iWalewale Vou ni Vunau e Matanalevu
1. Era ivakaraitaki vinaka vakacava na lotu vaKarisito ena imatai ni senitiuri?
1 Era sega wale ga ni vunau e veivale na lotu vaKarisito ena imatai ni senitiuri. Era dau vunau tale ga e matanalevu. (Caka. 20:20) Kena ivakaraitaki, era dau gole ena valenisoro, nira kila nira tu kina e levu na tamata. (Caka. 5:42) Ena gauna a tiko kina e Aceni na yapositolo o Paula, a dau vunau e veisiga vei ira na tu ena makete. (Caka. 17:17) Nikua, dua na sala bibi eda vakatetea tiko ga kina na itukutuku vinaka oya na noda vunau e veivale. Ia eda dau vunau tale ga ena ikelekele ni motoka, vanua ni bisinisi, vanua ni gade, gaunisala osooso, kei na so tale na vanua era tu kina na tamata. Eda uqeti kece na dautukutuku meda dau vunau e matanalevu, e levu era na rawa ni vunau e matanalevu nira vakayagataka e rua na iwalewale vou.
2. Na cava a vakatovolei ena Noveba 2011?
2 Vunau Lavotaki e Matanalevu ena Siti: E ripotetaki ena Yearbook ni 2013 ena tabana e 16 kei na 17, ni a vakayagataki e dua na iwalewale vou ni vunau e matanalevu ena korolevu o Niu Yoka ena Noveba 2011. Era dau biu na teveli kei na qiqi era tuvai tu kina vakamatau na ivola ena vica na vosa ena vanua veiganiti ena siti, qo ena vanua era dau tavali vakalevu kina na tamata. Ena veisiga era na tavali kina e udolu vakacaca na tamata, wili kina o ira na vakaitikotiko ena tabavale e dredre me tarai kei ira era sega ni dau tiko vakalevu e vale. E dua na iwiliwili levu era taleitaka na noda ivola. Ena loma ga ni dua na vula, e soli kina e 3,797 na mekesini kei na 7,986 na ivola. E levu era kerea mera vulica na iVolatabu, ya sara ga na inaki ni iwalewale qori. Ke dua gona na tataleitaki e solia nona naba ni itikotiko, ena vakau totolo sara ena ivavakoso e dodonu me qarava me rawa ni sikovi na tataleitaki ya ena nona vale.
3. Sa vakarabailevutaki vakacava na vunau lavotaki e matanalevu?
3 Na vuavuaivinaka ni cakacaka qori, sa na caka tale ga kina na vunau lavotaki qo ena siti lelevu e veiyasa i vuravura. Na valenivolavola ni tabana ena lewa se siti cava me caka kina na iwalewale ni vunau qo. E dodonu me siti e levu kina na sala ni veitosoyaki, levu kina na ofisi kei na vale tabavica ra qai veitosoyaki vakalevu kina na lewenivanua. Ena veitaratara na valenivolavola ni tabana vei ira na ivavakoso era na vakaitavi, era dusimaki tale ga ena ka me caka. Era na vakayagataki vakalevu na painia tudei kei na painia lavotaki, ia ena so na vanua era na vakaitavi tale ga kina na painia veivuke.
4. Ena caka vakacava na vunau lavotaki ena siti?
4 iWalewale ni Vunau Qo: O ira na vakaitavi ena vunau lavotaki e matanalevu ena siti era na dau waraka me gole mai e dua ena teveli era vakarautaki tu kina na ivola. Ni yaco yani e dua, ena sureti me taura na ivola e taleitaka. Era na sauma mai na iVolatabu na painia na nodra taro. Ke taura e dua na ivola, era na sega ni tukuna vua na painia na cau e dau soli. Ia ke vakataroga se vakailavotaki vakacava na noda cakacaka, e rawa ni tukuni vei ira mera vakauta na nodra cau ena itikotiko e tabaki toka ena ivola. Ke rawa, me taroga tale ga na painia: “Vakacava o ni taleitaka me dua e sikovi kemuni yani e vale?” se “O ni kila tiko ni o ni rawa ni vulica wale na iVolatabu ni vakayagataki na ivola qori?”
