Meda Dau “Veinanumi”

1. Na cava era vinakata tu e levu nikua?

¹ Sa qai levu ga nikua era vinakata mera kauaitaki, mera vukei tale ga. E levu era sega ni marau, era lomabibi ra qai yalolailai ni sa ca tiko ga na ituvaki e vuravura. Era vinakata e milioni mera vukei, e rawa gona vei keda na lotu vaKarisito meda vakaraitaka na yalo ni veikauaitaki dina vei ira tale eso. (Maciu 22:39; Kala. 6:10) Eda na vakaraitaka vakacava qori?

2. Na sala vinaka cava meda vakaraitaka kina na veinanumi?

² iVakaraitaki ni Veinanumi: Na Kalou duadua ga e ivurevure ni vakacegu tawamudu. (2 Kor. 1:3, 4) E uqeti keda o Jiova meda dau “veinanumi” me vakataki koya ga, qai lesi keda meda tukuna vei ira eso tale na itukutuku vinaka ni Matanitu ni Kalou. (1 Pita 3:8) Noda gumatua ena cakacaka qo e sala vinaka meda vakacegui ira kina e “ramusu na yalodra,” baleta na Matanitu ni Kalou e noda inuinui duadua ga na kawatamata, ni na vakaotia na noda rarawa. (Aisea 61:1) Ni kauaitaki ira na nona tamata o Jiova, sa vakarau kauta laivi na ca kece qai tauyavutaka e dua na vuravura vou ni yalododonu.—2 Pita 3:13.

3. Eda na vakatotomuria vakacava na rai i Jisu me baleti ira eso tale?

³ Vakatotomuria na Rai i Jisu: Ni dau vunau o Jisu vei ira na ilawalawa levu, a sega ni kauaitaki ira ga vakailawalawa. A kauaitaki ira yadudua, e kilai ira sara ga na gadreva tu na veika vakayalo. O ira qori era vaka na sipi e sega na kedra ivakatawa me dusimaki ira. E tarai Jisu sara ga na ka e raica, mani vakavulici ira ena levu ni nona lomani ira. (Mari. 6:34) Noda vakatotomuria na rai i Jisu me baleti ira eso tale, ena uqeti keda meda kauaitaki ira yadua sara ga. Ena vakavotui qori ena itautau ni noda vosa kei na irairai ni matada. Eda na vakaliuca na cakacaka vakavunau da qai veisautaka na ka eda tukuna me ganita na ka era kauai kina na tamata yadua.—1 Kor. 9:19-23.

4. Na cava meda veinanumi kina?

⁴ Era sa ciqoma tiko na itukutuku ni Matanitu ni Kalou e dua na isoqosoqo levu mai na veimatanitu, qai vakacegui ira na nodra kauaitaki. Nida vakaisulu tiko ga ena veinanumi, eda na rokova da qai vakamarautaka na noda Kalou dauveinanumi o Jiova.—Kolo. 3:12.