“Kacivi Ira na Qase”

1. E vakaraitaka vakacava o Jiova ni mareqeti ira nona sipi?

O JIOVA e mareqeti ira nona sipi. E voli ira ena dra i Jisu qai lesi ira na qase ni ivavakoso mera karoni ira. (Caka. 20:28) E vinakata o Jiova mera mareqeti nona sipi. Nira muria na qase na veidusimaki i Karisito, era na vakayaloqaqataki na sipi, era na taqomaki tale ga vakayalo.—Aisea 32:1, 2.

2. O cei e via vukea o Jiova? (Isikeli 34:15, 16)

² E kauaitaki ira vakalevu nona sipi o Jiova, ia e vinakata me vukei ira na rarawa tiko. Ena vukei ira gona vakayalo ni vakayagataki ira na qase. (Wilika Isikeli 34:15, 16.) E vinakata meda kerea nodra veivuke na qase nida rarawa tiko. Ena gauna qori, eda na masu vagumatua vei Jiova me vukei keda, eda kerea tale ga nodra veivuke ‘na ivakatawa kei na qasenivuli’ ena ivavakoso.—Efeso 4:11, 12.

3. Ena yaga vakacava vei keda noda kila vinaka nodra itavi na qase?

³ Eda na veivosakitaka ena ulutaga qo na ituvatuva i Jiova meda vukei kina vakayalo ni vakayagataki ira na qase. Eda na sauma kina e vica na taro qo: Na gauna cava meda kerea kina nodra veivuke na qase? Na cava meda cakava kina? Era na vukei keda vakacava? Ke da sega mada ga ni rarawa tiko ena gauna qo, noda kila na isaunitaro qori eda na vakavinavinakataka kina vakalevu na ituvatuva i Jiova, ena rawa tale ga ni vakabulai keda.

GAUNA CAVA MEDA ‘KACIVI IRA KINA NA QASE’?

4. Na cava eda kaya kina ni tukuni ena Jemesa 5:14-16, 19, 20 na tauvimate vakayalo? (Raica tale ga na iyaloyalo.)

⁴ E vakamacalataka na tisaipeli o Jemesa na ituvatuva ni Kalou meda vukei kina vakayalo, e taroga: “E dua vei kemuni e tauvimate tiko? Me kacivi ira na qase ni ivavakoso.” (Wilika Jemesa 5:14-16, 19, 20.) Eda kila ena tikinivolatabu qori ni tukuna tiko o Jemesa na tauvimate vakayalo. Ena sala cava? Ni tukuni vei koya e tauvimate me kacivi ira na qase mera vukei koya, sega ni vuniwai. E tukuna tale ga o Jemesa ni na bula vinaka o koya e tauvimate vakayalo ni sa vosoti nona ivalavala ca. Kena ibalebale, e tautauvata na ka me cakava e dua e tauvimate kei na ka me cakava e dua e tauvimate vakayalo. Nida tauvimate eda na lai raici vuniwai, eda vakamacalataka na keda mate qai muria na ka e tukuna. Nida tauvimate tale ga vakayalo, meda lai raica e dua na qase, eda vakamacalataka na keda ituvaki qai muria nona ivakasala vakaivolatabu.

5. Eda na kila vakacava nida sa malumu tiko vakayalo?

⁵ E uqeti keda na ituvatuva e tukuni ena Jemesa wase 5 meda lai raici ira na qase nida vakila nida sa malumu tiko vakayalo. E vinaka meda vukei, ni bera ni vakaleqai vakadua noda veiwekani kei Jiova! E bibi meda kila ni dodonu meda vukei. E kaya na iVolatabu ni rawa nida dabui keda ena vuku ni keda ituvaki vakayalo. (Jeme. 1:22) Era cakava qori eso na lotu vaKarisito e Sariti, ia e tukuna vakadodonu vei ira o Jisu na kedra ituvaki vakayalo. (Vkta. 3:1, 2) Dua na sala meda dikeva kina noda bula vakayalo, ya nida vakatauvatana noda gumatua ena gauna qo kei na gauna sa oti. (Vkta. 2:4, 5) Meda taroga: ‘Au sa sega ni taleitaka na wili iVolatabu kei na vakasama vakatitobu? Au sega ni vakavakarau vinaka ena soqoni qai calata vakalevu? Au sa sega ni gumatua ena cakacaka vakaitalatala? Au dau vakasamataka vakalevu na ilavo ena gauna qo, au vakayagataka tale ga vakalevu noqu gauna ena ka ni veivakamarautaki?’ Ke o vakaio ena dua na taro qori, e dusia ni o sa malumu tiko vakayalo. Ke o sega ni veisau, ena ca sara. Ke sega ni rawa nida walia vakataki keda noda malumalumu se da beca kina eso na ivakatagedegede ni Kalou, meda kerea nodra veivuke na qase.

