vinaka. Vakaraitaka vei gonevuli na vanua e rawa ni kunea kina na vakatutu ena Noda Cakacaka Vakaitalatala kei na ivola na Reasoning, drau digia e dua na vakatutu e rawarawa qai laulau, e ganita sara ga na yalava. Ni se qai tekivu ga e vinaka mo uqeti koya me dau vakayagataka na iVolatabu ena cakacaka vakavunau.—2 Tim. 4:2.
3 Ena yaga vakalevu vua na dautukutuku vou na vakatovotovo. Ni vakatovolea tiko o gonevuli na ka me tukuna, vakaraitaka vua na sala me tauca vakamatau kina na nona ivakamacala ena ituvaki e dau sotavi vakalevu ena yalava. (Kolo. 4:6) Vakadeitaka vua ni sega sara ni gadrevi mera kila kece na italatala lotu Vakarisito na isau kece ni nodra taro na itaukeinivale. E vinaka cake meda tukuna nida na lai vakekeli mada da qai lesuvi ira mai meda mai sauma na nodra taro.—Vkai. 15:28.
4 Drau Vunau Vata: Ena imatai ni gauna e cakacaka vakavunau kina o gonevuli, e vinaka mo vakamacala e liu me raica o koya na iwalewale ni nomu vakayagataka na ka drau a vakarautaka mai. Oti oya me qai vakaitavi tale ga o gonevuli. Ena so na gauna, ena vinaka ke rawa ni wilika ga o gonevuli na tikinivolatabu qai vakamacalataka tale ga. Vakasamataka tale ga na kena ituvaki kei na ka e rawata o gonevuli. (Fpai. 4:5) Mo vakacaucautaki koya ni o tomana tiko ga nomu vakavulici koya ena basoga ni cakacaka vakavunau tale e so.
5 E bibi dina na noda tuberi ira na dautukutuku vou mera tuvana e dua na ituvatuva dei ni cakacaka vakavunau, e veimacawa ke rawa. (Fpai. 3:16) Mo vakadeitaka mo drau dau cakacaka vata, qai uqeti koya tale ga me dau cakacaka vata kei ira na dautukutuku gugumatua tale e so. Ena vukei gonevuli na nodra ivakaraitaki kei nona veimaliwai kei ira na dautukutuku gugumatua, oqo ena vukei koya me dua e kenadau, ena marautaka tale ga kina na vunau e veivale.