O Rawa ni Vunau Tawalokuci!
1. (a) Na cava e okati ena vunau tawalokuci? (b) Era le vica na tiko ena soqoni qo era rogoca na itukutuku vinaka ena imatai ni gauna ena vunau tawalokuci?
1 Era le vica mada ena ivavakoso era rogoca na ka dina ena imatai ni gauna ena vunau tawalokuci? Rairai o na kurabui ena kedra iwiliwili. E okati ena vunau tawalokuci na kena kacivaki na itukutuku vinaka vei ira eda sotava e veisiga—nida vodo vata ena basi se so tale na sala ni veilakoyaki, nida gade vei ira na wekada se o ira eda tiko veitikivi, nida lai volivoli, lai vuli, cakacaka, kei na veivanua tale eso. Nira tarogi e dua na ilala iVakadinadina papitaiso era sivia na le 200, e 40 na pasede vei ira qori era rogoca na ka dina ena imatai ni gauna ena vunau tawalokuci! Koya gona, e vuavuaivinaka dina na iwalewale ni vunau qo.
2. Na ivakaraitaki cava ni vunau tawalokuci e tu ena iVolatabu?
2 Era dau vunau tawalokuci tale ga na daukaulotu ena imatai ni senitiuri. Me kena ivakaraitaki, ni vakacegu toka e Samaria o Jisu, a vunau vua e dua na yalewa a lai takiwai yani ena toevu i Jekope. (Joni 4:6-26) O Filipi a tekivuna na veivosaki kei na matanivanua ni Iciopea a wilika tiko na ivola nei Aisea ni taroga: “O kila na ka o wilika tiko?” (Caka. 8:26-38) Ni vesu tu mai Filipai o Paula, a vunau vua e dua na ovisa ni valeniveivesu. (Caka. 16:23-34) Ena gauna e vakatabui kina me biuta na nona vale, a “dau vakacegui ira kece na lako yani kina, e doudou ni vunautaka vei ira na matanitu ni Kalou kei na nona vakavulici ira ena veika me baleta na Turaga o Jisu Karisito.” (Caka. 28:30, 31) Ke o mamadua mada ga, o rawa ga ni vunau tawalokuci. Ena sala cava?
3. Na cava meda cakava meda kua kina ni madua?
3 Ka mo Cakava: E levu vei keda e dau dredre meda tekivuna na veivosaki kei ira eda sega ni veikilai. Ke da veikilai mada ga, eda se rairai madua ga meda tukuna na itukutuku vinaka. Ia ena uqeti keda meda vunau na noda vakasamataka vakatitobu na vinaka i Jiova, na iyau talei vakayalo e vakarautaka me baleti ira na nona tamata, kei na kedra ituvaki vakaloloma o ira era sega ni qaravi Jiova. (Jona 4:11; Same 40:5; Maciu 13:52) Meda kerea tale ga na veivuke i Jiova meda ‘doudou.’ (1 Ces. 2:2) E tukuna e dua a vuli e Kiliati: “Au vakila ni dau yaga na masu ena gauna e dredre kina meu vosa vei ira au sotava.” Ke o dau rere se madua na vosa, masu lo ga vakalekaleka.—Niem. 2:4.
4. Na cava e rairai vinaka meda saga mada ga e liu, na cava na vuna?
4 Ni laurai na vakasama e tiko ena vosa vunau tawalokuci, e sega ni tukuni me dua sara na ikau ni vosa se tikinivolatabu me tekivu kina na veivosaki. De dua e vinaka meda saga mada ga e liu meda tekivuna na veivosaki, meda kua ni nanuma meda sa vunau sara. Era tukuna e levu na dautukutuku na nodra cakava qo e vakadoudoutaki ira mera tukuna na itukutuku vinaka. Meda kua ni vakaukauataka e dua meda veitalanoa tiko ga ke sega ni taleitaka. Meda yalana vinaka ga na veivosaki da lako sara.
