Sala e Vukei Keda Kina o Jiova Meda Vosota

1. Na cava e vinakati kina meda vosota? O cei ena vukei keda? (1 Pita 5:10)

E LEVU na ka dredre eda sotava ena iotioti ni veisiga qo, e vinakati gona meda vosota na tamata i Jiova. Kena ivakaraitaki, eso era tauvimate bibi. Eso e mate na wekadra lomani. Eso tale era tusaqati vei ira na wekadra, se vei ira na vakailesilesi ni matanitu. (Maciu 10:​18, 36, 37) Mo nuidei se mani cava ga o sotava tiko, ena vukei iko o Jiova mo vosota.​—Wilika 1 Pita 5:10.

2. Ena rawati vakacava na vosota?

² Na cava na ibalebale ni vosota? Oya meda yalodina tiko ga vei Jiova qai marautaka noda qaravi koya ena gauna dredre mada ga, nida tusaqati, rarawa, se nida temaki meda caka ca. Na noda rawa ni vosota ena sega ni rawati ena noda kaukaua ga, ia e vu mai vei Jiova o koya e solia vei keda “na kaukaua e uasivia na kaukaua ni tamata.” (2 Kor. 4:7) Eda na vulica ena ulutaga qo e va na ivukevuke e vakarautaka o Jiova me rawa nida vosota. Eda na vulica tale ga na sala meda vakayagataka vinaka kina na ivukevuke yadua qori.

MASU

3. Na cava e ivukevuke vakatubuqoroqoro kina na masu?

³ E vakarautaka o Jiova e dua na ivukevuke vakatubuqoroqoro me rawa nida vosota. E rawa kina nida vosa vua nida sega mada ga ni uasivi. (Iper. 4:16) Vakasamataka mada: Eda rawa ni talaucaka vei Jiova na lomada ena masu ena gauna cava ga. Na vosa cava ga eda vakayagataka, se vanua cava eda tu kina, ke da tu taudua se tu e valeniveivesu. (Jona 2:​1, 2; Caka. 16:​25, 26) Ke da nuiqawaqawa mada ga qai sega ni kila na ka meda tukuna vei Jiova, e kila vinaka o koya na ka eda via tukuna. (Roma 8:​26, 27) Io, e ivukevuke vakatubuqoroqoro dina na masu!

4. Eda kila vakacava ni salavata kei na loma i Jiova noda kerea meda vosota?

⁴ E vakadeitaka vei keda o Jiova ena nona Vosa “se cava ga eda kerea me salavata kei na lomana, ena rogoci keda o koya.” (1 Joni 5:14) Vakacava meda kerei Jiova me vukei keda meda vosota? Io! Qori e salavata kei na lomana. Eda kila vakacava? Nida vosota na veivakatovolei, ena tauca o Jiova e dua na vosa vei koya e beitaki koya tiko, o Setani na Tevoro. (Vkai. 27:11) E tukuna tale ga na iVolatabu ni vinakata sara ga o Jiova “me vakaraitaka na nona kaukaua vei ira e taucoko vua na lomadra.” (2 Vei. 16:9) Meda nuidei gona ni tu vua na kaukaua, e vinakata tale ga me vukei keda meda vosota.​—Aisea 30:18; 41:10; Luke 11:13.

