O sa Bau Taroga se Tiko e So Tale na Tataleitaki?

Kevaka e sa dua tiko nomu vuli iVolatabu, vakacava mo tarogi koya se tiko beka e dua nona itokani, wekana, se dua erau veikilai e via vulica tale ga na iVolatabu? Levu na gauna era dau tukuna sara ga e so na yaca. Ni o sa sikovi ira mera vulica na iVolatabu e rawa ni o cavuta na yaca i gonevuli kevaka e vakadonuya. O rawa ni kaya, “E sa marautaka tiko o [cavuta na yaca i gonevuli] nona vulica na iVolatabu, e nanuma o koya ni na rawa ni yaga tale ga vei iko na porokaramu ni vuli oqo e sega ni saumi.” Vakaraitaka sara vakalekaleka vua na icakacaka ni vuli ena nomu vakayagataka na ivola Kaya na iVolatabu.

Ia kevaka e sa toso vinaka tiko o gonevuli, rawa ni o uqeti koya me vakamacalataka na icakacaka ni vuli vua na nona itokani kei ira nona lewenivuvale era na rairai taleitaka tale ga mera vuli. E rawa ni sureti ira o gonevuli mera mai tiko tale ga ena gauna e vuli kina. Ke sega ni veiganiti oqori, rawa ni kerei iko o gonevuli mo lai vakaraitaka sara ga vei ira na icakacaka ni vuli. Oqo ena uqeti gonevuli me wasea na ka e sa vulica tiko ena iVolatabu vei ira e so tale.

Dina ni so na veisikovi lesu e se sega ni vakadeitaki sara nodra vuli iVolatabu, ia de dua e rawa nira tukuna vei keda na yacadra e so tale era na via vuli iVolatabu. Ni o vakaraitaka vei ira nomu veisikovi lesu na ivola Kaya na iVolatabu, o rawa ni taroga, “O kila beka e dua ena vinakata tale ga na ivola oqo?”

Ni sa voleka tiko mai na ivakataotioti, meda vakayagataka vinaka na gauna se vo, meda vukei ira kina na tamata mera rogoca ra qai ciqoma na itukutuku vinaka. O sa bau taroga se tiko e so tale na tataleitaki?