Vakavinakataka Tiko ga Nomu Cakacaka Vakavunau
1 E marau na Tamada vakalomalagi ni raica noda toso vakayalo. Qo noda toso meda matua vakayalo kei na laulau ni noda kacivaka na itukutuku vinaka. A uqeti Timoci na yapositolo o Paula me bulataka tiko ga na ka e vulica, me laurai kina nona toso vakayalo. (1 Tim. 4:13-15, VV) Meda saga kece meda vakavinakataka tiko ga na iwalewale ni noda cakacaka vakavunau, kevaka mada ga e sa dede na noda cakava tiko mai.
2 iSausau: Noda tekia na isausau eda na toso kina vakayalo. Na isausau cava eda na sauva? Rawa nida saga meda kenadau ni vakayagataka na iseleiwau vakayalo na iVolatabu. (Efeso 6:17) Ena rairai tiko na tabana e gadrevi meda vakavinakataka me vaka na vunau ena salatu, vunau ena talevoni, se vunau ena yalava ni bisinisi. Rawa nida saga me laulau cake noda veisikovi lesu. Dua na isausau vinaka tale ga noda saga meda kenadau ena tekivutaki kei na caka vuli iVolatabu.
3 iVukevuke: E tuvanaki na soqoni me vakarautaki keda meda toso vakayalo, qo na soqoni me vaka na Koronivuli ni Vuli Vunau kei na Soqoni ni Cakacaka. Na levu ni gauna eda vakayagataka meda vakavakarau ena soqoni qo, vaka kina na noda tiko kina, kei na noda bulataka na ka eda vulica, e sega ni vakabekataki nida na tamusuka vakalevu na kena yaga.—2 Kor. 9:6.
4 E bibi tale ga meda veivukei ena noda toso vakayalo. (Vkai. 27:17) Noda rogoca vinaka na nodra ivakamacala o ira eda veitomani vata ena cakacaka vakavunau ena rawa ni vakavinakataka na iwalewale ni noda ivakamacala. Na ivakatawa ni vulivola e rawa ni tuvanaka e dua na dautukutuku gugumatua me tuberi keda. E ka ni veivakalougatataki dina nodra vukei keda o ira na painia gugumatua se dautukutuku matua me laulau kina noda cakacaka vakavunau, ena vakamarautaki keda tale ga! E tiko beka e dua na dautukutuku vou ena noda vulivola? Rawa nida liu sara ga meda sureti koya meda cakacaka vata.
5 Na cakacaka bibi duadua nikua na cakacaka vakavunau. Meda solia noda vinaka kece nida ‘cabora na imadrali ni vakavinavinaka’ vei Jiova. (Iper. 13:15) Ke da saga meda vakavinakataka tiko ga noda cakacaka vakavunau, ena ‘sega ni dua na ka meda maduataka, nida na wasea vakadodonu na ivakavuvuli dina.’—2 Tim. 2:15.