Vakacegui Ira na Lolosi
1. Cava mera vakacegui kina na lolosi tu?
1 Dua dina na ka rarawataki nodra takali na wekada lomani, vakabibi vei ira na sega tu nodra inuinui. (1 Ces. 4:13) Levu ra taroga: ‘Cava eda mate kina? Eda lako e vei nida sa mate? Au na raici ira tale beka na wekaqu sa mate?’ Eda na veivosakitaka yani qo e so na vakatutu meda na vakacegui ira kina na lolosi tu ena cakacaka vakavunau.—Aisea 61:2.
2. Ke tukuna o itaukeinivale ni dua tiko nodratou mate, meda taura beka vakalevu nona gauna?
2 Veivale: Eda na rairai sotava e dua na itaukeinivale e kaya ni se qai takali ga e dua na lewe ni nona vuvale. Nida raica na kena ituvaki meda tarogi keda, e laurai beka vua ni rarawa vakalevu? Era oso tu beka e vale na weka? Ena ituvaki va qo, e vinaka meda kua ni taura vakalevu nodra gauna. (Dauv. 3:1, 7) Rawa nida kaya nida duavata kei na nodra lolosi da qai solia sara e dua na ivolacebaceba, se ivola, oti da gole sara. Eda rawa ni lesu tale ena gauna veiganiti meda lai wasea vei ira na itukutuku veivakacegui ena iVolatabu.
3. Ke da raica ni veiganiti na ituvaki, na tikinivolatabu cava soti eda rawa ni wilika vei ira na itaukeinivale era lolosi?
3 E rawa nida vakamacala ke da dikeva ni ganita na ituvaki era tu kina. Nida sa vakamacala meda kua ni sabaya nodra rai cala, meda wilika vei ira na vosa ni yalayala ena iVolatabu me baleta na veivakaturi. (Joni 5:28, 29) Rawa nida vakamacalataka na ka e kaya na iVolatabu me baleta na kedra ituvaki na sa mate. (Dauv. 9:5, 10) Eda rawa ni tukuna sara ga e dua na ivakaraitaki ni veivakaturi ena iVolatabu. (Joni 11:39-44) Dua tale ga na ka eda rawa ni cakava, oya meda veivosakitaka na ka a kaya na tamata yalodina o Jope me baleta na nona nuitaki Jiova. (Jope 14:14, 15) Oti solia sara na ivola Ni Mate e Dua na Wekamu Voleka se dua tale na ivola se ivolacebaceba. Rawa nida solia na ivola Kaya na iVolatabu, da vakaraitaka vei ira na wase 6, da tuvanaka sara meda veivosakitaka ena veisiko e tarava.
4. Gauna cava tale da rawa ni veivakacegui kina?
4 So Tale na iTuvaki: Ke caka ena Kingdom Hall na vunau ni veibulu, era na tiko beka e so na weka ni mate era sega ni iVakadinadina? Rawa ni vakarautaki vei ira na ivola ni isoqosoqo e veivakacegui. So na vale a caka kina na somate era raica na yaga ni kena dau biu tu na ivola vaka qo mera wilika na weka era lolosi. So era dau vola e dua na ivola ni veivakacegui vei ira na vuvale e tabaki ena niusiveva na takali ni wekadra. E dua na turaga a takali na watina a taura e dua na ivola kei na so na ivolacebaceba. A mani gole sara na turaga qo kei na luvena yalewa vua na dautukutuku a vakauta yani na ivola qori, mani taroga: “O kemuni ga oni a vakauta mai na ivola qo? Au via kila sara ga e levu na ka mai na iVolatabu!” Rau tekivu vulica sara na iVolatabu na turaga qo kei na luvena yalewa, rau sa tiko tale ga ena soqoni.
5. Na cava meda tu vakarau kina ni vakacegui ira na lolosi?
5 E kaya na Dauvunau 7:2: “Sa vinaka me lako ki na vale ni tagi, ka ca me lako ki na vale ni kana magiti.” E dau rawarawa vei ira na lolosi mera rogoca na Vosa ni Kalou ni vakatauvatani kei ira na sa lakova tu ga na ka ni marau. Meda tu vakarau mada ga meda vakacegui ira na lolosi ena gauna veiganiti.