Nodrau Veiqati na Tui ena Gauna ni iCavacava

Eso na parofisai ena kato qo e vakamacalataka na ka e yaco vata ga ena dua na gauna. E vakadinadinataka ena levu na sala nida sa bula tiko ena “gauna ni icavacava.”—Tani. 12:4.

Tikinivolatabu Vkta. 11:7; 12:13, 17; 13:1-8, 12

Parofisai E veiliutaki tiko “na manumanu kila” me vica vata na drau na yabaki. Ena gauna ni icavacava, e mavoa na ikavitu ni uluna. Toso na gauna, e mavo na uluna, e qai muria na manumanu kila o “vuravura taucoko.” E vakayagataka o Setani na manumanu qori me “vala kei ira na vo” ni kawa.

Kena vakayacori Ni oti na Waluvu, era veiliutaki na matanitu era saqati Jiova. Oti e vica vata na senitiuri, ena iKarua ni iValu Levu, e vakamalumalumutaki na Matanitu o Peritania. E kaukaua tale ni sa veitokoni yani o Merika. Ena gauna ni icavacava, e vakayagataka o Setani na veimatanitu e vuravura mera vakacacani ira na tamata ni Kalou.
Tikinivolatabu Tani. 11:25-45

Parofisai Ena gauna ni icavacava erau veiqatitaka tiko ga na tui ni vualiku kei na tui ni ceva na veiliutaki.

Kena vakayacori O Jamani e valuti Peritania kei Merika. Ena 1945 e tui ni vualiku na Matanitu Makawa o Rusia kei na nona ito. Ena 1991, e kasura na Matanitu Makawa o Rusia, ni toso na gauna e mai tui ni vualiku o Rusia kei na nona ito.
Tikinivolatabu Aisea 61:1; Mala. 3:1; Luke 4:18

Parofisai E tala o Jiova na nona “italai” me ‘caramaka na sala’ ni bera ni tauyavu na Matanitu vakaMesaia. E tekivu “tukuna na itukutuku vinaka” na ilawalawa lailai qo vei ira “na yalomalumalumu.”

Kena vakayacori Me tekivu ena 1870, e vulica vagumatua na iVolatabu o C. T. Russell kei ratou na nona itokani me ratou vakamacalataka na ka dina. Ena veiyabaki ni 1880, eratou vakabibitaka mera vunau na tamata ni Kalou. Eratou tabaka na ulutaga qo: “Vinakati e 1,000 na Dauvunau”; “Mera Vunau na Lumuti.”
Tikinivolatabu Maciu 13:24-30, 36-43

Parofisai E dua na meca e tea na co ca ena loganiwiti me rau tubu vata, me vakaruguta na witi me yacova na gauna ni tatamusuki; oti ena qai tawasei na co ca mai na witi.

Kena vakayacori Me tekivu ena icavacava ni 1800, sa qai vakaduiduitaki rawa na lotu vaKarisito dina kei na lotu vaKarisito lasu. Donuya na gauna ni icavacava, era kumuni na lotu vaKarisito dina, era tawasei na lotu vaKarisito lasu.
Tikinivolatabu Tani. 2:31-33, 41-43

Parofisai Na yava kaukamea kei na qele ni matakau e buli ena duidui kaukamea.

Kena vakayacori Na qele e dusi ira na lewenivanua era vakarurugi ena matanitu o Peritania kei Merika, era saqata na matanitu e rua qori. Ena vukudra, e sega kina ni kaukaua na nodrau lewa me vaka na kaukamea.
Tikinivolatabu Maciu 13:30; 24:14, 45; 28:19, 20

Parofisai E kumuni “na witi” ena “lololo,” e lesi na “dauveiqaravi yalodina e vuku” me vakani ira na “lewenivuvale.” E tekivu tete ena “veiyasa i vuravura” na vunautaki ni “itukutuku vinaka” ni “Matanitu ni Kalou.”