5. Ena vakaceguya vakacava noda vakasama na masu? (Aisea 26:3)

⁵ E kaya na iVolatabu nida masulaka vagumatua na ka eda leqataka, ‘ena taqomaka na lomada kei na noda vakasama na vakacegu ni Kalou e uasivia na vakasama kece.’ (Fpai. 4:7) Meda raica mada na kena ibalebale. Nira sotava na ituvaki dredre o ira na sega ni qaravi Jiova, era na saga e levu na iwalewale mera vakaceguya kina nodra vakasama. Kena ivakaraitaki, eso era muria e dua na iwalewale ni vakasama vakatitobu mera vagalalataka kina nodra vakasama mai na ka kece era veinanuyaka tu, na ka mada ga era nuiqawaqawataka. Na iwalewale qori e veivakaleqai vakayalo. (Vakatauvatana Maciu 12:​43-45.) Ia na vakacegu e vakarautaka o Jiova nida masu vua, e uasivia na vakacegu e rawati ena vakasama vakatitobu sa tukuni oti mai. Nida masu vei Jiova eda vakaraitaka nida nuitaki koya vakatabakidua, ena “vakacegui [keda] tiko ga.” (Wilika Aisea 26:3.) Dua na sala e cakava kina qori o Jiova, ya noda nanuma lesu na ka dina eda vulica ena nona Vosa. Na ka dina qori ena vakaceguya noda vakasama kei na lomada nida kila ni kauaitaki keda o Jiova, e vinakata tale ga meda vakila na vakacegu.​—Same 62:​1, 2.

6. O na vakayagataka vinaka vakacava na isolisoli ni masu? (Raica tale ga na iyaloyalo.)

⁶ Na ka mo cakava. Ni vakatovolei nomu vakabauta, “biuta vei Jiova na nomu icolacola bibi” qai kerea me vakacegui iko. (Same 55:22) Mo kerea tale ga na vuku, mo rawa ni kila na ka mo cakava. (Vkai. 2:​10, 11) Ni o kerei Jiova tiko mo vosota, nanuma tale ga mo vakavinavinakataki koya. (Fpai. 4:6) Raica na sala e vukei iko tiko kina o Jiova mo vosota na kemu ituvaki, qai vakavinavinakataka nona veitokoni. Me kua ni vakabuawataka nomu rai na ituvaki dredre, mo sega kina ni raica na ka o vakalougatataki kina.​—Same 16:​5, 6.

VOSA NI KALOU

7. Eda na vosota vakacava nida vulica na iVolatabu?

⁷ E vakarautaka o Jiova na nona Vosa me rawa nida vosota. E tu kina e levu na tikinivolatabu e vakadeitaka ni tokoni keda o Jiova. Dikeva e dua na kena ivakaraitaki. E kaya na Maciu 6:8: “[E] kila na Tamamudou na ka dou vinakata ni bera mada ga ni dou kerea.” E tukuna qori o Jisu, o koya e kilai Jiova vinaka. Meda kua gona ni vakatitiqataka nona kauaitaka o Jiova na ka eda gadreva ena gauna dredre. E tu ena iVolatabu e levu tale na vosa ni yalayala i Jiova, me vakayaloqaqataki keda meda vosota.​—Same 94:19.

8. (a)Tukuna e dua na ivakavuvuli vakaivolatabu ena vukei keda meda vosota. (b) Na cava ena vakarawarawataka noda nanuma lesu eso na ivakavuvuli vakaivolatabu?

⁸ Ena vukei keda na ivakavuvuli vakaivolatabu meda vosota. E tu kina na vuku meda vakatulewa vinaka kina. (Vkai. 2:​6, 7) Kena ivakaraitaki, e uqeti keda na iVolatabu meda kauaitaka mada ga na siga nikua, meda kua ni lomaleqataka vakasivia na siga nimataka. (Maciu 6:34) Ke noda ivakarau meda dau wilika na iVolatabu e veisiga qai vakasamataka vakatitobu, ena rawarawa meda nanuma na ivakavuvuli vakaivolatabu e ganita na keda ituvaki.

9. Ena vaqaqacotaka vakacava noda vakabauta na kedra italanoa ena gauna vakaivolatabu?

⁹ E tu tale ga ena iVolatabu na kedra italanoa o ira era nuitaki Jiova qai vukei ira o koya. (Iper. 11:​32-34; Jeme. 5:17) Nida vakasamataka vakatitobu na kedra italanoa, ena vaqaqacotaka noda vakabauta ni o Jiova “e noda ivakaruru kei na kaukaua, e dau tu vakarau me vukei keda ena gauna ni rarawa.” (Same 46:1) Nida vakasamataka na nodra yalodina ena gauna sa oti, ena uqeti keda meda vakatotomuria nodra vakabauta kei na vosota.​—Jeme. 5:​10, 11.

