E Vinaka Vei Keda Noda Veivolekati Vakaveitacini!

1-2. Na cava e bibi sara vei Jiova? Cava e vinakata meda cakava?

E BIBI sara vei Jiova na ka eda cakava vei ira eso tale. E vakavulica o Jisu ni bibi meda lomana na kainoda me vaka noda lomani keda. (Maciu 22:​37-39) E okati kina noda cakavinaka vei ira eda sega ni vakabauta vata. Nida vakaraitaka qori, eda sa vakatotomuria tiko na Kalou o Jiova ni “dau vakacabea na matanisiga vei ira na daucaka ca kei na daucaka vinaka, e vakatauca tale ga na uca vei ira na yalododonu kei ira na sega ni yalododonu.”​—Maciu 5:45.

² E lomana o Jiova na kawatamata kece, ia e lomani ira vakalevu na cakava na ka dodonu. (Joni 14:21) E vinakata meda vakatotomuri koya. E uqeti keda gona meda ‘lomani ira vakalevu’ na tacida, meda vakaraitaka tale ga na “veilomani ni veitacini.” (1 Pita 4:8; Roma 12:10) Nida via vakaraitaka na loloma va qori vua e dua na tacida, me tautauvata sara ga kei na loloma eda na vakaraitaka vua e dua na wekada se itokani voleka.

3. Na cava meda nanuma tiko me baleta na loloma?

³ Na loloma e vaka na kau ni lomanivale, me rawa ni tubu ena vinakati me qaravi vinaka. E vakasalataki ira na lotu vaKarisito na yapositolo o Paula: “Moni veilomani tiko ga vakaveitacini.” (Iper. 13:1) E vinakata o Jiova me tubu tiko ga noda loloma. Eda na veivosakitaka ena ulutaga qo na vuna meda volekati ira kina na tacida, kei na sala meda cakava tiko ga kina.

VUNA MEDA VEIVOLEKATI KINA

4. Me vaka e tukuni ena Same 133:​1, eda na vakaraitaka vakacava nida mareqeta noda duavata? (Raica tale ga na iyaloyalo.)

⁴ Wilika Same 133:1. Eda duavata kei na ka e vola na daunisame ni “vinaka” qai “marautaki” na noda veitokani kei ira na lomani Jiova. Me vaka ga noda rawa ni vakawalena na vunikau levu eda raica e veisiga, eda rawa tale ga ni vakawalena na totoka ni noda duavata na lotu vaKarisito. Eda dau raici ira vakalevu na tacida, de dua vakavica ena dua na macawa. Eda na vakaraitaka vakacava nida mareqeti ira? Eda na lomani ira vakalevu na tacida ni tiko na gauna meda vakasamataka kina na kedra yaga yadudua ena ivavakoso, vaka kina vei keda.

5. E uqeti ira vakacava eso tale nira raica noda veilomani?

⁵ Eso era qoroya noda veilomani ena imatai ni gauna era tiko kina ena noda soqoni. E rawa sara ga nira tukuna nira sa kunea na ka dina. E kaya o Jisu: “Na ka qo era na kila kece kina ni dou noqu tisaipeli, ke dou veilomani.” (Joni 13:35) Dikeva mada na ivakaraitaki nei Chaithra, e dua na gonevuli ni univesiti e vuli iVolatabu tiko. E sureti me tiko ena dua na soqo ni veiwasewase. Ni oti na imatai ni siga, e tukuna vei nona qasenivuli ni iVolatabu: “Rau se bera vakadua ni mokoti au na noqu itubutubu. Ia ena soqo qo, era mai mokoti au e le 52 ena dua ga na siga! Au vakila na loloma i Jiova ena vuvale vakayalo qo. Au via mai lewena sara ga.” E toso tiko ga nona vuli o Chaithra qai papitaiso ena yabaki 2024. Io, nira raica na ka vou na noda cakavinaka kei na noda veilomani, ena uqeti ira sara ga mera qaravi Jiova.​—Maciu 5:16.

6. Eda na taqomaki vakacava nida volekati ira na tacida?

⁶ Nida volekati ira na tacida, ena taqomaki keda. E uqeti ira na tacina lotu vaKarisito o Paula: “Moni veivakauqeti [tiko ga] ena veisiga . . . de dua vei kemuni e vakaukauataki na lomana ena kaukaua ni ivalavala ca e veibacani.” (Iper. 3:13) Ke da yalolailai qai tekivu lako sese na yavada mai na sala ni yalododonu, o Jiova ena rawa ni uqeta e dua na tacida e kauai me vukei keda. (Same 73:​2, 17, 23) Ena vakacegui keda na veivakayaloqaqataki va qori.

