Me Levu na Gauna mo Vakacaucautaki Jiova Kina
1. Na ituvatuva vou cava ena vukei keda meda ‘vakacaucautaki Jiova kina vakalevu’?
1 Sa tauyavutaki ena vula o Maji e dua na ituvatuva vou. Qori nodra rawa ni vakayagataka na dautukutuku e 30 na aua mera painia veivuke kina ena vula o Maji, Epereli kei na vula ni nona veisiko na ivakatawa ni tabacakacaka. Ke kovuta na veisiko e vica na siga mai na dua na vula kei na vica na siga ni dua tale na vula, ena lewa o koya e via painia veivuke se na vula cava vei rau qori me rawata kina e 30 na aua. Ena gauna ni veisiko, e rawa nira tiko tale ga ena nodra bose na painia tudei kei na painia lavotaki me yacova ni oti. Koya gona, ke da nanuma ni dredre meda rawata e 50 na aua, eda se rawa ga ni ‘vakacaucautaki Jiova vakalevu’ ena noda painia veivuke vakava ena dua na yabaki, qori meda rawata ga e 30 na aua.—Same 109:30; 119:171.
2. Na cava era na marautaka o ira era painia veivuke ni veisiko na ivakatawa ni tabacakacaka?
2 Ni Veisiko na iVakatawa ni Tabacakacaka: Sa na rawa qo mera painia veivuke e levu ena veisiko ni ivakatawa ni tabacakacaka, ra qai marautaka na veivakayaloqaqataki ena cakacaka vakaitalatala. (Roma 1:11, 12) Era na rairai tuvanaka e levu na painia veivuke mera cegu mai na nodra cakacaka saumi ena dua na siga mera cakacaka vata kei koya. O ira na painia veivuke era cakacaka saumi ena loma ni macawa, e rawa nira kerea mera cakacaka kei na ivakatawa ni tabacakacaka ena Vakarauwai se Sigatabu. Ena uqeti ira tale ga na painia veivuke na nodra bose kei ira na painia tudei kei ira na painia lavotaki!
3. Na cava e gauna vinaka kina ni painia veivuke na vula ni iVakananumi?
3 Maji kei na Epereli: O ira era painia veivuke ena yabaki sa oti, oya nodra painia ena gauna ni iVakananumi nira vakayagataka e 30 na aua, e rawa nira vakaruataka na nodra “isoro ni veivakacaucautaki”! (Iper. 13:15) E vula vinaka o Maji kei Epereli meda vakalevutaka kina noda cakacaka vakaitalatala nida painia veivuke. Eda marautaka na gauna va qori e veiyabaki nida dau veisureti kina ena iVakananumi. Nida vakalevutaka na noda cakacaka vakaitalatala ena gauna ni iVakananumi, ena rawa ni veiveisau na dautukutuku eda cakacaka vata. Ni oti na iVakananumi, eda na lesuvi ira era tataleitaki, da qai uqeti ira mera gole tale mai ena ivunau lavotaki. Vakacava e gu na lomamu mo vakayagataka na ituvatuva qori mo painia veivuke kina?—Luke 6:45.