Era na Tataleitaki “na Yalomalumalumu”

1. E duidui vakacava nodra taleitaka eso na itukutuku vinaka? (Cakacaka 13:47, 48; 16:14, 15)

LEVU ena imatai ni senitiuri era taleitaka na ka dina ena gauna ga era rogoca kina na itukutuku vinaka. (Wilika Cakacaka 13:47, 48; 16:14, 15.) Nikua, era taleitaka tale ga eso na itukutuku vinaka ena imatai ni gauna era rogoca kina. Ia vei ira na sega ni taleitaka ena imatai ni gauna, era na qai taleitaka ena dua tale na gauna nira sa dolava na lomadra. Na cava meda cakava nida kunei ira “na yalomalumalumu” ena yalava?

2. E tautauvata vakacava noda cakacaka ni veivakatisaipelitaki kei na ka e cakava e dua na dauteitei?

² Dikeva na ivakatautauvata qo. Na noda cakacaka ni veivakatisaipelitaki e vaka na ka e dau cakava na dauteitei. Ni cukicuki se teitei tiko ena nona were qai raica ni sa dreu na vuata ena dua na vunikau, sa na betibeti sara ga. E va tale ga qori nida kunea e dua na tataleitaki, eda na vukei koya me tisaipeli i Karisito ena gauna totolo duadua. Ia vei ira na se bera ni tataleitaki, eda na vukei ira tiko ga mera kila ni bibi na itukutuku eda wasea vei ira. (Joni 4:35, 36) Nida yalomatua, eda na kila na iwalewale ena ganiti ira. Meda raica mada na ka meda cakava ena imatai ni veivosaki meda vukei ira kina na tataleitaki. Eda na vulica tale ga na sala meda vukei ira kina mera toso tiko ga.

NIRA SA TATALEITAKI

3. Na cava meda cakava nira sa kune na tataleitaki? (1 Korinica 9:26)

³ Nira sa kune na tataleitaki ena cakacaka vakavunau, eda na vukei ira sara ga mera tekivu muria na sala ina bula. Eda na cakava qori nida sureti ira mera vulica na iVolatabu, mera tiko tale ga ena soqoni ena imatai ni gauna eda veivosaki kina.—Wilika 1 Korinica 9:26.

4. Tukuna nona ivakaraitaki e dua e sa tu vakarau me vuli iVolatabu.

⁴ Veisureti ena vuli iVolatabu. Eso era via vuli iVolatabu nida veivosaki oti ga. Kena ivakaraitaki, e lako ina qiqi e dua na goneyalewa mai Kenada ena Lotulevu qai taura na brochure Marau me Tawamudu!. E kaya na tacida yalewa e tiko ena qiqi ni rawa ni vulica na iVolatabu ena brochure qori. E tataleitaki sara o goneyalewa, mani solia nona naba ni talevoni. Ena yakavi ya, e vakau itukutuku vei tacida yalewa me baleta nodrau vuli. Ni tukuna na tacida me gole yani ena muanimacawa, e kaya o koya: “Vacava ga nimataka? Au galala.” Rau mani vuli ena Vakaraubuka qori. Oti, e lai soqoni ena kena muanimacawa, e toso vinaka tale ga vakayalo.

5. Eda na vakaraitaka vakacava na yalomatua nida veisureti ena vuli iVolatabu? (Raica tale ga na iyaloyalo.)

⁵ Meda kua ni namaka nira na tataleitaki e levu me vaka na goneyalewa ya. Eso era na qai tataleitaki ni toso na gauna. De dua meda tekivu ena dua na ulutaga era taleitaka. Ia ke donu tiko noda rai qai kauaitaki ira tiko ga, sa rawa sara ga nira vulica na iVolatabu. Na cava meda tukuna nida veisureti ena vuli? E tarogi qori vua eso na tacida e vuavuaivinaka nodra tekivuna na vuli iVolatabu.

6. Na cava eda rawa ni tukuna me tomani na veivosaki kei na dua e tataleitaki?

⁶ Era kaya na dautukutuku kei na painia era tarogi, nira veisureti ena vuli iVolatabu ena so na vanua, e vinaka mera kua ni cavuta eso na vosa me vaka na “vuli,” “porokaramu ni vuli iVolatabu,” se “meu vakavulici iko.” Era kaya ni vinaka me tukuni ga na “veitalanoa,” “veivosaki,” se “kila eso tale na ka ena iVolatabu.” Me tomani na veivosaki, o rawa ni tukuna: “Eda kurabui ni levu noda taro e sauma ga na iVolatabu,” se “Na iVolatabu e sega ni ivola ga ni lotu, ia e yaga na kena ivakasala.” O rawa tale ga ni kaya: “Mo vulica eso na ka yaga, ena sega ni balavu sara, ena 10 se 15 ga na miniti.” Me kua tale ni tukuni na “lokuci” se “veimacawa,” nira na nanuma nida vakaosoosotaki ira.

7. Na gauna cava era mai kila kina na ka dina eso? (1 Korinica 14:23-25)

⁷ Sureti ira ena soqoni. Kena irairai ena nona gauna na yapositolo o Paula, era mai kila na ka dina eso nira tiko ena soqoni vaKarisito. (Wilika 1 Korinica 14:23-25.) E va tale ga qori nikua. Era toso totolo e levu nira mai tiko ena noda soqoni. Na gauna cava mo sureti ira kina? Ena lesoni 10 ni ivola Marau me Tawamudu!, era sureti kina na gonevuli mera tiko ena soqoni, ia meda kua ni waraka sara mera vulica na lesoni qori ra qai sureti. Ena imatai ga ni nomudrau veivosaki, o rawa sara ga ni sureti koya ena soqoni ena muanimacawa, de dua mo tukuna vua na ulutaga ni vunau soqovi levu, se na ka ena vulici ena Vale ni Vakatawa ena macawa qori.

