O ‘sa Vulica na ka Mo Cakava’ Mo Lomavakacegu?

1. Na cava na lomavakacegu? Cava e sega ni kena ibalebale?

O DAU lomavakacegu? O koya e lomavakacegu ena marautaka na ka sa tu rawa vua. Ena sega ni lomaca se cudruvaka na ka e sega ni tu vua. Ia sega ni kena ibalebale qori me sa vucesa. Kena ivakaraitaki, e sega ni cala ke vinakata e dua na lotu vaKarisito me vakarabailevutaka nona veiqaravi. (Roma 12:1; 1 Tim. 3:1) Ia ena marau tiko ga ke sega mada ga ni lesi ena itavi e vinakata.

2. E veivakaleqai vakacava noda sega ni lomavakacegu?

² Nida sega ni lomavakacegu, ena rawa tini ena leqa levu. O ira na sega ni lomavakacegu era na rairai cakacaka vakabalavu me rawa nira taukena kina eso na ka e sega ni yaga dina. Ka ni rarawa, eso na lotu vaKarisito era butakoca na ilavo kei na so tale na ka era vinakata. De dua era na kaya, ‘E dodonu ga me noqu,’ ‘Kena gauna sara ga qo,’ se ‘Au na qai sauma tale vakamalua.’ Ia ke butako lelevu se lalai, e cata o Jiova, e beci kina o koya. (Vkai. 30:9) Eso tale era rarawataka nira sega ni lesi ena itavi ena isoqosoqo, era mani biuti Jiova kina. (Kala. 6:9) E rawa vakacava ni cakava qori e dua na dauveiqaravi i Jiova? De dua na vu sara ga ni leqa ni sa sega na lomavakacegu.

3. Na cava eda vulica ena Filipai 4:​11, 12?

³ Eda rawa kece ni vulica meda lomavakacegu. E vola na yapositolo o Paula ni “sa vulica [me] lomavakacegu ena ituvaki kece [e] sotava.” (Wilika Filipai 4:​11, 12.) E vola qori ni tiko e valeniveivesu. Ia e marau tiko ga. E “sa vulica na ka [me] cakava” me lomavakacegu kina. Ke dredre meda lomavakacegu, eda vuli ena ka e tukuna o Paula kei na nona ivakaraitaki ni rawa tale ga nida lomavakacegu. E sega ni tutu ga meda sa lomavakacegu. Ia e bibi meda vulica. Ena sala cava? Meda veivosakitaka mada eso na itovo eda na vulica kina meda lomavakacegu.

VULICA MO DAU VAKAVINAVINAKA

4. Ena uqeta vakacava na lomavakacegu na yalo ni vakavinavinaka? (1 Cesalonaika 5:18)

⁴ Na yalo ni vakavinavinaka ena uqeta na lomavakacegu. (Wilika 1 Cesalonaika 5:18.) Kena ivakaraitaki, nida vakavinavinakataka mai vu ni lomada ni sa tiko na ka meda bula kina, eda na sega ni lomaleqataka vakalevu na ka e sega ni tu vei keda. Nida vakasamataka na itavi eda sa qarava tiko ena gauna qo qai vakavinavinakataka, eda na kauaitaka na sala eda na solia tiko ga kina na noda vinaka, ia eda na sega ni vakasamataka vakalevu eso tale na itavi. Oya na vuna e uqeti keda kina na iVolatabu meda vakavinavinakataki Jiova ena noda masu! Nida vakaraitaka na yalo ni vakavinavinaka, eda na vakila “na vakacegu ni Kalou e uasivia na vakasama kece.”​—Fpai. 4:​6, 7.