10. O na vakayagataka vinaka vakacava na Vosa ni Kalou?

¹⁰ Na ka mo cakava. Mo wilika e veisiga na iVolatabu qai vola eso na tikina ena yaga vakalevu vei iko. Era raica e levu ni yaga me tekivu na nodra siga nira dikeva na tikinivolatabu e veimataka, me vakayaloqaqataki ira ena loma ni siga taucoko. E vakadinadinataka qori e dua na tacida o Marie,a rau kenisa ruarua nona itubutubu. E vosota vakacava ni sa vo ga e vica na vula nona qaravi rau tiko? E kaya: “Ena veimataka au na wilika na noda tikinivolatabu e veisiga qai vakasamataka vakatitobu. Niu muria na ituvatuva qori, au na nanuma kina e dua na tikinivolatabu me rawa ni dei vei au na ka e bibi sara, sega niu vakasamataka tiko ga na noqu leqa.”​—Same 61:2.

O IRA NA TACIDA

11. Nida rarawa tiko, e veiuqeti vakacava noda kila nida sega ni tiko taudua?

¹¹ E dua tale na ivukevuke e vakarautaka o Jiova meda vosota, ya o ira na tacida e veiyasa i vuravura. Nida kila nira ‘vakila tiko na tacida kece na rarawa vata ga eda sotava tiko,’ e vakadeitaka nida sega ni tiko taudua. (1 Pita 5:9) Eda nuidei gona se ituvaki cava ga eda sotava, era sotava tale tiko ga qori na tacida, era vosota tiko. Kena ibalebale eda rawa ni vosota!​—Caka. 14:22.

12. Era na tokoni keda vakacava na tacida? Cava meda cakava tale ga vei ira? (2 Korinica 1:​3, 4)

¹² Nida vosota tiko na veika dredre, era dau vakayaloqaqataki keda na tacida. E vakadinadinataka qori na yapositolo o Paula. Na gauna e vesu tu kina ena dua na vale, e dau vakavinavinakataki ira na dau vukei koya, e cavuta sara ga na yacadra. Era dau vakacegui Paula, vakayaloqaqataki koya, era vakarautaka tale ga na ka e gadreva. (Fpai. 2:​25, 29, 30; Kolo. 4:​10, 11) Eda vakadinadinataka tale ga qori nikua. Nida sotava na ituvaki dredre, era dau tu e yasada na tacida meda rawa ni vosota; na gauna tale ga era vinakata kina noda veitokoni, eda na tu e yasadra.​—Wilika 2 Korinica 1:​3, 4.

13. E vosota vakacava e dua na tacida yalewa o Maya?

¹³ Ena 2020, era curuma na ovisa nona vale e dua na tacida yalewa mai Rusia o Maya, mera vaqaqara. Ia era vakayaloqaqataki Maya na mataveitacini. Oti sa qai lai vakamacalataka ena mataveilewai na vuna e vunau tiko ga kina. E kaya: “Ena gauna qori au oca, au nuiqawaqawa, au rarawa tale ga. Era qiri mai na mataveitacini, era volavola mai, era kaya nira lomani au. Au sa kila tiko niu lewena e dua na vuvale levu era dau loloma. Au sa qai vakadinadinataka qori ena 2020.”

14. Na cava mo cakava me yaga vei iko nodra veitokoni na tacida? (Raica tale ga na iyaloyalo.)

¹⁴ Na ka mo cakava. Ni o vosota tiko na ka dredre, kabiti ira tiko ga na mataveitacini. Kua ni tu suka mo kerea nodra veivuke na qase ni ivavakoso. Era “ivunivuni mai na cagi, na idrodro mai na uca bi.” (Aisea 32:​2, vmr.) Mo nanuma tale ga nira vosota tiko na tacida na veika dredre. Ni o caka vinaka vua e dua na tacida e rarawa tiko, o na marau ni o vosota tale tiko ga na kemu ituvaki.​—Caka. 20:35.

