Tukuna Tiko ga ena Doudou na Vosa ni Kalou
1 Nida italatala lotu Vakarisito eda kila ni so era na sega ni vakarorogo nida vunau. (Maciu 10:14) Ia eda na sega ni vakalaiva na nodra sega ni vakarorogo me tarova na noda kacivaka na itukutuku vinaka. (Vkai. 29:25) Na cava ena uqeti keda meda kacivaka tiko ga ena doudou na vosa ni Kalou?
2 E kila vinaka na yapositolo o Paula na “kena talei na kilai Karisito Jisu.” Oqo e uqeti koya me ‘vakadinadina vakalevu.’ (Fpai. 3:8, VV; 1 Ces. 1:5) Dina ga ni so era kaya ni malumalumu qai lialia na itukutuku e kacivaka o Paula, ia e kila o koya ni ‘kaukaua ni Kalou e rawa ni vakabulai ira yadua era sa vakabauta.’ (Roma 1:16) Gauna mada ga e tusaqati kina, e ‘vosa ga ena doudou ena vuku ni Turaga [“Jiova,” NW].’—Caka. 14:1-7; 20:18-21, 24.
3 Noda iVuravura ni Kaukaua: A vunau ena doudou o Paula, ia e sega ni vunau ena nona kaukaua ga. A vola kina o Paula me baleti koya kei Sailasa: “Ni keitou a vakararawataki mada eliu, ka vakacacani . . . mai Filipai, me vaka dou sa kila, keitou sa qai doudou ga e na vuku ni neitou Kalou me tukuna sara vei kemudou nai tukutuku-vinaka ni Kalou, a sa ka levu na veivorati.” (1 Ces. 2:2; Caka. 16:12, 37) Gauna tale ga a vesu tu kina o Paula e Roma, a kerei ira na mataveitacini e Efeso mera masulaki koya me tomana tiko ga kina nona ‘vunautaka ena doudou’ na itukutuku vinaka. (Efeso 6:18-20, VV) Nona vakararavi vei Jiova, sega ni vakararavi ena nona kaukaua ga, e rawa kina vei Paula me vunautaka tiko ga ena doudou na vosa ni Kalou.—2 Kor. 4:7; Fpai. 4:13.
4 E vaka kina nikua. E dua na tacida tagane e dau dredre ni vakaraitaka e valenicakacaka ni iVakadinadina i Jiova, e dau dredre tale ga ni vunau vei ira, a mani masulaka na leqa oqo, e tekivu vunau sara vei ira na nona itokani vakacakacaka. A sega ni taleitaka taumada nona itukutuku e dua vei ira, ia na gauna e tukuna kina vua na tacida oqo na inuinui ni veivakaturi, e tekivu sara kina e dua na vuli iVolatabu. Tekivu mai na gauna oqori, sa dau saga na tacida oqo me vunau ena gauna veiganiti kece ga. Ena nona vanua ni cakacaka e tarava, e vukei ira kina e 34 mera papitaiso ena loma ni 14 na yabaki. Eda nuidei gona ni na vakaukauataki keda o Jiova meda ‘doudou tiko ga ni tukuna na nona vosa.’—Caka. 4:29.