Vukei Ira na se Sega ni Ganiti Ira na Kaya na iVolatabu
1. Vakacava era na taleitaka kece na lewenivanua na ivola na Kaya na iVolatabu? Vakamacalataka.
1 Me rawa ni dauveiqaravi ni Kalou e dua, e dodonu me vulica na ka e kaya na iVolatabu. Ia eso era sega ni lotu vaKarisito, era sega ni vakabauta me Vosa ni Kalou na iVolatabu. So tale era sega sara ga ni vakabauta na Kalou ra qai sega ni doka na iVolatabu. Ia na cava eda rawa ni vakayagataka vei ira era sega ni taleitaka ena imatai ni gauna na ivola Kaya na iVolatabu? Ena veivosakitaki tiko na nodra ivakamacala na dautukutuku mai na 20 na vanua.
2. Ke dua e tukuna ni sega ni vakabauta na Kalou, na cava meda saga meda kila, cava e bibi kina qori?
2 Ira na Sega ni Vakabauta na Kalou: Ke dua e kaya ni sega ni vakabauta na Kalou, ena yaga meda kila na vuna e va kina qori nona rai. Vakacava e va qori nona rai baleta ni vakabauta na bula vakaidewadewa? Sa sega beka ni vakabauta na Kalou ena vuku ni veika tawadodonu e vuravura se na veivakaisini i lotu? Vakacava e cavutu mai na dua na vanua e vakatabui kina na qaravi Kalou? De dua e sega sara ni cakitaka ni bula dina tiko na Kalou, ia e sega ga ni tiko e dua na vuna me vakabauta kina na Kalou. Era raica e levu na dautukutuku ni nodra taroga qo, “E dau va tu ga qori nomuni rai?” e rawa kina nira vakamacala na itaukeinivale. Vakarorogo qai kua ni vosa takoso. Nida sa kila na vuna e sega ni vakabauta kina na Kalou e dua, eda na qai kila na ka meda tukuna kei na ivola meda solia.—Vkai. 18:13.
3. Eda na vakaraitaka vakacava nida dokai ira na itaukeinivale kei na nodra vakabauta?
3 Ni o sauma tiko nodra taro, qarauna me kua ni laurai ena nomu vosa ni o vakalewa nona ivakarau ni rai. Qo na vakatutu mai Merika: “E bibi meda doka na nodra dodonu na tamata yadua, vakabibi ena ka e vauca nodra vakabauta. Eda na sega ni saga meda usuraka noda nanuma me rawa nira duavata kei keda, e vinaka meda taroga eso na taro me rawa kina ni vakasama o itaukeinivale, me lewa vakataki koya se cava e dodonu me caka.” Ni rogoca oti e dua na ivakatawa dauveilakoyaki nona talaucaka na lomana e dua na itaukeinivale, e dau taroga lesu, “Vakacava o bau vakasamataka tu ni rawa ni yaco qori?”
4. Eda na vukei ira vakacava era lotu Buddha?
4 Levu era lotu Buddha e ka vou vei ira na veika e baleta na Kalou. So na dautukutuku e Peritania era taleitaka mera vakayagataka vei ira qori na brochure Lasting Peace and Happiness—How to Find Them. Ni veivosakitaki oti na ikau, era na dikeva sara na ulutaga “Is There Really a Most High Creator?” kei na “A Guidebook for the Blessing of All Mankind.” Ni oti qori, sa rawa nira vakayagataka na Kaya na iVolatabu ra qai tukuna vei ira na itaukeinivale, “Ke o sega mada ga ni vakabauta na Kalou, ena vukei iko nomu vulica na iVolatabu ni tiko kina e levu na ivakasala yaga.” Dua na tacida mai Merika e veiqaravi tiko ena ivavakoso vakaJaina, e kaya: “Levu ena yalava era taleitaka na wilivola. Era dau wilika kece na lewenivola ni bera ni keitou lesu yani. Ia era na rairai sega ni kila na veika e vauca na vuli iVolatabu. Au dau taleitaka gona meu solia na brochure na iTukutuku Vinaka ena imatai ni gauna baleta ni volai sara ga me uqeta na veivosaki.” E tukuna e dua na ivakatawa ni tabacakacaka e veiqaravi tiko ena vosa vakaJaina e Merika, ni rawa ni vakayagataki na Kaya na iVolatabu ena imatai ni gauna. Ia ena rairai veiganiti me tekivu na vuli ena wase 2 ni vakamacalataki kina na iVolatabu, me kua na wase 1, ni vakamacalataki kina na Kalou.