NODA INUINUI

15. E yaga vakacava na inuinui vei Jisu kei keda? (Iperiu 12:2)

¹⁵ E vakarautaka vei keda o Jiova e dua na inuinui e dei me rawa nida vosota. (Roma 15:13) Vakasamataka na yaga ni inuinui qori vei Jisu me vosota kina na siga dredre duadua e vuravura. (Wilika Iperiu 12:2.) E kila o Jisu ni nona yalodina ena vakalasui kina na ka kece e tukuna o Setani me baleta na yaca i Jiova. E vakanamata tale ga o Jisu me lai sota tale kei Tamana, toso na gauna me veiqaravi tale ga kei ira na tacina ena Matanitu vakalomalagi. Na noda inuinui tale ga ni bula tawamudu ena vuravura vou, ena uqeti keda meda vosota na ka dredre cava ga ena vuravura i Setani.

16. E yaga vakacava na inuinui vua e dua na tacida yalewa? Cava o vulica ena ka e tukuna?

¹⁶ Dikeva na yaga ni inuinui vua e dua na tacida mai Rusia o Ala, e vesu o watina qai lai wawa veilewai tiko e valeniveivesu. Ni yaco qori, e kaya o Ala: “Au dau masulaka noqu inuinui qai vakasamataka tiko ga meu kua kina ni yalolailai. Au kila ni dua na gauna ena oti na ituvaki qo. Ena qaqa o Jiova, ena vakalougatataki keda tale ga.”

17. Eda na vakaraitaka vakacava nida marautaka na noda inuinui? (Raica tale ga na iyaloyalo.)

¹⁷ Na ka mo cakava. Me tiko na gauna mo vakasamataka kina na inuinui totoka e vakarautaka tu vei iko o Jiova. Raici iko ni o sa tu ena vuravura vou ni Kalou qai raitayaloyalotaka na ka eda na vakalougatataki kina. Meda nanuma tale ga ni ka dredre eda sotava ena gauna qo ena “lekaleka qai mamada ga.” (2 Kor. 4:17) Kena ikuri, saga ena nomu vinaka mo wasea na ka o vakabauta. Vakasamataka mada na levu ni ka dredre era sotava tiko o ira na sega ni qaravi Jiova, era sega tale ga ni kila nona yalayala ena gauna se bera mai. O na rawa ni uqeta na lomadra, ni o vakamacalataka mada ga vakalekaleka na noda inuinui.

18. Na cava meda nuitaka kina na yalayala i Jiova?

¹⁸ Ni yalodina o Jope ena ituvaki dredre kece e sotava, e tukuna vei Jiova: “Au sa qai kila qo ni oni rawata na ka kece, e sega tale ga ni dredre moni cakava na ka oni vakasamataka.” (Jope 42:2) E vulica o Jope ni sega ni dua na ka e tarovi Jiova me vakayacora nona inaki. Qori ena uqeti keda meda vosota. Kena ivakaraitaki, vakasamataka mada na nona yalolailai e dua na marama e tauvimate dede tu. Sa raica oti e vica na vuniwai, e sega ga ni dua e vakabulai koya rawa. Ia e qai raica tale e dua na vuniwai vinaka. Na gauna e vakamacalataka kina vua na kena mate kei na sala me wali kina, e lomavakacegu sara ga. Ia ena taura toka na gauna me qai bula vinaka. Ena vosota na kena mate ni kila tiko ni dua na gauna sa na bula vinaka. Eda na vosota tale ga nikua nida kila tiko, ni na yaco dina na noda inuinui me baleta na Parataisi.

19. Na cava meda cakava me rawa nida vosota?

¹⁹ Eda sa vulica mai ni vakarautaka o Jiova e va na ivukevuke me rawa nida vosota kina. Qori na masu, nona Vosa, ira na tacida, kei na noda inuinui. Nida vakayagataka vinaka na ivukevuke qori, ena tokoni keda tiko o Jiova ena ituvaki dredre kece me yacova ni sa vakarusai o Setani kei na ituvaki dredre.​—Fpai. 4:13.