Na Ka me Caka me Dei Sara Kina na Vuli iVolatabu
1. Na cava na inaki ni noda caka vuli iVolatabu?
1 E dau marautaki dina meda tekivutaka e dua na vuli iVolatabu! Ia oqo e itekitekivu ga. Na inaki ni vuli, oya mera vukei na vuli iVolatabu mera mai dua na tisaipeli dina i Karisito. (Maciu 28:19, 20, VV) Na cava meda cakava me vakavatukanataki kina na inaki oqo?
2. Eda na moica vakacava na iwalewale ni vuli kei ira na dau osooso?
2 O Ira na Osooso: Sa dua na ka na bula osooso nikua. Ena so na vanua, e lailai wale sara era rawa ni vakatikitikitaka e dua na aua mera vulica kina na iVolatabu. Oya na vuna eda uqeti kina meda tauyavutaka na vuli ena vanua cava ga eda sota kina—e matanivale sara mada ga se ena talevoni, dina ni na lekaleka wale ga. Ni tekivu, ena lekaleka na vuli ni na veivosakitaki ga e vica na tikinivolatabu vaka kina e dua se rua na parakaravu ena ivola ni vuli na Kaya na iVolatabu. E marautaki dina ni levu na dautukutuku era sa cakava tiko oqo!
3. Na cava meda saga kina meda vakabalavutaka na gauna eda vuli iVolatabu kina kei ira na tataleitaki?
3 Me sa na vaka tu beka ga oqo na lekaleka ni noda caka vuli iVolatabu? Sega. Dina ga ni veiganiti na vuli lekaleka ni se qai tekivutaki ga na vuli, e kaya na Noda Cakacaka Vakaitalatala, Me 1990, tabana 8: “Ni sa dei na vuli, da raica tale ga ni taleitaka na itaukeinivale, me qai vakabalavutaki na gauna ni vuli.” E bibi dina oqo. Kena ivakaraitaki: Ena vakani tiko vakalalai e dua na gone a waloloi tu ena vuku ni kana vakaca me yacova na gauna sa rawa ni kania kina na kakana bibi, ia kevaka e vakani tiko ga vakalalai ena dua na gauna balavu ena sega ni kaukaua sara, se tubu vinaka. Era vaka tale ga oqori na noda vuli iVolatabu. Mera kua ni vuli tiko ga vakaleleka, ia me sagai me vakadeitaki na nodra vuli me rawa nira tubu mera dauveiqaravi matua ni Kalou.—Iper. 5:13, 14.
4. Na cava na yaga ni vuli iVolatabu e lomanivale se dua na vanua vakanomodi?
4 Vuli iVolatabu e Lomanivale: E dau vinaka me caka na vuli ena vanua vakanomodi—e lomanivale se dua tale na vanua veiganiti. Oqo ena yaga kina na vuli, ena kila vinaka tale ga o gonevuli na Vosa ni Kalou. (Maciu 13:23, VV) Ena rawarawa tale ga kina vei qasenivuli me moica na vuli me ganiti gonevuli. Kevaka e balavu vakalailai tale na vuli, ena rawa ni matata cake sara na ka e vulici mai na Vosa ni Kalou, ena vakadeitaka tale ga na vakabauta nei gonevuli.—Roma 10:17.
5. E rawa vakacava nida vakabalavutaka vakalailai na vuli?
5 O na veisautaka vakacava na vuli lekaleka me dua na vuli e vakadeitaki? Kerei koya ke rawa ni vakabalavutaki vakalailai na vuli, drau qai lewa vata na kena dede. Se da rawa ni taroga, “O galala beka me daru veivosakitaka vakalailai tale na ulutaga oqo?” se “Au marautaka na nodaru vuli vakalekaleka. E rawa ni balavu vakalailai nikua?” Ke sega ni rawa, tomana tiko ga na vuli lekaleka oqori. Rawa nida qai tovolea tale ena dua na gauna.
6. Na cava na inaki ni noda cakacaka vakaitalatala? Ena yaga vakacava na veika e vakaturi ena ulutaga oqo meda vakavatukanataka kina na inaki oqori?
6 Nida vakasaqarai ira ena yaga vei ira na itukutuku vinaka, me kua mada ga nida guilecava na inaki ni noda caka vuli iVolatabu. Na noda inaki meda vukei ira na yalomalumalumu mera mai yalataki ira vei Jiova ra qai papitaiso. Me vakalougatataka mada ga o Jiova na noda sasaga ena cakacaka vakaitalatala meda vakayacora kina na inaki oqo.—2 Tim. 4:5.