7. Erau veisemati vakacava na loloma kei na duavata? (Kolosa 3:​13, 14)

⁷ Eda lewena e dua na ilawalawa eda saga vagumatua meda veilomani, eda na vakila e levu na kena yaga. (1 Joni 4:11) Kena ivakaraitaki, na loloma ena uqeti keda meda “dau yalorawarawa,” qori ena uqeta na duavata vakamataveitacini. (Wilika Kolosa 3:​13, 14; Efeso 4:​2-6) Qori na vuna eda marautaka kina noda dau tiko ena soqoni, ni sega ni vakatauvatani kei na dua tale na ilawalawa e vuravura.

MEDA VEIROKOROKOVI

8. E vukei keda vakacava o Jiova me rawati na duavata?

⁸ E dua na cakamana noda duavata na mataveitacini. E cakava rawa qori o Jiova nida sega mada ga ni uasivi. (1 Kor. 12:25) E kaya na iVolatabu ni “vakavulici [keda] vinaka sara na Kalou [meda] veilomani.” (1 Ces. 4:9) Kena ibalebale, e vakayagataka o Jiova na iVolatabu me tukuna vei keda na ka sara ga meda cakava meda volekati ira kina na tacida. E ‘vakavulici keda vinaka na Kalou’ nida dikeva vinaka na nona ivakavuvuli qai muria sara. (Iper. 4:12; Jeme. 1:25) Qori sara ga na ka eda saga vagumatua na iVakadinadina i Jiova.

9. Na cava eda vulica ena Roma 12:​9-13 me baleta noda veirokorokovi?

⁹ E vakavulici keda vakacava na Vosa ni Kalou meda veivolekati? Dikeva mada na ka e kaya o Paula ena tikina qo, ena Roma 12:​9-13. (Wilika.) E kaya na ikarua ni cegu ni tikina e 10: “Ni dau liu ena nomuni veirokorokovi.” Cava na kena ibalebale? Meda vakaliuliu nida vakaraitaka na “veilomani ni veitacini” nida dau veivosoti, dau veikauaitaki se veisureti qai dau lomasavu. (Efeso 4:32) Kua tale ni waraki ira na tacimu mera volekati iko. Mo “liu” sara ga. O na vakadinadinataka na ka e tukuna o Jisu: “E marau vakalevu o koya e solia na ka, vakalailai o koya e taura na ka.”​—Caka. 20:35.

10. Sala cava eda na mamakutu kina nida vakaraitaka na “veirokorokovi”? (Raica tale ga na iyaloyalo.)

¹⁰ Ni tukuna oti ga o Paula meda liu ena veirokorokovi, e uqeti keda meda “dau mamakutu, [meda] kua ni vucesa.” O koya e mamakutu, e gugumatua qai dau cakacaka. Ni soli vua e dua na itavi, e cakava mai vu ni lomana. E kaya na Vosa Vakaibalebale 3:​27, 28: “Kua ni bureitaka na ka vinaka vei ira e dodonu me soli vei ira ke tu vei iko na kaukaua mo veivuke.” Nida raica gona e dua e leqa se rarawa tu, eda na cakava na ka eda rawata meda vukei koya. Eda na sega ni lokuyara, se nanuma me qai cakava e dua tale.​—1 Joni 3:​17, 18.

11. Na cava meda cakava meda veivolekati kina?

¹¹ Dua tale na sala eda na vakaraitaka kina na veirokorokovi ya nida totolo ni vosoti ira na cala vei keda. E kaya na Efeso 4:26: “Me kua ni dromu na matanisiga o se cudru tiko ga.” Na vuna? Ke da cudru tiko ga, e kaya na tikina e 27, eda sa “solia e dua na galala vua na Tevoro.” E dau vakadreti keda vakalevu o Jiova ena nona Vosa meda dau veivosoti. E uqeti keda na Kolosa 3:13 meda “dau veivosoti . . . vakarawarawa.” Dua na sala vinaka duadua eda na veivolekati kina kei ira na tacida, nida vosota nodra malumalumu. Nida cakava qori, eda sa “maroroya na duavata e vakavuna na yalo tabu, [nida] vauci vata ena veiyaloni.” (Efeso 4:3) E macala ni na rawati na duavata kei na veiyaloni nida dau veivosoti.

12. Ena vukei keda vakacava o Jiova meda dau veivosoti?

¹² Kena irairai ni dredre ena so na gauna meda vosoti ira era vakararawataki keda. Ia e rawa nida veivosoti ena veivuke ni yalo tabu. E uqeti keda na iVolatabu meda “veilomani ena veilomani ni veitacini,” da qai “dau mamakutu.” Oti sa qai tomana: “Me uqeti kemuni ga na yalo tabu.” O koya e “uqeti,” e dau gugumatua qai dau cakacaka ni uqeti koya na yalo tabu. (Roma 12:11) Ena vukei keda gona na yalo tabu meda veilomani qai veivosoti vakarawarawa. Oya na vuna meda kerei Jiova kina vagumatua me vukei keda.​—Luke 11:13.

