Meda Vakalevutaka Noda Cakacaka Vakavunau
1 A uqeti ira na lotu Vakarisito o Paula mera muria na ivakasala ni Kalou ra qai ‘vakayacora vakavinaka sara.’ (1 Ces. 4:1, VV) Na cava soti e okati kina? Dua, oya na noda qara tiko ga na sala meda vakalevutaka kina noda cakava na veika e vauca noda sokalou, da qai saga meda ‘vakayacora vinaka sara.’—2 Tim. 4:5, VV.
2 Noda iNaki;:Noda vinakata meda qaravi koya na Dauveibuli mai vu ni lomada ena uqeti keda meda vakalevutaka noda cakacaka vakavunau. Eda na vinakata meda toso vakayalo da qai qara e so na idusidusi meda vakavinakataka kina noda cakacaka vakavunau. Ke tiko e dua noda ituvatuva vinaka qai donu na inaki eda cakava kina, eda na rawata vinaka noda isausau vakayalo.—Same 1:1, 2; Fpai. 4:6; Iper. 10:24, 25.
3 Meda bucina na yalo ni lomasoli kei na noda vakuai keda meda vakalevutaka kina noda cakacaka vakavunau. Eda na bucina na yalo oqo ke da masu da qai vakasamataka vakatitobu na ivakaraitaki uasivi i Jisu. (Maciu 20:28) E dau marau o Jisu ni vukei ira na tamata ena cakacaka vakavunau. (Caka. 20:35) Rawa tale ga nida vakatotomuri koya ena noda kauaitaki ira na tamata da qai tu vakarau meda vakalevutaka noda cakacaka vakavunau.—Aisea 6:8.
4 iTavi ni iTubutubu: E rawa sara ga vei ira na itubutubu mera vukei luvedra mera tu vakarau ni veiqaravi, mera vakalevutaka tale ga nodra cakacaka vakavunau. Era dau vuli na gone mai na ivakarau ni nodra gugumatua na lewenivuvale, vaka kina ena cakacaka vakavunau. A uqeti e dua na tacida tagane ni se gonelailai me vakalevutaka nona veiqaravi ena gauna e dau vukei tukana kina ena so na itavi ni ivavakoso. Nona raica nona gugumatua o tukana qai mamarau, e uqeti koya sara ga me vakalevutaka nona veiqaravi. Ena gauna oqo e sa dauveiqaravi tiko ni ivavakoso.
5 Tacida Tagane: ‘Kevaka e dua e gadreva . . . sa gadreva na cakacaka vinaka.’ (1 Tim. 3:1) Na vosa oqo e dodonu me uqeti ira na mataveitacini tagane mera gadreva se kakavaka na ilesilesi ni veiqaravi ena ivavakoso i Jiova. E sega ni gadrevi me tiko nodra taledi, se mera kenadau ena dua na ka. Na mataveitacini tagane e tadolova e so na isausau vakayalo e dodonu me vakaliuca na Matanitu ni Kalou qai gumatua ena cakacaka vakavunau. (Maciu 6:33; 2 Tim. 4:5) Ena saga tale ga me ivakaraitaki vinaka.
6 Vuravura Raraba: Sa vakatotolotaka tiko o Jiova na cakacaka ni kumukumuni. (Aisea 60:22) E sa gadrevi kina vakatotolo meda muria tiko ga na ivakaraitaki i Jisu ena noda vakalevutaka noda cakacaka. Na itukutuku ni yabaki vakacakacaka ni 2006 e vuravura raraba e laurai kina nira lewe 248,327 era papitaiso. Na kena ivakatautauvata nira papitaiso e veisiga e sivia na 680 na dautukutuku! Meda qara tiko mada ga na sala meda vakalevutaka kina noda cakacaka vakavunau.