5. A rawa vakacava me vunau tawalokuci e dua na tacida mamadua?
5 Ni lai volivoli ena makete e dua na tacida yalewa mamadua, e dau raici ira sara ga e sotava qai matadredredre vei ira. Ke dua e dredre lesu mai, ena vosa ga vakalekaleka vua. Ke taleitaka, e doudou na tacida me tomana na veivosaki. E dau vakarorogo vinaka me kila na ka e taleitaka o koya erau veivosaki tiko sa qai vakamuai koya ina kena ivakamacala veiganiti vakaivolatabu. Na iwalewale qo, a solia rawa kina na tacida e levu na ivola, a tekivutaka tale ga e dua na vuli iVolatabu.
6. Eda na tekivuna vakacava na veivosaki nida vunau tawalokuci?
6 Tekivuna na Veivosaki: Na cava meda tukuna me tekivu kina na veivosaki? A tekivuna o Jisu na nona veivosaki kei na yalewa ena yasa ni toevu ni kerea ga me dua na mena wai. (Joni 4:7) De dua eda rawa ni tekivuna na veivosaki nida vakabula se da taro. Ni toso tiko na veitalanoa, o na qai kila na gauna vinaka mo kauta cake mai kina e dua na vakasama vakaivolatabu, de dua o na kaburaka sara na sore ni ka dina. (Dauv. 11:6) Era vakadinata eso ni yaga na nodra dau tukuna e dua na ka vakavure vakasama e vakavu lomatarotaro qai via kila o koya e vakarorogo e levu tale na ka. Kaya mada ni o wawa tiko mo raici vuniwai, de dua o rawa ni tekivutaka na veivosaki ni o tukuna: “Au marau niu sa na sega tale ni tauvimate.”
7. E yaga vakacava ena noda vunau tawalokuci na noda dau kauaitaka na ka eda raica se rogoca?
7 Eda rawa tale ga ni tekivuna na veivosaki ke da kauaitaka na ka eda raica se rogoca. Ke da raica e dua na itubutubu e itovo vinaka na luvena, eda rawa ni vakavinavinakataki itubutubu qai taroga: “Na cava e vukei iko mo dua kina na itubutubu vinaka?” E dua na tacida yalewa e dau vakarogoca na ulutaga era veivosakitaka eso era cakacaka vata qai yavutaka na nona ivakamacala ena ka era taleitaka. Ena gauna e kila kina ni vakarau vakamau e dua na yalewa erau cakacaka vata, a solia sara na tacida e dua na Yadra! me baleta na tuvanaki ni vakamau, qai tomani rawa kina na veivosakitaki ni iVolatabu.
8. Eda na vakayagataka vakacava na noda ivola meda tekivutaka kina na veivosaki?
8 E dua tale na sala meda tekivutaka kina na veivosaki, na noda wilika na noda ivola ena vanua era raici keda kina na so. E dua na tacida tagane e dau cega e dua na ulutaga vakavure vakasama ena Vale ni Vakatawa se Yadra! qai wilika lo. Ke kila ni vakaraica tiko na mekesini e dua e toka volekati koya, ena taro se vakamacalataka ga vakalekaleka na ulutaga. Sa tekivu rawa e kea na veivosaki, lai vunau sara. Na noda biuta tu mada ga e dua na noda ivola ena vanua e laurai levu ena rairai vakavu lomatarotaro vei ira na noda itokani vakacakacaka se o ira eda vuli vata ra qai vaqaqa na veika e tukuni ena noda ivola.
9, 10. (a) Eda na qara vakacava na sala meda vunau tawalokuci kina? (b) Na cava o sa bau cakava mo vunau tawalokuci kina?
9 Qara na Sala mo Vunau Tawalokuci Kina: Nida vakasamataka na bibi ni vunau kei na lekaleka ni gauna sa vo me caka kina, meda kua ni nanuma ni vunau tawalokuci e dau yaco ga vakasauri qai sega ni lalawataki. Ia meda qara na sala meda vunau kina e veisiga ena vanua cava ga eda lakova. Meda vakasamataki ira tiko eda na rairai sotava, kei na sala meda tekivuna kina na veivosaki. Meda kauta tiko e dua na iVolatabu kei na noda ivola eda rawa ni vakamacala kina vei ira era tataleitaki.—1 Pita 3:15.
