O sa Vakarau tu Mo Yalataki Iko Vei Jiova?

1-2. Na cava me cakava e dua me qai papitaiso?

ENA loma ni lima na yabaki sa oti, e sivia ni duanamilioni era papitaiso mera iVakadinadina i Jiova. Levu vei ira qori era vulica na dina nira “se gone dramidrami,” me vaka na tisaipeli ena imatai ni senitiuri o Timoci. (2 Tim. 3:14, 15) Eso era vulici Jiova nira sa uabula, eso tale nira sa qase sara. Kena ivakaraitaki, dua na marama e vulica na iVolatabu kei ira na tacida, e papitaiso ni sa yabaki 97!

² Ke o vuli iVolatabu se susu ena dina, vakacava o vakasamataka tiko mo papitaiso? Qori e dua na isausau vinaka! Ia ni bera ni o papitaiso, e vinakati mo yalataki iko vei Jiova. Ena veivosakitaki ena ulutaga qo na ka e vauci ena nomu yalayala. Ena vukei iko tale ga mo kua ni rere ni cakava qori qai papitaiso ni o sa vakarau tu.

NA CAVA NA YALAYALA?

3. Tukuna eso na ivakaraitaki vakaivolatabu era yalataki ira vei Jiova.

³ E tukuni ena iVolatabu, ni dua e yalataki koya vei Jiova e vakaraitaka ni digitaki ena dua na inaki bibi. O ira na Isireli era lewe ni matanitu yalayala vei Jiova. Ia eso na lewe ni matanitu qori era yalataki ira vei Jiova ena dua na sala mareqeti. Kena ivakaraitaki, e dara o Eroni na “ivakatakilakila tabu ni yalayala.” Qori e dua na tikinikoula taliva e kabi toka e liu ena ivauniuluna. Na tikinikoula qori e vakaraitaka ni digitaki o Eroni ena dua na itavi bibi, ya me bete levu e Isireli. (Vunau 8:9) O ira tale ga na Nasaraiti era yalataki ira vei Jiova ena dua na sala mareqeti. Na vosa “Nasaraiti,” e vu mai na vosa vakaIperiu nazirʹ, e kena ibalebale “O Koya e Tawasei,” se “O Koya e Yalayala.” Era muria vinaka na Nasaraiti na ivakaro me baleti ira e volai tu ena Lawa.—Tiko 6:2-8.

4. (a) Na inaki cava era yalataki ira kina vei Jiova eso? (b) Cava na kena ibalebale mo ‘kua tale ni muria na lomamu’? (Raica tale ga na iyaloyalo.)

⁴ Ni o yalataki iko vei Jiova, o sa digia mo tisaipeli i Jisu Karisito, o sa na vakaliuca tale ga na vakayacori ni loma ni Kalou. Na cava e okati ena nomu yalayala vaKarisito? E kaya o Jisu: “Ke dua e via muri au, me kua tale ni muria na lomana.” (Maciu 16:24) Na vosa vaKirisi e vakadewataki “kua tale ni muria na lomana,” e rawa tale ga ni vakadewataki mo “vakasega vei iko.” Ni o dauveiqaravi yalayala i Jiova, ena vinakati mo vakasega ena ka kece e sega ni salavata kei na lomana. (2 Kor. 5:14, 15) Qori e wili kina nomu vakasega se cata na “vua ni itovo vakayago,” me vaka na veiyacovi tawadodonu. (Kala. 5:19-21; 1 Kor. 6:18) Vakacava ena vakadredretaka nomu bula ni o muria na ivakaro qori? Ena sega ni dredre ke o lomani Jiova qai vakadeitaka ni na yaga vei iko nomu muria na nona lawa. (Same 119:97; Aisea 48:17, 18) E kaya e dua na tacida o Nicholas: “O rawa ni raica na ivakatagedegede i Jiova me vaka na bai ni valeniveivesu e tarovi iko mo kua ni cakava na ka ga o vinakata, se bai ni laione e taqomaki iko mai na leqa.”