5. Na cava eso na vuna mera vakavinavinaka kina na Isireli? (Raica tale ga na iyaloyalo.)

⁵ Dikeva mada nodra ivakaraitaki na Isireli. Levu na gauna era vosakudrukudrutaka vei Jiova nira sa sega ni kania na kakana era dau kania mai Ijipita. (Tiko 11:​4-6) Io, e sega ni rawarawa dina na bula ena vanua talasiga. Ia na cava mera cakava mera lomavakacegu kina? E dodonu mera vakasamataka na ka sa cakava o Jiova ena vukudra ra qai vakavinavinakataka. Nira tu mai Ijipita, era vakabobulataki, era vakalolomataki tale ga. Ia e vakabulai ira o Jiova ni kuitataki ira na kai Ijipita ena tini na kuita. Na gauna era sereki kina na Isireli, era qai “yauta na nodra iyau na kai Ijipita,” na siliva, na koula, kei na isulu. (Lako 12:​35, 36) Nira sa tao tu ena bati ni Wasa Damudamu, e vakabulai ira vakacakamana o Jiova ni wasea rua na wai. Kena ikuri, nira lako tiko ena vanua talasiga, e vakani ira e veisiga o Jiova ena mana. Ia na cava ga e leqa? Era sega ni lomavakacegu, sega ni baleta ni lailai na kakana, ia era sega ni vakavinavinakataka na ka sa tu rawa vei ira.

6. Na cava eso na sala eda na vulica kina meda dau vakavinavinaka?

⁶ O na vulica vakacava mo dau vakavinavinaka? Dua, me tiko na gauna e veisiga mo vakasamataka kina na ka vinaka o marautaka. O rawa mada ga ni vola e rua se tolu. (Lele 3:​22, 23) Rua, mo tukuna se vakaraitaka nomu vakavinavinaka. Mo vakaliuliu ni vakavinavinakataki ira eso tale ena ka era cakava vei iko. Koya e bibi sara, mo vakavinavinakataki Jiova e veisiga. (Same 75:1) Tolu, mo veitokani kei ira na dau vakavinavinaka. Nanuma tiko, e rawa ni veidewavi na vakavinavinaka, e rawa tale ga ni veidewavi na sega ni lomavakacegu. (Vkru. 1:​26-28; 2 Tim. 3:​1, 2, 5) Nida qara na sala meda dau vakavinavinaka kina, eda na sega ni vakasamataka vakalevu na ka e sega ni tu vei keda.

7. Na cava e cakava o Aci me lomavakacegu kina?

⁷ Dikeva mada nona ivakaraitaki o Aci, mai Idonisia. E kaya: “Ena gauna ni matedewa na COVID-19, au tekivu vakatauvatana na kequ ituvaki kei ira na taciqu vakayalo. Au sega kina ni lomavakacegu.” (Kala. 6:4) Na cava e qai cakava me veisau kina nona rai? E kaya: “Au tekivu vakasamataka na ka au vakalougatataki kina e veisiga, kei na veika vinaka au rawata niu lewena na isoqosoqo i Jiova. Oti au vakavinavinakataka vua na ka kece qori. Niu cakava qori, au lomavakacegu sara ga.” Ke o vakila ni o sa sega ni lomavakacegu, vakacava o rawa ni vakatotomuria na ka e cakava o Aci mo marau tale?

ME DONU NOMU RAI, YALOMALUMALUMU TIKO GA

8. A coriti vakacava o Peruki?

⁸ A coriti vakalekaleka ena dua na dai o Peruki, na nona vunivola na parofita o Jeremaia. E dredre na nona ilesilesi, qori me tokoni Jeremaia me vakasavuya e dua na itukutuku warumisa ina dua na matanitu talaidredre. Dua na gauna e cala nona rai o Peruki. Sa sega ni kauaitaka na ka e vinakata vua o Jiova me cakava, de dua ni sa nanumi koya ga kei na ka e via cakava. E qai vosa vua o Jiova ena vuku i Jeremaia: “O iko o qara tiko ga na ka lelevu me nomu. Mo kua ni qara tiko na ka va qori.” (Jere. 45:​3-5) E vaka ga me tukuna tiko vua o Jiova: “Mo lomavakacegu ga ena kemu ituvaki.” E rogoca o Peruki na veivakadodonutaki qai vakadonui koya tiko ga o Jiova.

9. E uqeti keda vakacava na 1 Korinica 4:​6, 7, me donu noda rai me baleta noda ilesilesi? (Raica tale ga na iyaloyalo.)

⁹ Eso na gauna ena rairai nanuma e dua na lotu vaKarisito me lesi ena dua na itavi. De dua e tiko nona taledi, e dau gumatua, se sa dede na nona veiqaravi tu, se rawa ni tu vua na ka tolutolu qori. Ia de dua era qai lesi eso tale ena ilesilesi e vinakata tiko. Na cava me cakava? E rawa ni vakasamataka na ka e vola na yapositolo o Paula ena 1 Korinica 4:​6, 7. (Wilika.) Na itavi cava ga e lesi vei keda kei na noda taledi, e solia o Jiova. E sega ni solia qori nida vinaka cake vei ira eso tale. E ivakaraitaki ga ni nona loloma soli wale.​—Roma 12:​3, 6; Efeso 2:​8, 9.