10 E levu na dautukutuku era kunea na sala mera vunau tawalokuci kina nira dau gugumatua. E dua na tacida yalewa e vakaitikotiko ena dua na tabavale e yadravi vinaka tu e dau vakayagataka na kena rumu ni veivakamarautaki me biubiuti ira vata kina na tikitiki lalai ni iyaloyalo me baleta eso na ka rairai totoka era wavoliti keda tu [jigsaw puzzle]. Nira qoroya na tiko e kea na kena rairai vinaka, e vakayagataka sara na gauna qori me tekivuna kina na veivosaki qai tukuna vei ira na yalayala ni Kalou me baleta “na lomalagi vou kei na vuravura vou.” (Vkta. 21:1-4) O bau vakasamataka eso na sala o rawa ni vunau tawalokuci kina?
11. Eda na lesuvi ira vakacava na tataleitaki eda vunau tawalokuci vei ira?
11 Lesuvi Ira na Tataleitaki: Ke o sotava e dua e vakarorogo, saga mo lesuvi koya. Ke veiganiti, o rawa ni tukuna vua: “Au marautaka sara ga na nodaru veitalanoa. E dua na vanua daru rawa ni sota kina me tomani tale nodaru veitalanoa?” Eso na dautukutuku era solia na nodra naba ni talevoni kei na vanua era vakaitikotiko kina ra qai kaya: “Au marautaka na nodaru veivosaki. Ke o via kila eso tale na ka daru veivosakitaka, qo na noqu naba ni talevoni kei na vanua au vakaitikotiko kina.” Ke o sega ni rawa ni lesuvi koya e tataleitaki, mo vakalewena totolo na fomu Kerekere me Lai Sikovi (S-43) qai solia vua na sekeriteri ni ivavakoso me rawa ni lesuvi koya e dua ena ivavakoso e qarava na yalava e tiko kina.
12. (a) Na cava meda vola da ripotetaka kina na gauna eda vakayagataka ena vunau tawalokuci? (b) E vuavuaivinaka vakacava na vunau tawalokuci? (Raica na kato “Vuavuaivinaka na Vunau Tawalokuci!”)
12 Me ripotetaki na gauna eda vakayagataka ena vunau tawalokuci. Koya gona, meda vola ke vica mada ga na miniti ena dua na siga. Vakasamataka mada qo: Ke da vunau tawalokuci me lima na miniti e veisiga na dautukutuku kece, ena sivia na 17 na milioni na aua eda vakayagataka e veivula!
13. Na cava ena uqeti keda meda vunau tawalokuci?
13 Na noda lomana na Kalou kei ira na kainoda e vuna vinaka duadua meda vunau tawalokuci kina. (Maciu 22:37-39) Ni vu mai lomada noda taleitaka na itovo i Jiova kei na nona inaki, eda na tukuna “na lagilagi vakaturaga ni nona matanitu.” (Same 145:7, 10-12) Ni se vo tiko na gauna, na noda kauaitaki ira dina na wekada ena uqeti keda meda vunautaka na itukutuku vinaka ena gauna veiganiti kece. (Roma 10:13, 14) Ke da lalawataka da vakavakarau tale ga, eda na rawa ni vunau tawalokuci kece, rairai eda na marau sara ke mai kila na ka dina ena imatai ni gauna e dua na yalomalumalumu nida vunau tawalokuci vua.
[Caption on page 4]
E vinaka meda saga mada ga e liu meda sotavi ira eso da tekivuna na veivosaki
[Caption on page 5]
E levu na dautukutuku era kunea na sala mera vunau tawalokuci kina nira dau gugumatua
[Kato ena tabana e 5]
Vakatutu me Tekivu Kina na Veivosaki
◼ Masu mo doudou na vosa
◼ Digi ira era veikauaitaki ra sega ni vakusakusa
◼ Raici ira o sotava, matadredredre, tukuna e dua na ka drau taleitaka ruarua
◼ Vakarorogo vinaka
[Kato ena tabana e 6]
Vuavuaivinaka na Vunau Tawalokuci!
• Ni waraka tiko na nona motoka me ripeataki, a vunau vei ira na tu e kea e dua na tacida tagane qai solia vei ira na ivola ni veisureti ni ivunau soqovi levu ena soqo ni tikina. Ena dua na soqo ni tikina ena yabaki e tarava, a mai vakabula vua e dua, ia e sega ni kilai koya na tacida. A qai kila e muri ni dua vei ira na tagane era a tiko ena qaraji a solia kina na ivola ni veisureti! Na turaga qo a lai vakarorogo ena ivunau soqovi levu qai kerea me vulica na iVolatabu. Erau sa papitaiso ruarua vakaveiwatini.