5. (a) O na yalataki iko vakacava vei Jiova? (b) Na cava na kedrau duidui na yalayala kei na papitaiso? (Raica tale ga na iyaloyalo.)

⁵ O na yalataki iko vakacava vei Jiova? O yalataka vua ena masu ni o na qaravi koya duadua ga qai vakaliuca na lomana. Io, o yalataka vei Jiova ni o na lomani koya tiko ga “ena lomamu taucoko, ena nomu vinaka taucoko, ena nomu vakasama taucoko, kei na nomu kaukaua taucoko.” (Mari. 12:30) Na nomu yalayala, o iko ga kei Jiova. Ia na papitaiso e caka e matanalevu, era na kila kina eso tale ni o sa yalataki iko oti. Na nomu yalayala e dua na bubului bibi, e nomu inaki mo dina kina, qori tale ga na ka e namaka vei iko o Jiova.—Dauv. 5:4, 5.

CAVA MO YALATAKI IKO KINA VEI JIOVA?

6. Na cava e uqeti iko mo yalataki iko vei Jiova?

⁶ Na vuna levu o yalataki iko kina vei Jiova ya ni o lomani koya. Na loloma qori e sega ni yavutaki ena ivakarau ni lomamu. Ia e yavutaki ena “kilaka dodonu” kei na nomu “kila na veika vakayalo,” qori na veika o vulica me baleti Jiova e vakavuna mo lomani koya kina vakalevu. (Kolo. 1:9) Nomu vulica na iVolatabu o vakadeitaka (1) ni bula dina tiko o Jiova, (2) ni uqeti vakalou na iVolatabu, kei na (3) e vakayagataka tiko na nona isoqosoqo me vakayacora na lomana.

7. Na cava meda cakava ni bera nida yalataki keda vua na Kalou?

⁷ O ira na yalataki ira vei Jiova mera kila na ivakavuvuli rawarawa ena vosa ni Kalou ra qai muria na kena ivakatagedegede. Era saga ena nodra vinaka taucoko mera tukuna yani na nodra vakabauta ena sala era rawata. (Maciu 28:19, 20) Era lomani Jiova vakalevu, ra vinakata tale ga mera qaravi koya duadua ga. O va tale ga qori? Ke o lomani Jiova mai vu ni lomamu, o na sega ni yalataki iko qai papitaiso baleta ni o via vakamarautaki nomu qasenivuli se nomu itubutubu se o muri ira tu ga nomu itokani.

8. E uqeti iko vakacava nomu dau vakavinavinaka mo yalataki iko vei Jiova? (Same 116:12-14)

⁸ Ni o vakasamataka na ka kece sa cakava vei iko o Jiova o na vinakata sara ga mo yalataki iko vua. (Wilika Same 116:12-14.) Sa rauta me kaya na iVolatabu ni solia o Jiova “na iloloma vinaka kece kei na isolisoli uasivi kece.” (Jeme. 1:17) Na isoro vinaka duadua ya na isoro i Luvena o Jisu. Vakasamataka mada ya! Ena vuku ni ivoli o rawa ni veitokani vinaka kina kei Jiova. E vakarautaka tale ga vei iko na inuinui ni bula tawamudu. (1 Joni 4:9, 10, 19) Nomu yalataki iko vei Jiova o vakaraitaka vua nomu vakavinavinakataka na iloloma levu duadua na ivoli, kei na ka kece e vakalougatataki iko kina. (Vkru. 16:17; 2 Kor. 5:15) E vakabibitaki na vakavinavinaka qori ena lesoni 46 poidi 4, ena ivola Marau me Tawamudu!, kei na dua na vidio e tolu na miniti Solia Nomu iLoloma Vua na Kalou.

O SA VAKARAU TU MO YALAYALA QAI PAITAISO?