“MONI KUA NI VEISEI”

13. Na cava e rawa ni vakavuna na veisei?

¹³ Era lewena na ivavakoso “na tamata kece ga” e duidui na nodra isususu. (1 Tim. 2:​3, 4) Ke da sega ni qarauna, na duidui qori ena rawa ni vakavuna na veisei ena so na ka e vauca noda vakatulewa yadua, me vaka na isulusulu kei na sasauni, veiqaravi vakavuniwai se ka ni veivakamarautaki eda digia. (Roma 14:4; 1 Kor. 1:10) Ni ‘vakavulici keda vinaka na Kalou meda veilomani,’ e bibi meda kua ni usuraka noda vakatulewa vei ira eso tale nida nanuma ni vinaka ga na noda.​—Fpai. 2:3.

14. Na cava meda saga tiko ga? Na vuna?

¹⁴ Eda na sega tale ga ni veisei nida saga meda dau veivakayaloqaqataki qai veivakauqeti ena gauna kece. (1 Ces. 5:11) Wale tiko ga qo, era vakalesui mai e dua na iwiliwili levu era malumu tu vakayalo kei ira na biu tani mai na ivavakoso. Eda kidavaki ira ena yalololoma! (2 Kor. 2:8) Dikeva mada nona ivakaraitaki e dua na tacida yalewa e lai soqoni tale ni oti e tini na yabaki nona malumu tu vakayalo. E kaya: “Era matadredredre nira kidavaki au, era mai lululu.” (Caka. 3:19) E ka lailai sara na ka ra cakava qori, ia e uqeti koya vakacava? E kaya: “Au vakila ni dusimaki au na liga i Jiova meu marau tale.” Nida dau veivakauqeti vei ira kece na tacida, ena rawa ni vakayagataki keda o Karisito meda vakacegui ira na “oca, [era] bikai voli ena icolacola bibi.”​—Maciu 11:​28, 29.

15. Na cava e dua tale na sala eda na uqeta kina na duavata? (Raica tale ga na iyaloyalo.)

¹⁵ Dua tale na sala eda na uqeta kina na duavata, nida qarauna noda vosa. E kaya na Jope 12:11: “Vakacava e sega ni vakatovolea na vosa na daliga me vaka ni tovolea na kakana na yame?” Me vaka ga nona tovolea rawa e dua na daunivakasaqa na ka e vakasaqara ni bera ni solia, e bibi tale ga meda vakasamataka vinaka na noda vosa, ni bera nida kaya e dua na ka. (Same 141:3) Me noda isausau tiko ga meda dau vakadeitaka ni ka eda vakarau tukuna ena veiuqeti, veivakacegui, e ‘vinaka tale ga vei ira na rogoca.’​—Efeso 4:29.

16. O cei e dodonu me veiuqeti nodra vosa?

¹⁶ E bibi mera qarauna na tagane vakawati kei ira na itubutubu me veiuqeti nodra vosa. (Kolo. 3:​19, 21; Taito 2:4) O ira tale ga na qase ni ivavakoso mera ivurevure ni veivakayaloqaqataki kei na vakacegu nira ivakatawa ni qelenisipi nei Jiova. (Aisea 32:​1, 2; Kala. 6:1) E vakadreti keda e dua na vosa vakaibalebale: “Na vosa ena gauna donu e yaga dina!”​—Vkai. 15:23.

ME “VAKAVOTUKANA, ME DINA” NODA LOLOMA

17. Eda na vakaraitaka vakacava ni dina na noda loloma vei ira na tacida?

¹⁷ E uqeti keda na yapositolo o Joni “meda kua ni loloma ga e gusu se na vosa, me vakavotukana, me dina na noda loloma.” (1 Joni 3:18) Eda vinakata me vu mai lomada noda veilomani. Eda na cakava vakacava? Nida veimaliwai vakalevu kei ira na tacida, eda na veivolekati, eda na veilomani tale ga vakalevu. Saga gona mo dau veimaliwai ena soqoni kei na cakacaka vakaitalatala. Me tiko na gauna mo dau gade kina vei ira na tacida. Nida cakava qori, eda vakaraitaka ni “vakavulici [keda] vinaka sara na Kalou [meda] veilomani.” (1 Ces. 4:9) Eda na vakila sara ga ni “vinaka qai marautaki [noda] tiko ena duavata na veitacini!”​—Same 133:1.