Vakaraitaka ni O Kauai Dina ena Nomu Dau Vakacaucautaki iTaukeinivale
1 Nida vakacaucautaka e dua ena vuku ni ka vinaka e cakava, ena vakayaloqaqataki koya, ena uqeti koya me tomana tiko ga nona cakava na ka oqori, ena vakamarautaki koya tale ga. Era dikeva rawa gona e levu na dautukutuku, ni gauna era dau vakacaucautaki ira kina na itaukeinivale ena vuku ni dua na ka vinaka era cakava, e dau uqeti ira sara ga mera vakarorogo. Sala cava eda rawa ni vakacaucautaki ira kina na itaukeinivale ena noda saga meda tukuna vei ira na itukutuku vinaka?
2 Kauaitaka na Ka O Raica: Ena gauna sa lesu tale kina i lomalagi o Jisu Karisito, a vakaraica tu mai na veika vinaka era cakava na vitu na ivavakoso e Esia Lailai. (Vkta. 2:2, 3, 13, 19; 3:8) E dodonu meda vakadamurimuria tale ga na nona ivakaraitaki ena noda saga meda vakaraica e so na ka meda vakacaucautaki ira kina na itaukeinivale eda sotavi ira ena cakacaka vakavunau. Kena ivakaraitaki, na noda raica na kena samaki vinaka na lomanibai, na nona kauaitaki iratou na luvena e dua na itubutubu, se na nodra kidavaki keda ena marau na itaukeinivale. Na veika oqo eda rawa ni vakacaucautaki ira kina. Ia vakacava, eda dau cakava beka oqori?
3 Dau Vakarorogo: Nida vakamacala vei ira na itaukeinivale, meda taroga na taro ena uqeti ira mera vakamacala. Vakaraitaka noda veidokai ena noda rogoca vinaka na ka era tukuna. (Roma 12:10) Oqo ena vukei keda meda kila na ka meda vakacaucautaki ira kina, da qai yavutaka tale ga mai kina na ka meda kaya tarava.
4 Meda Yalomatua: Na cava meda cakava ke kaya mai o itaukeinivale e dua na ka e sega sara ga ni salavata kei na ka dina ena iVolatabu? Meda kua ni vakalewa na ka e kaya, ia meda vakavinavinakataki koya ena noda kaya “vinaka nomu kauta cake mai na tikina oqori,” se dua tale na kena itukutukuni e veiganiti. (Kolo. 4:6) Ke via veiba o itaukeinivale, meda vosa vakayalovinaka vua da qai vakavinavinakataka na nona kauaitaka dina na ulutaga oya. Na iwalewale oqo e rawa sara ga ni vakamalumutaki ira na dau tusaqati keda.—Vkai. 25:15.
5 Ena veivakauqeti ga na noda vakacaucautaka e dua kevaka e vu dina mai lomada. Na vosa veiuqeti vaka oqo e vakarokorokotaki kina o Jiova, ena uqeti ira tale ga e so mera mai ciqoma na itukutuku vinaka ni nona Matanitu.