9. Na cava me kua ni vakasaurarataki kina e dua me yalayala?

⁹ O na rairai nanuma ni o se bera ni vakarau tu mo yalayala qai papitaiso. De dua o nanuma ni vinakati mo cakava eso na veiveisau mo muria na ivakatagedegede i Jiova, se na gauna mo vakaukauataka kina na nomu vakabauta. (Kolo. 2:6, 7) E sega ni tautauvata na nodra toso vakayalo na vuli iVolatabu, vaka kina o ira na gone. Ena sega ni tautauvata na yabaki ni nodra bula era na via yalayala qai papitaiso kece kina. Saga mo kila na ka mo vakavinakataka me salavata kei na ka o rawata, ia mo kua ni vakatauvatani iko kei na dua tale.—Kala. 6:4, 5.

10. Na cava mo cakava ke o kila ni o se bera ni vakarau tu mo yalayala qai papitaiso? (Raica tale ga na kato “Vei ira na Susu ena Dina.”)

¹⁰ Ke o kila mada ga ni o se bera ni vakarau tu mo yalataki iko vei Jiova, saga me nomu isausau qori. Masulaka me vakalougatataka o Jiova na nomu sasaga mo cakava na veiveisau. (Fpai. 2:13; 3:16) Mo nuidei ni na rogoca nomu masu qai vukei iko.—1 Joni 5:14.

VUNA ERA RERE KINA ESO

11. Ena vukei keda vakacava o Jiova meda yalodina tiko ga vua?

¹¹ Eso era sa vakarau tu mera yalayala qai papitaiso, ia era rere ni cakava qori. De dua era lomaleqataka, ‘Vakacava keu valavala ca bibi qai vakasivoi?’ Ke o lomaleqa tiko, mo nuidei ni na solia vei iko o Jiova na ka kece e gadrevi ‘me rawa ni rakorako vua na nomu itovo.’ (Kolo. 1:10) Ena solia tale ga vei iko na kaukaua mo cakava na ka e dodonu. E vakaraitaka ni na cakava qori baleta ni sa vukea e levu ena veigauna sa oti. (1 Kor. 10:13) Qori na vuna e lailai kina era vakasivoi ena ivavakoso vaKarisito. O Jiova e vukei ira na nona tamata mera yalodina tiko ga.

12. E rawa vakacava meda kua ni rawai ena cala bibi?

¹² Nida sega ni uasivi, eda dau temaki meda cakava na ka ca. (Jeme. 1:14) Ia ke o rawai kina, qori e nomu digidigi. Na kena dina ni o iko ga o lewa tiko na ivakarau ni nomu bula. Era kaya eso ni dredre meda lewa na noda gagadre kei na ka meda cakava, e lasu qori. O rawa ni vulica mo lewai iko vinaka. Ke basika mai eso na gagadre ca, o rawa ni vakatulewataka mo kua ni cakava. Me rawati qori, mo masu e veisiga. Mo dei ena nomu ituvatuva mo vulica vakataki iko na vosa ni Kalou. Tiko ena soqoni vaKarisito. Wasea na nomu vakabauta. Ni o cakava wasoma qori o na kaukaua kina mo vakayacora na nomu yalayala. Mo kua ni guilecava ni na vukei iko o Jiova mo cakava qori.—Kala. 5:16.

13. Na cava eda vulica vei Josefa?

¹³ Ena rawarawa mo vakayacora na nomu yalayala ke o sa vakatulewataka rawa tu na ka mo cakava ke o temaki. E tukuni tale ga ena iVolatabu e levu era cakava qori, nira sega mada ga ni uasivi. Kena ivakaraitaki, e saga vakavica na wati Potifa me rawai Josefa. Ia sa kila rawa tu o Josefa na ka me cakava. E tukuna na iVolatabu “ni bese” o Josefa, e kaya: “Meu qai cakava tu vakacava na ka torosobu qo qai valavala ca kina vua na Kalou?” (Vkte. 39:8-10) E matata ni sa kila rawa tu o Josefa na ka me cakava ni bera mada ga ni temaki koya na wati Potifa. Qori e vakarawarawataka nona cakava o Josefa na ka dodonu ni temaki.

