Cakacaka Vakavunau e Veivale

1. Na taro cava e basika me baleta na cakacaka vakavunau e veivale? Na cava na vuna?

¹ “O ira era dau vakaitavi ena levu na sala mera kacivaka kina na ka dina, era vakadinata ni sega tale ni dua na sala e uasivia na noda lako yani e veivale meda solia na ivola na MILLENNIAL DAWN.” Na ivakamacala oqo mai na Zion’s Watch Tower, 1 Julai, 1893, e vakaraitaka ni yaga na cakacaka vakavunau e veivale. Nikua, oqo na cakacaka eda kilaitani kina na iVakadinadina i Jiova ena veiyasa i vuravura kece. Vakacava, e se yaga tiko beka ga na cakacaka oqo dina ni levu na vanua era sa sega ni kune vakalevu na tamata e vale?

2. Na cava na yavu vakaivolatabu ni vunau e veivale?

² E Vakaivolatabu, Bibi Tale Ga: E yavutaki ena iVolatabu na cakacaka vakavunau e veivale. A vakaroti ira e 70 na tisaipeli o Jisu mera lako yarurua e veivale. (Luke 10:5-7) Oti vakalailai nona mate o Jisu, e kaya na iVolatabu me baleti ira na tisaipeli: “E na veisiga kecega e na vale ni soro, kei na veivale kecega, era sa sega ni mudu ni vakatavuvuli ka vunautaki Jisu.” (Caka. 5:42) E dau gumatua tale ga na yapositolo o Paula na vunau e veivale.—Caka. 20:20.

3. Cava e so na vuna e yaga kina vakalevu na cakacaka vakavunau e veivale?

³ Me yacova mai nikua, na vunau e veivale e tiki bibi ni kena kacivaki na itukutuku vinaka. E vakarawarawataka na tuvani vakamatau ni nodra “vakasaqarai” o ira e ganiti ira na itukutuku vinaka. (Maciu 10:11, NW) E dau rawarawa na noda veivosaki kei ira na tamata nira tu e vale. Nida rogoca na ka era tukuna, raica na irairai ni matadra, dikeva na nodra lomanivale se lomanibai, eda na kila kina na ka era vinakata kei na ka era dau kauaitaka. Ena rawa ni bau balavu toka kina noda veivosaki.

4. Sala cava e rawa ni vuavuaivinaka kina noda cakacaka vakavunau e veivale?

⁴ Veisautaka Noda iTuvatuva: E tu vakarau na yapositolo o Paula me veisautaka nona ituvatuva “e na vuku ni tukutuku-vinaka.” (1 Kor. 9:23) Rawa nida veisautaka tale ga na noda ituvatuva meda vunau ena gauna era kune kina vakalevu na tamata e vale, rawa nida vunau ena yakavi, ena muanimacawa, se gauna ni olodei. Meda vola na vale era lala, da qai lesuva ena dua tale na gauna.

5. Na cava meda cakava meda vukei ira na tacida tautauvimate mera vunau e veivale?

⁵ O ira mada ga na tacida tautauvimate e rawa nira vunau e veivale. Rawa nida tuvanaka meda kauti ira ena cakacaka vakavunau, ia meda tara ga na vale era tu vakarawarawa, da qai vakamuri ira vakamalua ena gauna ni cakacaka. E dua na tacida yalewa e rawa ni dua ga na vale e vosa kina ena 30 miniti, baleta ni dau leka na nona icegu. Ia e marautaka na tacida oqo ni bau rawa tale tu ga ni tokona na cakacaka vakavunau e veivale!

6. Na cava meda vakaitavi wasoma kina ena cakacaka vakavunau e veivale?

⁶ E levu era vaka na sipi era se kune tiko ga ena vunau e veivale. A tukia e dua na katuba e dua na dautukutuku, qai tukuni mai vua: “Curu mai. Au kilai kemuni. Au masuta sara tiko ga na Kalou me tala mai e dua me vukei au, sega ni dede au sa rogoca na tukituki. E rogoca noqu masu na Kalou ni talai iko mai.” E vakaraitaka votu na vuavuaivinaka ni vunau e veivale ni vakalougatataka tiko o Jiova na iwalewale ni vunau oqo. (Maciu 11:19, VV) Meda saga tiko ga meda vakaitavi wasoma ena cakacaka vakavunau e veivale.