5. Na cava e bibi kina na vosovoso?
5 E taura na gauna me qai tekivu vakabauta na Kalou e dua, ena vinakati kina na vosovoso. Nida veivosaki ena imatai ni gauna kei na dua, ena rairai sega ni uqeti koya me vakabauta ni bula dina tiko e dua na Dauveibuli. De dua ni toso na gauna ena lai nanuma ni rawa qori, se ena rairai tukuna ni sa kila na vuna e va kina ya nodra vakabauta eso.
6. Na cava era na rairai sega ni kauaitaka kina na iVolatabu eso?
6 Ira na Sega ni Kauai se Sega ni Vakabauta na iVolatabu: E levu era rairai vakabauta ni tiko na Kalou, ia era sega ni kauaitaka na ivakavuvuli vakaivolatabu nira sega ni vakabauta me Vosa ni Kalou. De dua e tiko ena vanua e sega kina na lotu vaKarisito, qai raica ni sema vei Lotu ni Veivanua vaKarisito na iVolatabu. Se rairai vakaitikotiko ena vanua era tiko kina na lotu vaKarisito, ia e sega ni kauaitaki vakalevu kina na ka vakayalo, ena rairai nanuma ni sega ni yaga vua na iVolatabu. Eda na vukei ira vakacava mera tekivu taleitaka na iVolatabu ra qai lai vulica sara na ivola Kaya na iVolatabu?
7. Na cava e dua na sala vinaka meda uqeti ira kina na lewenivanua mera kauaitaka na iVolatabu?
7 E ripotetaki ena valenivolavola ni tabana e Kirisi: “Na sala vinaka duadua meda vukei ira kina era sega ni dau kauaitaka na iVolatabu oya meda vakayagataka na iVolatabu da qai vakaraitaka vei ira na ka e volai tu kina. Era raica e levu na dautukutuku ni uqeta vakalevu na lomadra na tamata na itukutuku ena Vosa ni Kalou, sega so ena ka era tukuna. (Iper. 4:12) Na nodra raica na yaca ni Kalou ena iVolatabu e uqeti ira e levu mera rai ina iVolatabu.” E vola na valenivolavola ni tabana e Idia: “Levu na lotu Idu era dau kauaitaka na ka dina me baleta na bula kei na mate, vaka kina na yalayala ni iVolatabu me baleta na vuravura ena sega kina na veivakaduiduitaki vakamatamata.” Nira vakamacalataka na dautukutuku na leqa e tarai keda tiko, ena rawa kina nira vakaraitaka na ka e tukuna na iVolatabu me baleta na Matanitu ni Kalou me walia kina na leqa kece qori.
8. Na cava eda rawa ni kaya vua e dua e dau raica vakatani na iVolatabu ena vuku ni ka e cakava o Lotu ni Veivanua Vakarisito?
