Porokaramu Vou ni Soqo ni Tabacakacaka

E dodonu me rokovi na Kalou o Jiova. Ia eda na vakarokorokotaki koya vakacava? Cava e dredre kina vei ira e so mera vakarokorokotaka na Kalou? Na veivakalougatataki cava era vakila na dau rokova na Kalou nikua? Na porokaramu ni soqo ni tabacakacaka ni 2008 ena sauma na veitaro oqori. Na kena usutu “Cakava na Ka Kece me Rokovi Kina na Kalou.” (1 Kor. 10:​31, VV) Vakasamataka mada na kakana vakayalo sa waraki keda tu ena soqo siga rua oqo.

Na ivakatawa ni tikina ena vosa ena ulutaga “Na Vuna Meda Rokova Kina na Kalou,” kei na “Mo iVakaraitaki Vinaka ena Nomu Cakava na Loma ni Kalou.” Ena solia tale ga na vunau soqovi levu, “O Cei Dina Era Rokova na Kalou?,” kei na iotioti ni vunau, “Era Vakarokorokotaka na Kalou ena Duavata e Vuravura Taucoko.” Ena taura tale ga na Koronivuli ni Vuli Vunau. Ia na ivakatawa ni tabacakacaka ena vosa ena ulutaga “Vakavotuya ena Marau na Lagilagi ni Kalou,” “Veika e Gadrevi ena Tabacakacaka,” kei na “Tiko ‘Dei ena iVakavuvuli Dina,’ ” e yavutaki mai na 2 Pita 1:​12. Eda na vulica tale ga na nona “Vakarokorokotaki na Kalou ena Cakacaka Vakapainia.” Na imatai ni vosa veitaravi e kena ulutaga “Rokova na Kalou ena Veibasoga ni Noda Bula Kece,” ena dikevi kina na bibi ni vosa uqeti vakalou e volai ena 1 Korinica 10:31. Na vosa veitaravi “Veiqaravi Tabu e Vakalagilagi Kina o Jiova” ena veivosakitaki kina na veitikina me baleta na noda sokalou. Eda na marautaka na ivakamacala lekaleka ni Vale ni Vakatawa, kei na veivosakitaki ni tikinivolatabu ni veisiga ena Sigatabu. Ena dua tale ga na vunau ni papitaiso.

Levu nikua era sega ni dau kauaitaka na Kalou. Era kauaitaka ga nodra bula vakayago ra guilecava kina na lagilagi i Jiova. (Joni 5:​44) Ia, o keda eda vakamareqeta na lekaleka ni gauna sa vo ena noda “Cakava na Ka Kece me Rokovi Kina na Kalou.” Meda saga kece meda tiko ena soqo ni tabacakacaka oqo, meda vakila kina na kena yaga.