O tu Vakarau mo Veisau?

1. Ni dau veisau na ituvaki kei vuravura, na cava ena vinakati vei keda?

¹ Ena 1 Korinica 7:31, e vakatauvatani kina na vuravura ina dua na buturara e caka tiko kina na drama, qai veiveisau tiko na ituvaki e yaco, era veiveisau tale tiko ga o ira na vakaitavi kina. Ni veisau gona na ka e dau yaco e vuravura, ena vinakati tale ga meda veisautaka na iwalewale ni noda vunau, noda ituvatuva kei na sala meda torovi ira kina na tamata. Vakacava o tu vakarau mo veisau?

2. Me rawa nida toso vata tiko kei na isoqosoqo i Jiova, cava e bibi kina meda tu vakarau ni veisau?

² Nomu iWalewale ni Vunau: E dau yalorawarawa na ivavakoso vaKarisito. Ni talai ratou nona tisaipeli o Jisu ena imatai ni gauna, a kaya me ratou kua ni tawana na taga ni kakana se taga ni ilavo. (Maciu 10:9, 10) Ia e muri ni vakasamataka na veika dredre ratou na sotava nona tisaipeli kei na rabailevu ni nodratou cakacaka vakavunau ena so tale na yalava, a veisautaka kina o Jisu na ivakasala ya. (Luke 22:36) Ena senitiuri sa oti, sa dau vakayagataka voli mai na isoqosoqo i Jiova na veimataqali iwalewale ni vunau me vaka na ivunau tabaki, walesi, kei na motoka vakasipika, e vakayagataki qori ni veiganiti ena gauna ya. Nikua, levu era sega ni dau tiko e vale, sa vakabibitaki kina meda dau vunau tawalokuci se vunau e matanalevu me ikuri ni noda vunau e veivale. Eda dau uqeti tale ga meda vunau e veivale ena yakavi nira dau cakacaka ena siga na itaukeinivale. Ni dau veisau na vanua e gole kina na qiqi vakalomalagi i Jiova, vakacava o dau veisau tale ga?​—Isik. 1:20, 21.

3. Ena yaga vakacava ena noda yalava noda tu vakarau meda veisau?

³ Na ka mo Tukuna: Na cava era dau kauaitaka vakalevu o ira na tiko ena nomuni yalava? Na bula vakailavo? Vuvale? iValu? Ena yaga sara ke da kila vinaka na leqa e yaco tiko, kei na ituvaki e sotavi vakalevu ena noda yalava me rawa ni ganiti ira na noda ivakamacala. (1 Kor. 9:20-23) Nira talaucaka tiko na lomadra na itaukeinivale, meda kua ni totolo wale ga nida duavata kei koya da qai tomana tale na ivakamacala eda vakarautaka voli mai, ia ena vinaka sara ke da tu vakarau ni veisau da qai veivosakitaka sara ga na ka era kauaitaka.

4. Na cava me totolo kina na noda veisau?

⁴ Sa voleka sara qo me cava na ituvaki kei vuravura, me qai tekivu na veivakararawataki levu. “E sa vakalekalekataki na gauna se vo.” (1 Kor. 7:29) E bibi dina me totolo na noda veiveisau me rawa nida cakava kina e levu na ka ni lailai na gauna sa vo!