14. Na cava meda cakava nida temaki meda caka ca?

¹⁴ O na vakatotomuri Josefa vakacava ni o temaki? Mo vakatulewataka rawa qo na ka mo cakava ni bera ni o temaki. Vulica mo vakasega ena ka e cata o Jiova, kua mada ga ni vakasamataka tiko. (Same 97:10; 119:165) Ni o cakava qori o na sega kina ni valavala ca ni o temaki. O sa kila rawa tu na ka mo tukuna kei na ka mo cakava.

15. O na vakaraitaka vakacava ni o ‘vakasaqarai Jiova tiko ena yalogu’ (Iperiu 11:6)

¹⁵ De dua o sa kunea na dina, o vinakata tale ga mo qaravi Jiova ena lomamu taucoko. Ia e dua na ka e vakataotaka tiko na nomu via yalayala qai papitaiso. O rawa ni muria na ka e cakava o Tui Tevita. E masuti Jiova: “Kemuni na Kalou, ni dikevi au moni kila na lomaqu. Digovi au, moni kila na nuiqawaqawa ni noqu vakanananu. Moni raica ke tiko e lomaqu e dua na gagadre ca, qai tuberi au ena sala ni bula tawamudu.” (Same 139:23, 24) O Jiova ena vakalougatataki ira “era vakasaqarai koya ena yalogu.” Ni o sasagataka na nomu isausau mo yalayala qai papitaiso, o vakaraitaka vua ni o sa cakava tiko qori.—Wilika Iperiu 11:6.

MO TORO VOLEKA TIKO GA VEI JIOVA

16-17. E vagolei ira mai vakacava na susu ena dina o Jiova? (Joni 6:44)

¹⁶ E kaya o Jisu ni o Jiova e vagolei ira mai na nona tisaipeli. (Wilika Joni 6:44.) Vakasamataka mada na kena totoka qori kei na sala o okati kina. O Jiova e raica e dua na ka vinaka vei ira kece e vagolea mai. E raici ira yadua me “nona iyau talei,” se “nona ivotavota talei.” (Vkru. 7:6; vmr.) Qori tale ga na ka e raica vei iko.

¹⁷ O rairai dua na itabagone o susu ena dina. O nanuma ni o qaravi Jiova tiko ga ni rau tiko ena dina na nomu itubutubu, ia e sega ni vagolei iko mai o koya. E kaya na iVolatabu: “Toro voleka vua na Kalou, ena qai toro voleka mai vei kemuni o koya.” (Jeme. 4:8; 1 Vei. 28:9) Ke o vakaliuliu mo toro volekati Jiova, ena toro voleka mai vei iko o koya. E sega ni raici iko o Jiova mo lewe tu ga ni dua na ilawalawa. E vagolei keda yadudua mai, wili kina o kemuni na susu ena dina. Ni dua e vakaliuliu me toro volekati Jiova, ena toro voleka mai o koya, me vaka e tukuni ena Jemesa 4:8.—Vakatauvatana 2 Cesalonaika 2:13.

18. Na cava eda na veivosakitaka ena ulutaga tarava? (Same 40:8)

¹⁸ Ni o yalataki iko vei Jiova qai papitaiso, o sa vakatotomuria tiko na ivakarau ni rai i Jisu. E soli koya vakarawarawa vei tamana me cakava na ka kece e kerei vua. (Wilika Same 40:8; Iper. 10:7) Ena ulutaga tarava, eda na veivosakitaka na ka ena vukei keda meda qaravi Jiova tiko ga ena yalodina nida sa papitaiso oti.