8 Ke dua e dau raica vakatani na iVolatabu ena vuku ni ka e cakava o Lotu ni Veivanua Vakarisito, mo vakamatatataka vua ni o Lotu ni Veivanua Vakarisito e vakatanitaka na iVolatabu kei na kena ivakavuvuli. E vola na valenivolavola ni tabana e Idia: “Eso na gauna ena vinakati me keimami vakamacalataka vei ira na lewenivanua ni sega ni lewa na iVolatabu na veimatalotu.” Era ripotetaka tale ga nira dau taleitaka na Idu na wase 4 ni brochure What Is the Purpose of Life? How Can You Find It?, e vakamacalataki kina na sala era saga kina na veimatalotu mera vakatanitaka ra qai vakarusa na Vosa ni Kalou. Dua na painia e Brazil e dau tukuna vei ira na lewenivanua: “Vakacava moni vulica eso tale na ka e vakamacalataki ena iVolatabu? E levu era sa cakava tiko qori ia era sega ga ni via lewena e dua na lotu. O na rairai kurabuitaka na ka o vulica.”
9. Na cava meda kua kina ni yalolailai ke sega ni kauaitaka e dua ena imatai ni gauna na ivakavuvuli vakaivolatabu?
9 O Jiova e raica na ka e tu e lomada. (1 Sam. 16:7; Vkai. 21:2) E vagolei ira tiko mai na yalomalumalumu ina sokalou dina. (Joni 6:44) E levu vei ira qori era se sega vakadua ni vakavulici ena dua na ka me baleta na Kalou se lailai ga na ka era kila me baleta na iVolatabu. Noda cakacaka vakaitalatala e rawa ni vakavuna mera ‘vakabulai ra qai mai kila na ka dina.’ (1 Tim. 2:4) Koya gona, kua ni yalolailai ke so era sega ni kauaitaka ena imatai ni gauna na ivakavuvuli vakaivolatabu! Vakayagataka e dua na ivola ena nomu vosa mo uqeta e dua me rawa ni tataleitaki. De dua ni toso na gauna o sa na rawa ni vakayagataka na ivola eda dau caka vuli iVolatabu kina, Na Cava Sara Mada e Kaya na iVolatabu?
[iYaloyalo ena tabana 4]
Ke tukuna e dua na itaukeinivale ni sega ni vakabauta na Kalou, tovolea mada qo:
• Taroga, “Vakacava e dau va tu ga qori nomuni rai?” mo rawa ni kila kina na vuna.
• Ke lotu Buddha, vakayagataka na brochure Lasting Peace and Happiness—How to Find Them, ena tabana e 9-12.
• Ke vakabauta na bula vakaidewadewa, qo eso na ulutaga ena rawa ni vevuke:
Na Yadra! ena ulutaga “Buli se Bula Vakaidewadewa?”
Na vidio The Wonders of Creation Reveal God’s Glory
Na brochure na Satisfying Life—How to Attain It, wase 4; Was Life Created?; kei na The Origin of Life—Five Questions Worth Asking
• Ke sa sega ni vakabauta na Kalou e dua ena vuku ni veika tawadodonu e yaco se veika rarawataki, qo na ivola e rawa ni vakayagataki:
Na ivola Is There a Creator Who Cares About You?, wase 10
Na brochure Does God Really Care About Us?, wase 6, kei na What Is the Purpose of Life?, wase 6
• Dewa totolo sara ina ivola Kaya na iVolatabu ena gauna ga e vakabauta kina na itaukeinivale ni rairai bula dina tiko na Kalou. Ena rairai vinaka me tekivu na vuli ena wase 2 se dua tale na ulutaga e veiganiti kei itaukeinivale.
[iYaloyalo ena tabana 5]
Tovolea mada qo ke sega ni vakabauta na iVolatabu na itaukeinivale:
• Dikeva na wase 17 kei na 18 ena ivola Life—How Did It Get Here? By Evolution or by Creation?
• Vei ira na lotu Idu, vakayagataka na brochure Why Should We Worship God in Love and Truth?
• Vei ira na Jiu, vakayagataka na brochure Will There Ever Be a World Without War?, tabana e 3-11.