10. Eda na vulica vakacava na yalomalumalumu?

¹⁰ Eda na vulica na yalomalumalumu, nida vakasamataka vakatitobu na ivakaraitaki nei Jisu. Dikeva mada na ka e yaco ena bogi e vuya kina na yavadratou nona yapositolo. E vola na yapositolo o Joni: “[E] kila o Jisu ni [1] sa solia o Tamana na ka kece ina ligana, [2] ni a lako mai vua na Kalou [3] ena lako tale vua na Kalou . . . e vuya sara na yavadratou na tisaipeli.” (Joni 13:​3-5) A rawa sara ga ni kaya o Jisu me vui na yavana. Ia ni bula e vuravura, e sega vakadua ni nanuma me dua nona vale vinaka, me levu nona ilavo, me marautaka tale ga nona bula. (Luke 9:58) E yalomalumalumu o Jisu, e lomavakacegu. E ivakaraitaki vinaka dina vei keda.​—Joni 13:15.

11. E uqeti Dennis vakacava na yalomalumalumu me lomavakacegu?

¹¹ E saga o Dennis mai Necaladi, me vakatotomuria na ivakaraitaki ni yalomalumalumu nei Jisu, ia e sega ni rawarawa vua. E kaya: “Eso na gauna au sa vakila niu dokadoka seu sega ni lomavakacegu, nira lesi eso tale ena itavi. Ni yaco qori, au dau vulica na ulutaga me baleta na yalomalumalumu. Ena JW Library,^® au dau vakatakilakilataka eso na tikinivolatabu me baleta na yalomalumalumu meu rawa ni raica totolo qai wilika tale. E download tale ga ena noqu talevoni eso na ivunau me baleta na yalomalumalumu, au qai rogoca wasoma.a Au vulica ni ka kece au cakava me vakalagilagi ga kina o Jiova, sega ni o yau. E tiko kece na noda itavi me vakayacori kina nona inaki.” Ke o sega tiko ni lomavakacegu ena gauna qo, saga mo bucina na yalomalumalumu. Ena dei kina nomu veitokani kei Jiova, o na rawa tale ga ni lomavakacegu.​—Jeme. 4:​6, 8.

VAKASAMATAKA VAKATITOBU NOMU INUINUI

12. Na inuinui cava eda na lomavakacegu tiko ga kina? (Aisea 65:​21-25)

¹² Eda na lomavakacegu tiko ga nida vakasamataka vakatitobu na inuinui totoka sa tu qo e matada. Eda kila ena ka e vola na parofita o Aisea, ni kila vinaka o Jiova na veika dredre eda sotava tu nikua. Ia e yalataka ni na vakaotia vakadua. (Wilika Aisea 65:​21-25.) Eda na tiko ena vale totoka, eda na sega ni lomaleqa. Eda na marautaka noda cakacaka, eda na kania na kakana bulabula qai kana vinaka. Eda na sega tale ni leqataka noda bula kei na nodra bula na luveda. (Aisea 32:​17, 18; Isik. 34:25) Ena totoka noda veisiga nimataka, ena yaco dina.

13. Na ituvaki cava meda vakasamataka kina vakalevu na noda inuinui?

¹³ Sa qai bibi tiko ga ena gauna qo meda vakasamataka vakalevu na noda inuinui. Na vuna? Nida sa bula tiko ena “iotioti ni veisiga,” na leqa tale ga eda sotava e “vakilai kina e levu na ka dredre.” (2 Tim. 3:1) Ia e vukei keda e veisiga o Jiova meda vosota ni dusimaki keda, vakaukauataki keda, e tokoni keda tale ga. (Same 145:14) Kena ikuri, na noda inuinui ena vakacegui keda ena gauna dredre. De dua o cakacaka vakaukaua mo vakarautaka na ka me ratou bula kina nomu vuvale. Vakacava kena ibalebale ni sa na dredre tu ga va qori nomudou bula? Sega! E yalataka o Jiova ni na vakarautaka na ka dou gadreva ena gauna qo, kei na levu sara ena Parataisi. (Same 9:18; 72:​12-14) De dua o vakila tiko e levu na mosi e veisiga, o lomabibi, se so tale na mate lelevu. Vakacava o sa na va tu ga qori ena nomu bula taucoko? Sega. Ena vuravura vou ni Kalou, sa na sega na tauvimate kei na mate. (Vkta. 21:​3, 4) Ena vakacegui keda na inuinui qori meda lomavakacegu ena gauna qo, eda na sega ni rarawataka na keda ituvaki. Nida sotava na veika tawadodonu, mate e dua na wekada voleka, eda tauvimate se ituvaki cava ga, eda na lomavakacegu tiko ga. Na vuna? Ke dredre vakacava na ituvaki, eda kila ni na ‘lekaleka ga na rarawa e sotavi,’ ena qai oti vakadua ena vuravura vou.​—2 Kor. 4:​17, 18.