5. Erau marautaka vakacava e dua na veiwatini na iwalewale vou ni vunau qo?
5 E marautaki dina na vakaitavi ena iwalewale ni vunau qo. E vola e dua na veiwatini: “E uqeti keirau sara ga na neirau duri tu ena yasa ni teveli qai vakaraici ira na vica na udolu na tamata era tavali e veisiga kei na sasaga levu e caka tiko mera tarai na tamata kece e veiyasai vuravura. Neirau dau raica na levu ni tamata era tavali, keirau vakasamataka tale ga na sala e kauaitaki ira yadua kina o Jiova, qori e vakaukauataki keirau sara ga me keirau vakaliuca ena neirau bula na cakacaka vakavunau. Vaka ga keirau raitayaloyalotaka tu nona dikeva tiko o Jiova na lomadra na tamata kece era tavali ena yasa ni teveli, ena nona qarai ira tiko era yalomalumalumu. Keirau vakila sara ga na neirau veivolekati kei ira agilosi, na neirau itokani vakacakacaka.”
6. (a) Na cava e dua tale na iwalewale vou ni vunau era sa tuvanaka e levu na ivavakoso, e duidui vakacava mai na iwalewale ni vunau lavotaki e matanalevu ena siti? (b) E rawa nira veitokoni vakacava na ivavakoso ena vunau e matanalevu?
6 Vunau e Matanalevu e Tuvanaka na iVavakoso: Me ikuri ni vunau lavotaki e matanalevu e dau caka ena siti, e dua tale na iwalewale vou ni vunau era sa tuvanaka e levu na ilawalawa qase ni ivavakoso ena nodra dui yalava. Ena iwalewale vou qo, era na vakayagataka na dautukutuku e dua na teveli e vakarautaki tu kina na noda ivola ena vanua era tavali vakalevu kina na tamata, ia qo me caka ga ena nodra dui yalava na ivavakoso. E duidui na iwalewale qo mai na iwalewale ni vunau lavotaki ena siti. Na vunau lavotaki ena siti era vakaitavi kina e levu na ivavakoso nira gole ina dua na vanua osooso ena siti e digia na valenivolavola ni tabana.—Raica na kato “Bibi na Veitokoni.”
7. Ke veiganiti na ituvaki, era na tuvanaka vakacava na qase na cakacaka vakavunau e matanalevu?
7 Era na dikeva na qase ke tiko eso na vanua ena nodra yalava era osota vakalevu na tamata, mera vakatulewataka tale ga ke veiganiti me tuvanaki me caka kina na vunau e matanalevu. E vanua vinaka e rawa ni duri kina e dua na teveli se qiqi ni ivola oya na vanua ni vakavodo, vanua se rara ni gade, gaunisala osooso, vale levu e tiko kina e vica na sitoa, univesiti, rara ni waqavuka, kei na vanua e dau caka kina na soqo e veiyabaki. Ena yaga ke dau dua tiko ga na vanua, siga kei na gauna e biu kina na teveli. E laurai ni teveli e duri ena vale levu e tiko kina e vica na sitoa e dau vuavuaivinaka cake mai na kena e biu ena dua ga na sitoa levu, nira dau kauaitaka ga na lai volivoli na ka era gadreva nira lako ena sitoa qori. Eso na vanua me vaka na vanua osooso e dau taubaletaki, ena rairai yaga kina na qiqi lalai era tuvai tu kina na ivola. E rawa nira rai na qase ena noda Web site me download mai kina eso na files me baleta na kena dau tuvai na noda Vale ni Vakatawa, na Yadra! kei na ivola Kaya na iVolatabu. Na files qori e vakarautaki vakatabakidua sara ga me baleta na vunau e matanalevu. O ira na vakaitavi kina era na vakatotomuria ga na iwalewale era cakava o ira na vakaitavi ena vunau lavotaki e matanalevu ena siti, era na muria tale ga vakavoleka na nona veidusimaki na ivakatawa ni cakacaka. Ke ra ciqoma na naba ni itikotiko e dua na tataleitaki e sega ni tiko ena nodra yalava, e dodonu mera vakalewena totolo sara na fomu na Please Follow Up (S-43) qai solia sara vua na vunivola.
