Vakayagataka na JW.ORG ena Cakacaka Vakaitalatala

E vakarautaki na ulutaga kei na vidio e laurai ena mata ni jw.org (home page) me uqeti ira na lewenivanua era yalomalumalumu. (Cak 13:48) Levu na gauna e vakamacalataka na itukutuku era vakasamataka tiko, se ra veivosakitaka.

O na vakayagataka vakacava na ulutaga qori ena cakacaka vakaitalatala?

• Rai wasoma ena jw.org. Mo kila na ulutaga e vakaraitaki kina, vakasamataka na sala o na rawa ni vakayagataka kina mo vukea e dua na tataleitaki. (Mo kila eso tale na ulutaga sa vakaraitaki oti, tabaka “Raica Eso Tale.”) Ni o kila na ka vovou e biu ena noda website ena rawa ni veiveisau na ulutaga o vosa kina ena cakacaka vakavunau.

• Vakayagataka na ulutaga kei na vidio e tu kina me tekivu na veivosaki. Qori eda na kila kina na ka era rairai vakasamataka tiko na itaukeinivale ena yalava.

• Vakaraitaka na mata ni website (home page). Vakamacalataka eso na ulutaga qai vakaraitaka na sala mera raica kina.

• Vakauta na isema (link). Levu era sega ni dau via vosa vei keda, ia era via raica na noda website. Kua gona ni tu suka mo vakauta vei ira na tataleitaki na isema ena mata ni website, dua na ulutaga se vidio e tu kina.