14. Ena makare tiko ga vakacava na noda inuinui?

¹⁴ Me rawa nida lomavakacegu, e bibi sara ga noda inuinui. Ena dei tiko ga vakacava? Me vaka nona dara na matailoilo e dua me raica vinaka na ka e tu vakayawa, e vinakati tale ga meda cakava eso na ka me dei noda inuinui qai makare tiko ga noda raica na Parataisi se bera mai. Nida lomaleqataka noda bula vakailavo, meda raitayaloyalotaka se na vakacava noda bula ni sa na sega tale ni vinakati na ilavo, dinau, se na bula dravudravua. Ke da rarawataka nida sega ni lesi ena so na itavi, meda vakasamataka ni sa na sega ni bibi qori ni vakatauvatani kei na noda bula uasivi qai qaravi Jiova ena duanaudolu na yabaki. (1 Tim. 6:19) De dua ena dredre meda dau vakasamataka na gauna se bera mai ena levu ni ka eda lomaleqataka tu nikua. Ia na levu ga ni noda vakasamataka noda inuinui, eda na sega ni vakasamataka vakalevu na noda leqa.

15. Na cava o vulica ena ka e tukuna o Christa?

¹⁵ Dikeva mada na yaga ni inuinui vei Christa, na wati Dennis, sa tukuni oti mai. E kaya o Christa: “Au sa dabe tu ga ena idabedabe qiqi ni tauvi au na mate ni masela, levu na gauna au sa davo tu ga. Au mosi e veisiga. E kaya vei au o noqu vuniwai ni sa na qai ca tiko ga na kequ ituvaki. Ia au kaya ga: ‘E sega ni kila o koya na noqu inuinui.’ Au dau vakasamataka na noqu inuinui, qori na ka e vakacegui au. Ena vinakati meu vosota tiko ena vuravura qo, ia au na marautaka vakaoti na noqu bula ena vuravura vou!”

“O IRA NA REREVAKI KOYA, ERA SEGA NI LEQA ENA DUA NA KA”

16. Na cava e vola kina o Tui Tevita nira na “sega ni leqa ena dua na ka” o ira na rerevaki Jiova?

¹⁶ Ke da lomavakacegu tiko, eda na sotava tiko ga e levu na leqa. Vakasamataki Tui Tevita mada, ratou mate e tolu na luvena. E beitaki vakailasu, e liumuritaki, e veidroyaki tiko me vica vata na yabaki. Ia e lomavakacegu tiko ga ena gauna kece qori. E tukuna me baleti Jiova: “O ira na rerevaki koya, era sega ni leqa ena dua na ka.” (Same 34:​9, 10) Na cava e tukuna kina qori? Nida dauveiqaravi i Jiova eda sega ni namaka me vinaka tu ga noda bula, ia eda vakadeitaka nida na sega vakadua ni leqa ena dua na ka. (Same 145:16) Me vakataki Tevita, meda nuitaki Jiova me vakacegui keda ena gauna dredre. Eda rawa ni lomavakacegu.

17. Na cava o via vulica kina mo lomavakacegu?

¹⁷ E vinakata o Jiova mo lomavakacegu. (Same 131:​1, 2) Saga gona mo vulica na ka mo cakava mo lomavakacegu kina. Ke o sasaga mo vulica mo dau vakavinavinaka, me donu tiko ga nomu rai mo yalomalumalumu, qai vakasamataka tiko ga nomu inuinui, o na rawa ni tukuna: “Io, au lomavakacegu.”​—Same 16:​5, 6.