Vukea e So Tale me Yaga Vei Ira na iVoli
Me Vakayacori na iVakananumi ni Mate i Karisito ena 12 Epereli
1. Na cava e dua na sala eda na vakaraitaka kina na dauveiqaravi ni Kalou nida vakavinavinakataka na ivoli?
1 “Me ia na vakavinavinaka vua na Kalou e na vuku ni nonai solisoli sa sega ni tukuni rawa.” (2 Kor. 9:15) Sega ni vakabekataki nida duavata kei na vosa oqori. Eda vakavinavinakataka na yalovinaka kei na yalololoma ni Kalou ena vuku ni ivoli i Luvena o Jisu Karisito. Ena laurai noda vakavinavinaka nida mai soqo vata ena iVakananumi ni mate i Karisito ena 12 Epereli.
2. O cei tale era mai tomani keda na dauveiqaravi i Jiova ena iVakananumi? Ia na cava mera cakava me qai yaga kina vei ira na ivoli?
2 Rauta ni tininamilioni era mai tomani keda na dauveiqaravi i Jiova ena iVakananumi e veiyabaki. Na nodra tiko ena soqo bibi oqo o ira na sega ni iVakadinadina, e vakaraitaka nira sa bau kauaitaka toka na isoro i Karisito. Ia e dodonu mera vakabauta na ivoli oqori mera qai vakila na kena yaga. (Joni 3:16, 36) Eda na vukei ira vakacava mera vakabauta na ivoli? Rawa nida uqeti ira ena gauna ni iVakananumi mera vulica na iVolatabu, mera tiko tale ga ena soqoni ni ivavakoso e veimacawa. Vakasamataka mada e so na vakatutu oqo.
3. Eda rawa ni tekivutaka vakacava e dua na vuli iVolatabu nida veisureti ena iVakananumi?
3 Vuli iVolatabu: Ni o sureti ira na tataleitaki ena iVakananumi, vakacava mo sureti ira sara mera vuli iVolatabu ena ivola Kaya na iVolatabu? Tovolea mo vakamacalataka vei ira na ka ena vakayacori ena iVakananumi ena nomu cega na tabana 206-8 ni ivola oqo, qai veivosakitaka na ulutaga “Na iVakayakavi ni Turaga—Kena Vakananumi e Dokai Kina na Kalou.” Ni drau veivosakitaka na ulutaga oqori ena dua se rua na veisikovi lesu, e rawa ni tauyavutaki sara ga kina na vuli iVolatabu. Ni drau sa veivosakitaka oti, de dua ena taleitaka o itaukeinivale mo drau toki sara ena wase 5, “Na Keda iVoli—Na iLoloma Uasivi ni Kalou.” Ni drau sa vulica oti na wase 5, drau qai lesu tale ina imatai ni wase me drau tekivu vinaka kina.
4. O cei eda rawa ni vuli iVolatabu vata ena gauna ni iVakananumi oqo?
4 Eda rawa ni vakayagataka vei cei na vakatutu e koto ena parakaravu e 3? Era na rairai taleitaka na veitalanoa vaka oqo e so na noda itokani e valenicakacaka, e koronivuli, se o ira na tiko tikivi keda. Ena vinaka tale ga ke so na tacida tagane mera sikovi ira na watidra na tacida yalewa era sega ni tiko ena dina. Meda kua tale ga ni guilecavi ira na wekada era sega ni iVakadinadina. Kuria oya, meda saga meda sureti ira na tacida era sa malumalumu tu vakayalo ina iVakananumi. (Luke 15:3-7) Me noda isausau mada ga meda vukei ira kece mera mai vakila na yaga ni ivoli.
5. Eda na uqeti ira vakacava na vuli iVolatabu kei ira na tataleitaki mera tiko ena soqoni kece?
5 Soqoni ni iVavakoso: Na iVakananumi e dau imatai ni soqoni era tiko kina e levu na vuli iVolatabu kei na tataleitaki. Eda na uqeti ira vakacava me yaga tale ga vei ira na vo ni soqoni ni ivavakoso? E kaya na vakatutu ena Noda Cakacaka Vakaitalatala, Epereli 2005, tabana 6: “Tukuna na ulutaga ni vunau soqovi levu e tarava. Rawa ni o vakaraitaka na ulutaga ena vulici ena Vuli Vale ni Vakatawa, kei na kena ena vulici ena Vulivola ni iVavakoso. Vakamacalataka tale ga na Koronivuli ni Vuli Vunau kei na Soqoni ni Cakacaka. Ke dua nomu itavi ena koronivuli, ena totoka ke drau vakatovotovotaka sara ga kei na nomu vuli iVolatabu. Dau talanoataka vua na tikina bibi o vulica ena veisoqoni. Vakayagataka na iyaloyalo ena noda ivola mera raitayaloyalotaka kina na gonevuli na ka e caka ena soqoni. Sureti ira ina soqoni ena imatai sara ga ni gauna era vuli kina.”
6. Na cava e rua na ka mera cakava na vuli iVolatabu mera vakila kina na yaga ni ivoli?
6 Ena totolo sara nodra toso vakayalo o ira na vuli iVolatabu yalomalumalumu ke ra sega ni calata e dua na vuli, ra qai dau tiko wasoma ena soqoni. Meda uqeti ira mada ga mera vakayagataka na isolisoli vakayalo oqo, mera vakila kina na yaga ni loloma uasivi ni Kalou, oya na ivoli.