Kato ni Taro

◼ E dodonu meda vakayagataka na Internet meda vunau se vakavulica e dua eda sega ni kila mai na dua tale na vanua?

Eso na dautukutuku era vakayagataka na Internet mera caka vuli iVolatabu ena vanua e vakatabui kina na noda cakacaka se lailai ga na dautukutuku. Ena so na ituvaki e dau yaga na iwalewale qo. Ia e rerevaki ke dua na dautukutuku e imeli se vakayagataka na chat room me veivosaki kei na dua e sega ni kila. (Raica na Noda Cakacaka Vakaitalatala ni Julai 2007 t. 3.) De dua eda vinakata mera kila na yalomalumalumu na itukutuku vinaka, ia na veivosaki va qori e rawa nida lai veitaratara kei ira na ilala ca, wili kina na vukitani. (1 Kor. 1:19-25; Kolo. 2:8) Kena ikuri, ena vanua e vakatabui kina na noda cakacaka, e rawa nira raica se wilika na vakailesilesi ni veivanua qori na itukutuku eda vakauta, qai rawa ni vakaleqai ira tale na mataveitacini era tiko e kea. Koya gona, meda kua ni vakayagataka na Internet meda vaqarai ira kina na tamata mai na so tale na vanua ena noda via wasea na itukutuku vinaka.

Vakavo sara ga ke vakadonui mai na valenivolavola ni tabana, ke da vunau tawalokuci vua e dua e gole mai vanuatani, eda na sega ni tomana noda veitaratara kei koya ni sa lesu i nona vanua. Eda na vakaraitaka ga vua na sala me vakayagataka kina na jw.org me kila kina e levu tale na itukutuku se me veitaratara kei na valenivolavola ni tabana ena nona vanua. Eda rawa tale ga ni uqeti koya me gole ina Vale ni Soqoni e voleka vua. Ia eso na vanua e sega kina na Vale ni Soqoni. Ke vinakata me sikovi koya na iVakadinadina i Jiova, meda vakalewena na fomu Kerekere me Lai Sikovi (S-43) da qai solia vua na noda vunivola ni ivavakoso. Ena vakauta na kerekere qori ni vakayagataka na jw.org. Na valenivolavola ni tabana e qarava na cakacaka ena vanua e vakaitikotiko kina na tataleitaki, ena kila vinaka na ituvaki, ena vakarautaka tale ga na veivuke vakayalo.—Raica na Noda Cakacaka Vakaitalatala, June 2014, t. 7, kei na Noveba 2011, t. 2.

Ke toki i vanuatani e dua eda dau sikova se da vuli iVolatabu tiko kei na dua eda veikilai ena Internet, e dodonu meda muria na idusidusi e tukuni mai cake. De dua eda na via vakabulabulataka tiko ga nodra tataleitaki me yacova ni sa sikovi koya e dua na dautukutuku ena nona vanua. Ke tiko ena vanua e vakatabui se yalani kina noda cakacaka, meda qaqarauni sara nida veivosakitaka na ulutaga vakaivolatabu ena ivola, talevoni se na Internet.​—Maciu 10:16.