• E kaya e dua na tacida yalewa a vulica na ka dina ena vunau tawalokuci ni nona yalava vinaka ni vunau na nodratou koronivuli na luvena. Ni dau sotavi ira e kea o ira era tiko veitikivi, kei ira na itubutubu era dau gole yani ena gauna ni nodra bose e koronivuli. Ni dau vakaveikilaitaki koya, e dau vu mai lomana na nona tukuna ga vakalekaleka ni iVolatabu e idusidusi yaga ena nona susugi ratou na luvena, oti sa qai veisautaka na ulutaga e veivosakitaki. Ia ni tekivuna rawa ga na veivosaki, e rawarawa sara ni tomana na nona ivakamacala ena iVolatabu. Na iwalewale oya e vukea kina e le 12 me ratou papitaiso.
• Ni lai raica e dua na tacida yalewa e dua na dauvolitaki inisua, a vakayagataka sara na gauna qori na tacida me vunau kina. A mani taroga na dauvolitaki inisua na tacida ke vinakata me bulabula vinaka, mamarau, me bula tawamudu tale ga. E vakaio na dauvolitaki inisua qai tarogi tacida se na inisua vakacava e tukuna tiko. A vakaraitaka na tacida na yalayala ena iVolatabu qai solia vua e dua na ivola a lai wilika sara ena dua na bogi. A tuvanaki me vuli iVolatabu, tekivu lako ena soqoni, lai papitaiso sara.
• A tekivuna e dua na tacida yalewa na veivosaki kei na marama erau dabe vata tiko ena waqavuka, mani vunau sara vua. Ni kele na waqavuka, a solia sara na tacida vua na marama oya na nona naba ni talevoni kei na vanua e vakaitikotiko kina qai uqeti koya me kerea me vulica na iVolatabu ke ra sikovi koya yani na iVakadinadina i Jiova. Ena siga e tarava, erau sa tu ena nona katuba e rua na iVakadinadina. A vulica sara na iVolatabu, totolo nona toso vakayalo, papitaiso sara, sega ni dede sa vakavulica tale ga e le tolu ena iVolatabu.
• E dau tukuna e dua na tacida tagane mataboko yabaki 100 e vakaitikotiko ena nodra vale na malumalumu: “Eda gadreva na Matanitu.” Qo e vakavuna nodra vakatataro na nasi kei ira na qaravi tu e kea, a rawa gona me vakamacalataka vei ira na veika me baleta na Matanitu. A tarogi tacida e dua na marama e cakacaka e kea se cava ena cakava ena Parataisi. E sauma na tacida: “Au sa na rai, au sa na lako tale, au na vakama na noqu idabedabe qiqi.” Ni mataboko na tacida, a dau kerei koya na marama oya me wilika vua na mekesini. A mai sikovi tacida ena dua na siga o luvenayalewa, a kerea sara na marama e tukuni toka e cake me kauta i vale na mekesini. A tukuna e dua na nasi vua na luvenayalewa na tacida: “Na neimami ulutaga vou ena valenimalumalumu: ‘Eda gadreva na Matanitu.’”
• E dua na tacida yalewa a laini tu ena valenikana a rogoca e vica na kena turaga ni ratou veivosakitaka tiko na veika me baleta na politiki. E tukuna sara e dua ni sega ni walia rawa na noda leqa na matanitu. E tukuna lo sara na tacida: ‘Gauna vinaka sara ga qo meu vunau kina.’ E masu vakalekaleka qai lako sara vei ratou. Ni vakaveikilaitaki koya oti, e tukuna vei iratou na Matanitu ga ni Kalou ena walia na leqa kece ni kawatamata, qai solia vei iratou e dua na brochure. A lako yani ena gauna qori na manidia, mani nanuma na tacida ni na vakatalai koya. Ia e tukuna o manidia ni a vakarorogo tiko qai vinakata tale ga e dua na brochure. A vakarorogo tale tiko ga e dua na yalewa cakacaka e kea, ni lakovi tacida yani sa tuturu tu na wainimatana. A dau vuli iVolatabu tu e liu, qai vinakata me tekivu vuli tale.