Vakatotomuria na iVakaraitaki i Jona
1. Na itovo vakasakiti cava a vakaraitaka o Jona?
1 Ni o rogoca na yacai Jona na parofita, na cava o vakasamataka? Eso era rairai nanuma ni turaga rerere o Jona se yalodredre. Ia a vakaraitaka ga ni yalomalumalumu, yaloqaqa qai dau vakuai koya. Eda rawa vakacava ni “vakatotomuria” na itovo vakasakiti i Jona?—Jeme. 5:10.
2. Eda na vakatotomuria vakacava na yalomalumalumu i Jona?
2 Yalomalumalumu: Eda kila ni a gole ena dua tale na vanua o Jona me drovaka kina na nona ilesilesi. E sega ni kidroataki qori baleta nira tamata voravora na kai Asiria, e kilai kina o Ninive me “koro dauvakadave dra.” (Neumi 3:1-3) E qai vakadodonutaki koya o Jiova. A ciqoma tale ena yalomalumalumu o Jona na ilesilesi a soli vua. (Vkai. 24:32; Jona 3:1-3) E cakava na loma i Jiova, dina ga ni a dro ena imatai ni gauna. (Maciu 21:28-31) Vakacava eda vakadeitaka tale ga meda vunautaka na itukutuku vinaka nida vakadodonutaki se dredre na cakacaka ena yalava?
3. Na basoga cava ni noda cakacaka vakaitalatala ena gadrevi kina na yaloqaqa kei na noda vakuai keda?
3 Yaloqaqa Qai Vakuai Keda: Ni kila o Jona ni rivarivabitaki na nodra bula na kaimua ena nona vakatulewa cala, a tu vakarau me soli bula ena vukudra. (Jona 1:3, 4, 12) Ni gole e Ninive me vakayacora na nona ilesilesi, a gole sara ena loma ni siti, de dua me raica e dua na vanua vinaka me kacivaka kina na veilewai i Jiova. Ena sega ni cakava ya na tamata rerere, ena cakava ga na parofita yaloqaqa ni Kalou! (Jona 3:3, 4) Vakacava o keda nikua? Me rawa nida vunau ena doudou nida tusaqati, ena vinakati me vakayaloqaqataki keda na Kalou. (Caka. 4:29, 31) E bibi meda vakuai keda me rawa nida vakayagataka na noda gauna kei na noda iyau ena cakacaka vakaitalatala.—Caka. 20:24.
4. Na cava meda dau vakananuma kina na nodra ivakaraitaki vinaka na parofita i Jiova?
4 Ni o wilika na kedra ivolatukutuku na parofita i Jiova, ena yaga ke o biuti iko ena kedra ituvaki. E vinaka mo taroga: ‘Na cava au na cakava? Au na vakatotomuria vakacava na nodra itovo vinaka?’ (Iper. 6:11, 12) Ena veivosakitaki eso tale na lesoni yaga eda rawa ni vulica vei ira na parofita yalodina i Jiova ena vica tale na ulutaga ni Noda Cakacaka Vakaitalatala.