8. Ke sega ni tuvanaki ena ivavakoso na vanua me caka kina na vunau e matanalevu, eda rawa vakacava ni se vunau tiko ga e matanalevu?
8 Vunau e Matanalevu ni o Cakacaka Vakaitalatala: Eso na ivavakoso ena rairai sega ni tiko ena nodra yalava na vanua era dau tavali vakalevu kina na tamata, sega kina ni rawa me dua na teveli se dua na qiqi me tuvai tu kina na noda ivola. Ia ena vinakati vei ira na dautukutuku ena ivavakoso qori mera dau vunau tale ga e matanalevu ena nodra cakacaka vakaitalatala. Vakacava e tiko ena nomu yalava e dua na vanua ni volivoli se dua na sitoa era dau volivoli kina e levu? E tiko e dua na vanua ni gade era dau osota na tamata? E tiko e dua na vanua e dau caka kina vakalevu na soqo? Ke tiko, o na rawa ni marautaka na nomu vunau e matanalevu ena vanua qori.
9. Na cava meda dau vunau kina vei ira na tamata ena vanua cava ga eda sotavi ira kina?
9 E nona inaki o Jiova “me bula na veimataqali tamata kece, mera kila tale ga na ka dina.” (1 Tim. 2:4) Koya gona, eda na saga meda vakasavuya na itukutuku ni Matanitu ni Kalou vei ira e levu ni bera na icavacava. (Maciu 24:14) E levu na vanua e dau dredre meda sotavi ira na tamata ena nodra vale. Ia e rawa nida vosa vei ira ena vunau e matanalevu. De dua na vunau e matanalevu e sala duadua ga e rawa nira rogoca kina eso na itukutuku vinaka. Koya gona, meda vakacavara sara na noda cakacaka vakaitalatala ena noda vunau vei ira na tamata ena vanua cava ga eda sotavi ira kina.—2 Tim. 4:5.
[Kato ena tabana 5]
Bibi na Veitokoni
E laurai ni vica na ivavakoso voleka era dau vunau e matanalevu ena dua tiko ga na gaunisala, era vunau vata ena kelekele ni motoka, na yalava ni bisinisi se vanua ni vakavodo. E laurai tale ga nira dau biuta na dautukutuku mai na duidui ivavakoso na mekesini ena dua tiko ga na vanua ni wawa, se na dua tiko ga na vanua e dau sava kina na isulu e saumi, era vunau tale ga ena dua tiko ga na vanua ni bisinisi. Qo e dau vakacudrui ira na daunibisinisi kei ira na vakaitikotiko e kea, dina nira sega ni vunau vata na dautukutuku ena dua ga na gauna. Koya gona, e vinaka meda dau vunau ga e matanalevu ena noda yalava ni ivavakoso.
Ke so na dautukutuku era via vunau e matanalevu ena yalava ni ivavakoso voleka, e dodonu mera vakaraitaka qori vua na nodra ivakatawa ni cakacaka. Sa na qai veitaratara kei na ivakatawa ni cakacaka ni ivavakoso e nodratou na yalava qori ni bera nira lai tara na vanua ya na lewe ni nona ivavakoso. Ke ra lesi ena yalava qori na ivavakoso e duidui vosa, mera veivosaki rawa na ivakatawa ni cakacaka ena ivavakoso kece qori me kua kina ni veivakasosani na noda cakacaka vei ira na tiko ena yasayasa qori. Nida veitokoni, ena ‘rakorako, ena tuvanaki tale ga vakamatau’ na ka kece.—1 Kor. 14:40.
[iYaloyalo ena tabana e 6]
[iYaloyalo ena tabana e 6]