Kena vakayacori Ena 1919 e lesi na dauveiqaravi yalodina e vuku me vakani ira na tamata ni Kalou. Tekivu ena gauna qori, era vunau vakalevu na Gonevuli ni iVolatabu. Nikua, eda sa vunau tiko na iVakadinadina i Jiova ena sivia ni 200 na vanua, e vakarautaki tale ga na ivola vakaivolatabu ena sivia ni 1,000 na vosa.
Tikinivolatabu Tani. 12:11; Vkta. 13:11, 14, 15

Parofisai Na manumanu kila e rua na kena ileu e liutaka na buli ni “ivakatakarakara ni manumanu kila,” e solia tale ga na “icegu vua na ivakatakarakara.”

Kena vakayacori E liutaka o Peritania kei Merika na kena tauyavu na Matabose Makawa kei Vuravura. Era tokona na isoqosoqo qori na vo ni veimatanitu. Me tekivu ena 1926 ina 1933, e lewe tale ga ni Matabose qori na tui ni vualiku. Me vaka ga na Matabose kei Vuravura, e vakayacori vua na Matabose Makawa na veivakacaucautaki me caka ga vua na Matanitu ni Kalou.
Tikinivolatabu Tani. 8:23, 24

Parofisai E “duatani sara na nona veivakarusai” e dua na tui e rerevaki na kena irairai.

Kena vakayacori E levu sara e vakamatea o Peritania kei Merika. Kena ivakaraitaki, ena iKarua ni iValu Levu, e sega ni tukuni rawa na vakacaca e vakayacora o Merika ni vakalutuma e rua na gasaukuro vua na matanitu e dau veimecaki kei Peritania kei Merika.
Tikinivolatabu Tani. 11:31; Vkta. 17:3, 7-11

Parofisai E cabe mai na qara e sega ni vakabotona na manumanu kila “kulakula” e tini na kena ileu, qo na ikawalu ni tui. E vakamacalataka na ivola i Taniela ni tui qo e “ka vakasisila e dauveivakarusai.”

Kena vakayacori E mai cava na Matabose Makawa kei Vuravura ena iKarua ni iValu Levu. Oti na ivalu, e “vakaduri” na Matabose kei Vuravura. Me vaka ga na Matabose Makawa kei Vuravura, e vakayacori vua na Matabose kei Vuravura na vakacaucau e dodonu me caka vua na Matanitu ni Kalou. Na Matabose kei Vuravura ena vakarusai lotu.
Tikinivolatabu 1 Ces. 5:3; Vkta. 17:16

Parofisai Era kacivaka na veimatanitu na “vakacegu kei na sautu,” ia e ravuta na “saqamua” na “tini na ileu” kei na “manumanu kila” qai vakarusa. Oti ya era na vakarusai na veimatanitu.

Kena vakayacori Era na rairai tukuna na veimatanitu nira sa rawata na vakacegu kei na sautu. Era na qai vakarusa na lotu lasu na veimatanitu era lewe ni Matabose kei Vuravura. Qori sara ga na itekitekivu ni veivakararawataki levu. Ena cava na veivakararawataki levu qori ni sa vakarusai na vuravura i Setani ena Amaketoni.
Tikinivolatabu Isik. 38:11, 14-17; Maciu 24:31

Parofisai O Koki ena ravuta na vanua era tiko kina na tamata ni Kalou. Oti ya era na yavala na agilosi mera kumuni ira vata na “digitaki.”

Kena vakayacori Na tui ni vualiku kei na vo ni veimatanitu era na ravuti ira na tamata ni Kalou. Dua na gauna ni sa tekivu oti na ravuravu qori, era na kumuni vata i lomalagi na ivovo ni lumuti.
Tikinivolatabu Isik. 38:18-23; Tani. 2:34, 35, 44, 45; Vkta. 6:2; 16:14, 16; 17:14; 19:20

Parofisai Ena vakacavari “nona ravuravu” o “koya e vodo tiko” ena “ose vula” ni vakarusai Koki kei na nona mataivalu. Ena “kolotaki . . . ina drano bukawaqa” na “manumanu kila” oti ena qai vurumemea na ivakatakarakara vakaitamera qori.

Kena vakayacori O Jisu na Tui ni Matanitu ni Kalou ena vakabulai ira na tamata ni Kalou. Era na tomani koya na le 144,000 kei ira na mataivalu agilosi, mera na vakarusai ira na matanitu tovata era ravuti ira tiko na tamata ni Kalou. Sa na qai vakarusai vakadua na vuravura i Setani.