6. Na cava mera cakava o ira na valavala ca bibi?

⁶ E macala ni vinakati mera lai raica e dua na qase o ira na cakava na ivalavala ca bibi, ni rawa nira biu tani kina mai na ivavakoso. (1 Kor. 5:11-13) Ni dua e valavala ca bibi, ena sega ni rawa ni vakavinakataka vakataki koya nona veiwekani kei Jiova. Me rawa ni vosoti keda o Jiova ena vuku ni ivoli, e bibi meda “cakava na ka e vakaraitaka [nida] sa veivutuni.” (Caka. 26:20) Qori e okati kina noda lai raici ira na qase ke da valavala ca bibi.

7. O cei tale mera kerea nodra veivuke na qase?

⁷ Era sega wale ga ni vukei ira na valavala ca bibi na qase, era vukei ira tale ga na malumu vakayalo. (Caka. 20:35) Kena ivakaraitaki, o na rairai lomaleqa ni o sega ni vorata rawa na gagadre ca. Ena sega ni rawarawa qori ke o dau bobula ena waigaga ni veivakamatenitaki, sara iyaloyalo vakasisila, se o dau veiyacovi tawadodonu ni bera ni o kila na dina. Kua ni rere mo kere veivuke. O rawa ni lai raica e dua na qase ena rogoca vinaka nomu lomaleqa, ena solia na ivakasala veiganiti, ena vakadeitaka tale ga ni o rawa ni vakamarautaki Jiova ke o cata mo cakava na ka ca. (Dauv. 4:12) Ke o yalolailai ni dredre mo vorata tiko ga, ratou na tukuna vei iko na qase ni qori e rawa ni dusia ni o saga me vinaka tiko ga nomu veiwekani kei Jiova, o sega ni nuitaki iko vakasivia.—1 Kor. 10:12.

8. Meda kauta vei ira na qase na noda leqa kece? Vakamacalataka.

⁸ E sega ni tukuni meda kauta vei ira na qase noda leqa kece. Kena ivakaraitaki, kaya mada ke o tukuna e dua na ka mosimosi vua e dua na tacimu, de dua o sega ni lewa rawa nomu cudru. Sega ni tukuni mo lai raici ratou sara na qase, ia o rawa ni muria na ivakasala i Jisu ena sala mo veiyaloni kina kei na tacimu qori. (Maciu 5:23, 24) O rawa ni vakekeli ena so na ulutaga me vaka na yalomalua, vosovoso, kei na lewa vinaka, mo rawa ni vakaraitaka na itovo kece qori ena dua tale na gauna. Ia ke o sega tiko ga ni walia rawa nomu leqa, mo kerea e dua na qase me vukei iko. Ena nona ivola na yapositolo o Paula vei ira e Filipai, e kerea e dua na tacida tagane e sega ni tukuni na yacana, me vukei rau o Uotia kei Sainitiki me rau walia nodrau duidui. Ena rawa tale ga ni vukei iko va qori e dua na qase ena nomu ivavakoso.—Fpai. 4:2, 3.

NA CAVA MEDA KACIVI IRA KINA NA QASE?

9. Na cava meda kua kina ni madua ni kacivi ira na qase? (Vosa Vakaibalebale 28:13)

⁹ Nida cakava e dua na ivalavala ca bibi, se da kila nida sega ni vorata rawa e dua noda malumalumu, e vinakati na vakabauta kei na yaloqaqa meda kerea kina na veivuke. Meda kua ni madua ni kacivi ira na qase. Na vuna? Nida muria na ituvatuva i Jiova, eda vakaraitaka nida nuitaki koya kei na nona veidusimaki meda kaukaua tiko ga kina vakayalo. Eda kila ni vinakati nona veivuke ke da sa voleka ni bale. (Same 94:18) Ia ke da valavala ca, ena lomani keda na Kalou nida vakatusa qai biuta.—Wilika Vosa Vakaibalebale 28:13.

