Na Cava e Sega ni Rogoca Kina na Kalou na Masu Kece?

E tu vakarau na Tamada vakalomalagi o Jiova me rogoca na noda masu mai vu ni lomada. Ia ena tiko eso na ka ena tarova na nona rogoca na noda masu. Me vaka na cava? Na cava meda nanuma tiko ena gauna eda masu kina? Qo eso na ka e tukuna na iVolatabu.

Era wilika tiko e dua na ilawalawa e valenilotu na ivola ni masu.

“Ni o masu, kua ni cavuta tiko ga e dua na qaqanimasu.”—Maciu 6:7.

E sega ni vinakata o Jiova meda cavuqaqataka tiko ga yani e dua na masu, se meda wilika mai ena dua na ivola ni masu. Ia e vinakata ga meda masu yani vua mai vu ni lomada. Kaya mada ke tiko e dua nomu itokani e dau tautauvata tu ga na ka e tukuna vei iko ena veisiga, vakacava o na taleitaka? Sega! O ira na noda itokani dina era dau talaucaka na lomadra, era dau dina tale ga. Nida talaucaka na lomada vua na Tamada vakalomalagi, e dusia nida via nona itokani.

Tacake tiko e dua na tagane ni vakarau raica na macala ni nona veimauilavo.

“Oni kerea ia e sega ni soli vei kemuni, ni cala na inaki ni nomuni kerekere.”—Jemesa 4:3.

Eda kila ni na sega ni sauma na Kalou na noda masu ke sega ni vakadonuya na ka eda kerea. Kena ivakaraitaki, e sega ni vakadonuya na Kalou na kocokoco kei na vaqara kalougata. Ia vakacava ena sauma na nona masu e dua na veimauilavo ni via vaqara kalougata qai via winitaka na ilavo? (Aisea 65:11; Luke 12:15) Sa na sega tu ga ni rogoca o Jiova na mataqali masu va qori! Me rawa ni sauma na Kalou na noda masu, e bibi meda vakadeitaka ni salavata na ka eda kerea kei na ka e tukuna o koya ena iVolatabu.

E masulaki ira tiko na sotia e dua na italatala.

“O koya e sega ni via rogoca na lawa—e sevaki sara ga na nona masu.”—Vosa Vakaibalebale 28:9.

Ena gauna vakaivolatabu, e sega ni rogoca na Kalou na nodra masu o ira na beca na nona lawa. (Aisea 1:15, 16) E sega vakadua ni veisau na nona rai. (Malakai 3:6) Ke da vinakata me rogoca na Kalou na noda masu, e dodonu meda saga ena noda igu taucoko meda talairawarawa vua. Ia vakacava ke so na noda cala makawa? Ena rogoca tiko ga na Kalou na noda masu? Io! Ena vosoti keda vakayalololoma na Kalou nida veivutuni dina da qai saga ena noda igu taucoko meda vakamarautaki koya.—Cakacaka 3:19.