• Vakamacalataka na yaga ni kena muri na ivakavuvuli vakaivolatabu. Qo na ivola o rawa ni vakayagataka mo vakaraitaka kina vua e dua na yaga ni ivakavuvuli vakaivolatabu:
Na Yadra! ena ulutaga “iVakasala ina Vuvale”
Na vidio The Bible—Its Power in Your Life
Na brochure iTukutuku Vinaka Mai Vua na Kalou!, lesoni 9 kei na 11; Noda iVola Kece, tabana e 22-26; kei na brochure A Satisfying Life—How to Attain It, wase 2
Vei ira na lotu Buddha, vakayagataka na brochure The Pathway to Peace and Happiness, tabana e 3-7.
Vei ira na Musilimi, vakayagataka na brochure Real Faith—Your Key to a Happy Life, wase 3.
Ke o vunau ena yalava e sega ni taleitaki kina na iVolatabu, ena rairai vinaka me kua ni cavuti na tikinivolatabu kei na vanua e kau mai kina, me qai cavuti ga ni sa oti e vica na veisiko.
• Vakamacalataka na sala sa vakayacori tiko kina na parofisai vakaivolatabu. Qo na ka e rawa ni vakayagataki:
Na vidio The Bible—Accurate History, Reliable Prophecy
Na brochure Noda iVola Kece, tabana e 27-29
• Ke sa tekivu taroga na ivakavuvuli vakaivolatabu me baleta eso na ulutaga, qori na gauna mo dewa totolo kina ena ivola Kaya na iVolatabu.
[iYaloyalo ena tabana 6]
Ke tukuna na itaukeinivale: “Au sega ni vakabauta na Kalou,” o rawa ni kaya:
• “Rawa niu vakamacalataka vakalekaleka na ka e uqeti au meu vakabauta ni tiko e dua na Dauveibuli?” Oti qai vakamacalataka eso na tikina mai na ivola na Reasoning, tabana e 84-86, se tuvanaka mo solia vua e dua na ivola o dau taleitaka mo wilika.
• “Ia ke tiko e dua na Kalou, na itovo cava o na vinakata vua?” E levu na itaukeinivale era dau kaya nira via qarava na Kalou dauloloma, lewadodonu, vosovoso vakadede qai sega ni veivakaduiduitaki. Oti qori vakaraitaka mai na iVolatabu ni tiko vua na Kalou na itovo va qori. (Ena rawa sara ga ni vakayagataki na wase 1 ni Kaya na iVolatabu, me tekivu ena parakaravu 6.)
Ke tukuna na itaukeinivale: “Au sega ni vakabauta na iVolatabu,” o rawa ni kaya:
• “Levu e va qori nodra rai. Eso era nanuma ni iVolatabu e sega ni ivola vakasaenisi se sa madra na kena ivakavuvuli. Vakacava o sa bau wilika na iVolatabu? [Waraka me sauma. Vakaraitaka sara vua na ikau ena tabana e 3 ena brochure Noda iVola Kece, qai solia sara vua.] Levu era sa sega ni nuitaka na iVolatabu baleta ni sa vakatanitaka o lotu na kena ivakavuvuli. Ena dua tale na gauna, daru qai veivosakitaka e dua na ivakaraitaki ena tabana e 4 kei na 5.”
• “Levu e va tale ga qori nodra rai. Rawa niu vakaraitaka vei iko e dua na ka au qoroya me baleta na iVolatabu? [Wilika Jope 26:7 se Aisea 40:22, e vakamacalataki kina ni iVolatabu e dau volatukutukutaka donu na veika vakasaenisi.] E volai tale ga ena iVolatabu na ivakasala vuku e rawa ni yaga ina vuvale. Ena dua tale na gauna daru qai veivosakitaka e dua na kena ivakaraitaki.”
• “Vinaka ni o tukuna mai qori. Ke vola na Kalou e dua na ivola vei keda na kawatamata, na cava mada o nanuma ni dodonu me laurai ena ivola qori?” Oti vakaraitaka sara vua e dua na ka ena iVolatabu ena duavata kei na nona isaunitaro.