10. Na cava ena yaco ke da saga meda vunitaka noda ivalavala ca?

¹⁰ Eda na vakalougatataki ke da tukuna vakadodonu vei ira na qase na noda cala. Ke da saga meda vunitaka, eda na sotava ga na leqa. Ni saga o Tui Tevita me vunitaka nona ivalavala ca, e vakaleqai koya vakayalo, vakayago, e sega tale ga ni lomavakacegu. (Same 32:3-5) Me vaka ga nida tauvimate se mavoa, ena qai ca sara noda tauvimate vakayalo ke sega ni wali totolo. E kila tiko qori o Jiova, ya na vuna e sureti keda kina meda “veivosaki vakadodonu” kei koya nida vakayagataka na ivukevuke meda vakabulai kina vakayalo.—Aisea 1:5, 6, 18.

11. Na cava tale ena yaco ke da vunitaka noda cala bibi?

¹¹ Ke da vunitaka noda cala bibi, ena rawa ni vakaleqai ira eso tale. Rawa ni tarova na kena sobuta na ivavakoso na yalo tabu, ena vakaleqa tale ga noda veiyaloni. (Efeso 4:30) Ke da kila tale ga ni cala bibi e dua ena ivavakoso, meda uqeti koya me lai raici ratou na qase.a Nida vunitaka tiko nona cala bibi e dua tale na tacida, ena vakavuna na ora ni lomada. (Vunau 5:1) Nida lomani Jiova, eda na lai tukutuku vakadodonu vei ratou na qase. Nida cakava qori, eda veivuke ena kena savasava tiko ga na ivavakoso, eda vukei ira tale ga na caka cala me vinaka tale nodra veiwekani kei Jiova.

ERA VUKEI KEDA VAKACAVA NA QASE?

12. Sala cava era na vukei ira kina na malumalumu vakayalo na qase?

¹² Era vakavulici na qase ni ivavakoso mera tokoni ira na malumalumu vakayalo. (1 Ces. 5:14) Ke o caka cala, era na rawa ni taroga na qase eso na taro e vakasamataki vakavinaka, mera “takiva mai” na ka e tu e lomamu kei na nomu vakanananu. (Vkai. 20:5) O na vukei ira ni o talaucaka vakadodonu na lomamu, ke dredre mada ga mo cakava qori ena vuku ni nomu itovo vakavanua, nomu itovo, se o maduataka na ka o cakava. Kua ni lomaleqataka ke tau “vakalialia” na nomu vosa. (Jope 6:3) Era na sega ni vakalewai iko na qase, ia era na saga mera vakarorogo vinaka mera kila na dina ni ka o sotava tiko ni bera nira veivakasalataki vakaivolatabu. (Vkai. 18:13) Era kila ni taura na gauna mera vakatawai na qelenisipi, era na sega gona ni namaka me wali na leqa ena imatai ga ni veivosaki.

13. Era na vukei keda vakacava na qase ena nodra masu kei na nodra veivakasalataki vakaivolatabu? (Raica tale ga na iyaloyalo.)

¹³ Ni o kacivi ira na qase, era na saga mera kua tale ni kuria na ora ni lomamu. Ia era na masulaki iko. De dua o na sega sara ga ni vakabauta ni “yaga vakalevu” na nodra masu. Era na vukei iko tale ga nira “lumuti [iko] ena waiwai ena yaca i Jiova.” (Jeme. 5:14-16) Na “waiwai” qori e dusia na ka dina ena Vosa ni Kalou. Nira vakayagataka vakamaqosa na iVolatabu, era na vakacegui iko, era na vukei iko tale ga me vinaka tale nomu veiwekani kei Jiova. (Aisea 57:18) Na nodra veivakasalataki mai na iVolatabu, ena vakayaloqaqataki iko mo cakava tiko ga na ka dodonu. E vakayagataki ira o Jiova mo rogoca kina na domona: “Qo na sala. Moni lako kina.”—Aisea 30:21.

