Vuli Vei Ira na Dautukutuku Matua

Eda dokai ira vakalevu na dautukutuku matua ena ivavakoso. Eso sa dede sara toka nodra yalodina voli mai. So vei ira sa maqosa sara ena cakacaka vakaitalatala. Era sa raica votu na veidusimaki i Jisu ena ivavakoso vaKarisito ena iotioti ni veisiga qo, ena kena vakarabailevutaki na vunau kei na veivakatisaipelitaki. (Maciu 28:19, 20) Nodra vakaitavi ena cakacaka qo, e soli kina vei ira “na kaukaua e uasivia na kaukaua ni tamata” mera vosota kina na ituvaki dredre. (2 Kor. 4:7) Levu na ka eda rawa ni vulica vei ira na dautukutuku matua. Era dau marautaka mera vakavulica na ka era dau vulica. (Same 71:18) Meda vuli gona vei ira. Ena rawa vakacava?

Ena Cakacaka Vakaitalatala. Me rawa ni vuavuaivinaka nodra cakacaka vakaitalatala na dautukutuku vou kei ira na dautukutuku era sega ni matau ena cakacaka, ena vinakati mera vakavulici. E rawa nira vuli vakalevu vei ira na dautukutuku matua ena iwalewale ni nodra vunau. (Raica na ulutaga ni Vale ni Vakatawa ni Feperueri 15, 2015, “Gumatua Tiko ga ena Vunau,” ena ikatolu ni parakaravu ena ulutaga lailai “Vukei Ira na Dautukutuku Vou.”) E yaga vakacava nomu cakacaka kei ira na dautukutuku qo?

Vakacava mo sureta e dua na dautukutuku maqosa mo drau cakacaka vata? Ke tautauvimate se malumalumu na dautukutuku matua qori, o rawa ni lai caka vuli iVolatabu ena nona vale. Ni oti na vuli, kerei koya ke raica eso na ka ena nomu veivakavulici mo vakavinakataka.

Dau Veimaliwai kei Ira: Saga mo kilai ira na dautukutuku matua ena nomu veimaliwai kei ira. Sureta e dua ena nomudou sokalou vakavuvale qai vakatarogi koya. Ke tautauvimate se malumalumu, rawa ni caka na sokalou vakavuvale ena nona vale. Taroga se mai kila vakacava na ka dina. Na veivakalougatataki cava e vakila? Na toso cava e raica ena noda vanua? Na cava e marautaka ena nona qaravi Jiova?

Me tiko vei keda na rai donu da qai kua ni namaka vakasivia vei ira na ka. Me vakataki keda ga, e duidui nodra isolisoli se na ka era vinaka kina na dautukutuku matua ena cakacaka vakaitalatala. (Roma 12:6-8) So sa qase sara qai vakaiyalayala na gauna e rawa nira vakayagataka kei keda. Ia eda se rawa tiko ga ni vuli vakalevu ena nodra yalodina ni qaravi Jiova.