E Bibi na Masu kei na Vakasama Vakatitobu Nida iTalatala Gugumatua
1. Na cava a vukei Jisu me dei tiko ga ena cakacaka bibi a talai mai kina?
1 A vakabulai ira na tauvimate o Jisu ena yakavi qai vakasavi ira tale ga na timoni. Nira kunei koya na nona tisaipeli ena siga tarava, era tukuna: “Era vaqarai kemuni na lewenikoro kece,” ena nodra vinakata me tomana na nona cakamana. Ia a dei tiko ga o Jisu ena cakacaka bibi a talai mai kina me vunautaka na itukutuku vinaka. A kaya: “Tou lako ina dua tale na vanua, ina veikoro voleka meu lai vunau tale ga kina, qo na vu ni noqu lako mai.” Na cava a vukei Jisu me dei tiko ga ena cakacaka qo? A yadra ena matakacaca me lai masu qai vakasama vakatitobu. (Mari. 1:32-39) Ena vukei keda vakacava na masu kei na vakasama vakatitobu meda italatala gugumatua?
2. Na cava eda na vakasamataka vakatitobu me vukea na noda gumatua tiko ga ena cakacaka vakaitalatala?
2 Na Cava mo Vakasamataka Vakatitobu? A raica o Jisu “nira vakaloloma ra qai sega ni kauaitaki tu” na lewenivanua “me vaka na sipi e sega na kena ivakatawa.” (Maciu 9:36) Eda uqeti tale ga meda vakasamataka vakatitobu na kena gadrevi mera rogoca na lewenivanua na itukutuku vinaka kei na lekaleka ni gauna sa vo. (1 Kor. 7:29) Eda na vakasamataka tale ga vakabibi na cakacaka i Jiova, nona itovo, na talei ni noda vakatokai meda iVakadinadina i Jiova, kei na iyau talei vakayalo eda vulica ena Vosa ni Kalou era se sega ni kila o ira ena noda yalava.—Same 77:11-13; Aisea 43:10-12; Maciu 13:52.
3. Na gauna cava eda rawa ni vakasama vakatitobu kina?
3 Na Gauna Cava Meda Vakasama Kina Vakatitobu? So era yadra ena matakalailai me vaka a cakava o Jisu ni se vakanomodi. So tale era cakava qo ena bogi ni bera nira moce. (Vkte. 24:63) Kevaka sara mada ga eda osooso e se rawa ga ni tiko na gauna meda vakasama kina vakatitobu. So era cakava qori nira vodo tiko ena dua na sala ni veilakoyaki. So tale era vakayagataka e dua na iwase ni nodra gauna ni vakasigalevu baleta nira vakasama vakavinaka kina. Levu era vakila nira vakasama vakatitobu ni bera nira lai vunau, ke mani gauna lekaleka sara mada ga, e dau vukei ira mera vosa ena doudou ra qai gumatua tale ga.
4. Na cava meda vakasama kina vakatitobu?
4 Ena talei cake sara na nodra qaravi Jiova kevaka eda dau masu qai vakasama vakatitobu, ena vukei keda tale ga meda raica noda qaravi Kalou me ka bibi duadua ena noda bula, qai vakaukauataki keda meda vunau tiko ga. A yaga vei Jisu, na iTalatala Uasivi duadua ni Kalou na vakasama vakatitobu, ena yaga tale ga vei keda.