14. Me vaka e tukuni ena Kalatia 6:1, era na vukea vakacava na qase e dua e “butucala”? (Raica tale ga na iyaloyalo.)

¹⁴ Wilika Kalatia 6:1. Na lotu vaKarisito e “butucala” e sa sega ni muria na ivakatagedegede dodonu ni Kalou. Nona butucala e rawa ni dusia nona vakatulewa ca, se cakava na ivalavala ca bibi. Era na “saga” na qase dauloloma mera “vakadodonutaki koya ena yalomalua.” Na vosa vaKirisi ni ‘vakadodonutaka,’ e rawa tale ga ni vakaibalebaletaka na kena moici na sui sa veisivi tu me biu tale vakadodonu. Me vaka ga nona saga na vuniwai vinaka me biuta lesu na sui sa ramusu me kua ni kuria na mosi, era na saga tale ga na qase mera vakabulai keda vakayalo, ia mera kua ni kuria tale noda mosi. Kena ikuri, era dusimaki na qase mera “qarauni” ira. Nira vukei keda meda vakadodonutaka noda sala, era kila tiko nira sega tale ga ni uasivi, e rawa nira butucala. Era na sega ni vakaraitaka na qase nira uasivi keda, yalododonu sivia, se ra veivakalewai, ia era na saga mera yalololoma.—1 Pita 3:8.

15. Na cava meda cakava ke tiko noda leqa?

¹⁵ Meda nuitaki ira na qase ni noda ivavakoso. Era vakavulici mera maroroya na keda itukutuku, mera yavutaka nodra ivakasala ena Vosa ni Kalou sega ni nodra rai, mera veivuke tale ga ni colata noda icolacola. (Vkai. 11:13; Kala. 6:2) E duidui nodra itovo kei na levu ni ka era kila, ia meda kua ni tu suka meda raica e dua vei ira ke da sotava na leqa. Ia eda na sega ni lai kerea yadudua nodra ivakasala na qase nida via rogoca ga na ivakasala e rogovinaka vei keda. Ke da cakava qori, eda na vakataki ira era digia ga na ka era ‘via rogoca e daligadra,’ eda sega ni via kila “na ivakavuvuli dina” ena Vosa ni Kalou. (2 Tim. 4:3) Nida lai raica e dua na qase me baleta noda leqa, de dua ena taroga ke da sa raica oti eso tale na qase kei na ivakasala cava era tukuna. Nona yalomalumalumu na qase qori, ena rawa ni lai taro ivakasala vua e dua tale na qase ni ivavakoso.—Vkai. 13:10.

NODA ITAVI YADUA

16. Na cava na noda itavi?

¹⁶ Nida sipi i Jiova, era na yadravi keda vakayalo na qase, ia era na sega ni tukuna vei keda na ka meda cakava. E tiko na noda itavi, ya meda vakaraitaka ena ka kece eda cakava e veisiga nida lomani Jiova vakalevu. Eda na dui saumitaro gona vua na Kalou ena ka eda tukuna se cakava. Ena tokoni keda meda yalodina tiko ga ena ituvaki eda sotava. (Roma 14:12) Qori na vuna era na sega ni tukuna kina vei keda na qase na ka meda cakava, ia era na yavutaka nodra ivakasala ena Vosa ni Kalou meda kila na rai i Jiova. Nida muria nodra ivakasala vakaivolatabu, eda sa vakavulica tiko noda “vakasama” meda vakatulewa vinaka.—Iper. 5:14.

17. Na cava meda vakadeitaka?

¹⁷ Eda vakavinavinaka ni okati keda o Jiova meda nona sipi mareqeti! O Jiova e tala mai “na ivakatawa vinaka” o Jisu me keda ivoli, me rawa nida rawata kina na bula tawamudu. (Joni 10:11) E vakayagataki ira tale ga na qase o Jiova me vakayacori kina na ka e yalataka: “Au na solia vei kemuni na ivakatawa era donu e lomaqu, era na vakani kemuni ena kilaka kei na yalomatua.” (Jere. 3:15) Nida malumu se tauvimate vakayalo, meda kua ni tu suka ni kacivi ira na qase mera vukei keda. Meda vakadeitaka mada ga meda vakayagataka vinaka na isolisoli i Jiova, qori o ira na qase ni ivavakoso.