Kato ni Taro

◼ Na ivakavuvuli vakaivolatabu cava e vauca na vakayagataki ni mobail ena soqoni vaKarisito kei na cakacaka vakaitalatala?

“Sa Dui Vagauna na ka Kecega.” (Dauv. 3:1): Na mobail e rawa nida vakauitukutuku se veivosaki kina ena gauna cava ga. Ia e tiko na gauna eda na sega ni vinakata kina na lotu vaKarisito me vakawelei keda na noda mobail. Kena ivakaraitaki, na soqoni e gauna ni noda sokalou vei Jiova, meda dusimaki kina vakayalo, meda veivakayaloqaqataki tale ga. (Vkru. 31:12; Same 22:22; Roma 1:​11, 12) Vakacava meda bokoca na noda talevoni nida gole ina soqoni, da qai waqaca tale ni sa oti meda raica kina na noda itukutuku? Ke tiko e dua na vuna bibi sara ga me kua ni boko kina na noda mobail, meda porokaramutaka ga me kua ni veivakasosani.

“Cakava na ka Kece ga ena Vuku ni iTukutuku Vinaka.” (1 Kor. 9:23): Ena so na gauna, ena yaga ena cakacaka vakaitalatala na mobail. Kena ivakaraitaki, na tacida e liutaka tiko na cakacaka ena rairai vakayagataka na mobail me qiriti ira na mataveitacini era cakacaka tiko ena dua tale na yasa ni yalava. Ena so na gauna era vakayagataka na dautukutuku na nodra mobail mera qiriti koya e tataleitaki se vuli iVolatabu ni bera nira sikovi koya, vakabibi ke yawa sara na vanua e tiko kina. Ke da kauta tiko na noda mobail, meda qarauna me kua ni vakataotaka na noda vosa vei ira na itaukeinivale. (2 Kor. 6:3) Nida waraki ira tiko eso tale na dautukutuku, e vinaka meda kua ni qiri se vakauitukutuku vei ira na noda itokani me rawa ni dei tiko ga na noda vakasama ena cakacaka vakaitalatala kei ira eda cakacaka vata.

Nanumi Ira Eso Tale. (1 Kor. 10:24; Fpai. 2:4): Me kua ni ulubale ni noda berata na soqoni ni cakacaka vakavunau na noda nanuma ni rawa nida qiri se vakauitukutuku vei ira na tacida meda kila kina na yalava ni vunau. Ke da bera yani, ena levu tale na veiveisau e caka vei ira sa wase rawa tu. Io, eda kila ni so na ituvaki eda sega ni lewa rawa ena rairai vakavuna ena so na gauna na noda bera. Ia nida vakamatauna meda dau totolo, eda vakaraitaka nida tokona na ituvatuva i Jiova, nida nanumi koya na tacida e liutaka na cakacaka, kei ira na tacida vakayalo.