Na Ka Meda Vakaliuca
1. A vakaraitaka vakacava o Jisu ni bibi vua na cakacaka vakaitalatala?
1 A vakaliuca o Jisu na cakacaka vakaitalatala. E qacoya nona cakacaka ena nona taubaletaka e drau vakacaca na maile ena vanua o Palesitaina me vunau vei ira e levu. Ni bula rawarawa ga e levu kina na gauna e vakayagataka ena cakacaka vakaitalatala. (Maciu 8:20) Nira saga na lewenivanua mera tarovi koya me vakabulai ira na tauvimate, a tukuna: “E dodonu meu tukuna tale ga na itukutuku vinaka ni matanitu ni Kalou ena veikoro tale eso, ni qo na ka au talai mai kina.”—Luke 4:43.
2. Na cava e rui bibi kina vei Jisu na cakacaka vakaitalatala?
2 Na cava e rui bibi kina vei Jisu na cakacaka vakaitalatala? E nona inaki sara ga me dokai na yaca i Jiova. (Maciu 6:9) E lomani Tamana vakalomalagi qai uqeti koya na loloma qori me cakava na ka kece e vakarota, e talairawarawa tale ga kina. (Joni 14:31) Kuria qori, e kauaitaki ira dina na lewenivanua qai via vukei ira.—Maciu 9:36, 37.
3. Eda na vakaraitaka vakacava nida vakaliuca na cakacaka vakaitalatala?
3 Vakatotomuri Jisu: E ka ni sasaga toka ena vuravura qo na noda vakaliuca na cakacaka vakaitalatala me vakataki Jisu, ni levu na ka e tu ena vuravura qo e kania vakalevu na gauna, e veivakawelei tale ga. (Maciu 24:37-39; Luke 21:34) O koya gona ena vinakati meda vakadeitaka na veika e bibi sara ena noda tuvanaka na gauna meda vakavakarau da qai vakaitavi wasoma ena cakacaka vakaitalatala. (Fpai. 1:10) Eda na saga meda bula rawarawa ga da na sega ni vakayagataka vakavinaka na vuravura qo.—1 Kor. 7:31.
4. Na cava e bibi kina ena gauna qo me donu na ka eda vakaliuca?
4 Ni lekaleka ga na gauna, o koya e vuku ena vakaliuca na veika e bibi sara. Me kena ivakaraitaki, ke kila ni sa voleka e dua na draki ca levu ena vakayagataka nona gauna kei na kaukaua me vakarautaka na ka me taqomaki kina nona vuvale qai vakasalataki ira tale ga na tiko tikivi koya. Ena guilecava mada na cakacaka e sega ni bibi. Sa lekaleka na gauna me yaco kina na draki ca levu ni Amaketoni. (Sefa. 1:14-16; 1 Kor. 7:29) Me rawa nida vakabulai kei ira era rogoci keda ena vinakati meda qaqarauni vinaka kei na noda veivakavulici ena ivavakoso se noda vakavulici ira tale eso. (1 Tim. 4:16) Io, ena vakatau na noda bula ke da vakaliuca tiko ga na cakacaka vakaitalatala!