Kato ni Taro

◼ Ena vakatau ena cava na nomu solia na ivola?

Na ka bibi duadua meda nanuma tiko, me tataleitaki o koya e soli vua na ivola. Ke tataleitaki dina, eda rawa ni solia vua e rua na mekesini, dua na ivola, dua na brochure, se so tale na ivola eda dau solia. E rawa nida cakava qori ke da raica mada ga ni lailai se sega ni cautaka rawa e dua na ilavo me tokoni kina na noda cakacaka e veiyasa i vuravura. (Jope 34:19; Vkta. 22:17) Ia e vakamareqeti na noda ivola, eda na sega gona ni solia vei ira era sega ni taleitaka.—Maciu 7:6.

Eda na kila vakacava ni tataleitaki o taukeinivale? Na nona via veitalanoa kei keda e vakaraitaka ni tataleitaki. Ni vakarorogo nida vosa, sauma na noda taro qai tukuna na nona nanuma e vakaraitaka ni kauai ena veitalanoa. Na nona vakamuria na noda wilika na iVolatabu e vakaraitaka ni doka na Vosa ni Kalou. E vinaka tale ga meda dau tarogi taukeinivale ke na wilika na ivola. E dodonu mera lewa vinaka na dautukutuku mera kila kina ke tataleitaki e dua. Kena ivakaraitaki nida vunau ena salatu, e sega ni vinaka meda solia na mekesini, brochure, se ivola vei ira kece era tasivi. Ke da sega ni vakadeitaka ni tataleitaki e dua, e vinaka meda solia ga vua na tikidua.

Na ivola tale ga e taura ena ivavakoso e dua na dautukutuku ena vakatau ena veika e vinakata me vakayagataka ena nona cakacaka vakaitalatala, ena sega ni vakatau ena levu ni nona cau. Na cau e sega ni isau ni ivola, ia e tokoni kina na ka kece e vauca na noda cakacaka vakavunau e veiyasa i vuravura. Se mani vakacava na noda bula vakailavo, eda na marau ga ni tokona na veika e vauca na Matanitu ni Kalou da qai solika mai vu ni lomada. Eda na sega ni solia na ivovo ni ka e tu vei keda. (Mari. 12:41-44; 2 Kor. 9:7) Ena uqeti keda tale ga meda taura ga na ivola eda na vakayagataka, me kua ni lusi kina na ilavo e cautaki me baleta na ivola.

[Tikina bibi ena tabana 2]

Mera lewa vinaka na dautukutuku mera kila kina ke tataleitaki e dua