iVakadinadina Galugalu
1 Na ibulibuli laurai i Jiova era vakatakila galugalu tu na veivakurabuitaki ni nona itovo vuni. (Same 19:1-3; Roma 1:20) Era ivakadinadina galugalu tale ga na noda itovo se ivalavala vinaka, noda itovo vakarisito, kei na rakorako ni keda irairai. (1 Pita 2:12; 3:1-4) Me noda gagadre kece meda “vakarogovinakataka nai vakavuvuli ni Kalou na nodai Vakabula e na ka kecega,” okati kina na noda itovo.—Taito 2:10.
2 E rawa vakacava nida vakaraitaka na totoka ni ivakavuvuli ni iVolatabu na tamata ivalavala ca? E rawa ga oqo ena veidusimaki ni Vosa ni Kalou kei na kaukaua ni yalo tabu. (Same 119:105; 143:10) E “bula na vosa ni Kalou, ka kaukauwa, ka gata vakalevu ka mucu ga nai seleiwau batirua.” (Iper. 4:12) E tara sara ga na lomada, qai vakasulumi keda ena itovo vou. (Kolo. 3:9, 10) Na vua ni yalo tabu e teivaka vei keda na itovo vinaka me vaka na yalomalua, yalololoma, yalomalumalumu, kei na ivalavala malua. (Kala. 5:22, 23) Sa da vakatara tiko beka na Vosa ni Kalou kei na yalona tabu me lewa na noda bula?—Efeso 4:30; 1 Ces. 2:13.
3 E Lautai Votu: E laurai votu na noda saga meda bulataka na ivakatagedegede i Jiova. Kena ivakaraitaki, era dau vakalialia e dua na turaga e so era cakacaka vata baleta ni tamata lekaleka. Ia na tacida yalewa e cakacaka tale tiko ga ena valenivolavola oqori e dau dokai koya, qai rokovi koya. Oqo e vakavuna me taroga na turaga oya se cava na vuna e duatani kina o tacida. Mani vakamacalataka na tacida yalewa ni vu ni nona veidokai na nona bulataka na ivakavuvuli vakaivolatabu. A tukuna tale ga vua na inuinui totoka ni Matanitu ni Kalou. A vulica na iVolatabu na turaga oya, yaco sara me papitaiso. Ni sa lesu ina nona vanua, e lauti ira na wekana na nona itovo vinaka, oqo e vakavuna me vica vei ira era ciqoma na dina.
4 Nida tu e valenicakacaka, e koronivuli, se eda veimaliwai kei ira na wekada kei ira na tiko tikivi keda, me vakadinadina mada ga na noda itovo vinaka, vaka kina noda vunau, me rawa kina vei ira e so mera mai vakalagilagia tale ga na Kalou.—Maciu 5:16.