8. Na cava meda tukuna vua e dua eda sureta ina soqoni? (Aisea 54:13)

⁸ Nida sureta e dua na tataleitaki ina soqoni, mo kaya ni duidui na noda soqoni mai na nona lotu. Kena ivakaraitaki, ni se qai tiko vakadua ena vulici ni Vale ni Vakatawa e dua na vuli iVolatabu, e tarogi nona qasenivuli: “O koya e taura na vuli e kila kece na yacada?” E kaya na tacida yalewa nida dau saga meda kila kece na yacadra ena ivavakoso, me vaka ga noda kila vinaka na yacadra na noda lewenivuvale. E raica o gonevuli ni duatani sara qo mai na nona lotu. Era va tale ga qori e levu, era raica ni duidui na inaki ni noda soqoni. (Wilika Aisea 54:13.) Eda lai soqoni meda sokaloutaki Jiova, eda vuli vua, meda veivakayaloqaqataki. (Iper. 2:12; 10:24, 25) Qo na vuna e tuvanaki kina vakamatau noda soqoni, e yaga qai sega ni caka kina na ka vakavanua. (1 Kor. 14:40) Na neimami Vale ni Soqoni e tara vakarawarawa ga me vanua ni vuli. Keimami sega tale ga ni veivosakitaka na politiki, ni keimami tawaveitovaki. Kena ikuri, keimami sega ni veibataka na ka eda vakatulewa yadua kina. Ena yaga vakalevu me sarava rawa o gonevuli na vidio Na Cava e Caka ena Vale ni Soqoni?, me kila kina na ka me namaka ena soqoni.

9-10. Eda na vakadeitaki koya vakacava e mai soqoni nida na sega ni vakaukauataki koya me mai lewenilotu se vakaitavi? (Raica tale ga na iyaloyalo.)

⁹ Era lomalomarua eso mera mai soqoni nira lomaleqataka nira na kerei mera “sa mai lewenilotu.” Vakadeitaka vua nida dau marautaka meda vakavulagi, eda sega ni vakaukauataki ira mera mai lewenilotu se mera mai vakaitavi. Era sureti na vuvale kei na gone. Ena noda soqoni, era sega ni vakavulici tani na gone. Ia era dabe vata na itubutubu kei na luvedra mera vuli vata. Ni caka qori, era na kila kina na itubutubu o cei e veimaliwai tiko kei luvedra kei na ka era vulica. (Vkru. 31:12) E sega ni caka na soli se veisoliyaki na kena waqanivola. Ia keimami muria na ivakaro i Jisu: “E soli wale vei kemudou, dou solia wale tale ga.” (Maciu 10:8) O rawa tale ga ni tukuna vua ni sega ni vinakati me dara mai na isulu saulevu. E raica na Kalou na lomada, sega ni keda irairai.—1 Sam. 16:7.

¹⁰ Ke sa gole mai na soqoni, mo kauaitaki koya vinaka. Veikilaitaki koya kei ratou na qase ni ivavakoso kei ira na vo ni mataveitacini. Ke kila ni lomani, de dua ena via lesu tale mai. Ke o raica ni sega nona iVolatabu ena gauna ni soqoni, drau vakayagataka vata na nomu, vukei koya me kila na ka e vakamacalataki tiko ena ivunau se na ka eda vulica.

NI SA TEKIVU NA VULI

11. O na vakaraitaka vakacava ni o doka nona gauna o gonevuli kei na nona ituvatuva?

¹¹ Na cava eso na ka meda nanuma tiko nida caka vuli iVolatabu ena nona vale? Doka nona gauna kei na nona ituvatuva. Kena ivakaraitaki, ke o lokuca na gauna, mo yaco donu yani, ke ra sega mada ga ni raica vakabibi na gauna ena vanua qori. Kena ikuri, de dua ena vinaka me lekaleka ga na imatai ni vuli. Era vakatututaka eso na dautukutuku matua ni vinaka me oti totolo na vuli, ke se via vuli tiko ga o gonevuli. Kua tale ga ni talimagimagi. Laivi gonevuli me vakamacala.—Vkai. 10:19.

12. Na cava me noda isausau ni se qai tekivu ga na vuli iVolatabu?

¹² Ni se qai tekivu ga na vuli iVolatabu, me nomu isausau mo vukei gonevuli me kilai Jiova kei Jisu, me bucina tale ga nona lomani rau. O na cakava vakacava? O na vakabibitaka ga na Vosa ni Kalou, sega ni nomu rai se nomu kila vakaivolatabu. (Caka. 10:25, 26) E dau vakabibitaka na yapositolo o Paula na ka e vakavulica o Jisu Karisito, ni tala mai o Jiova me vukei keda meda kila vinaka na Kalou, meda lomani koya tale ga. (1 Kor. 2:1, 2) E vakamatatataka tale ga o Paula ni bibi meda vukei ira na tisaipeli vou mera bucina eso na itovo vinaka, e vakatauvatani kei na koula, siliva kei na vatutalei. (1 Kor. 3:11-15) Na itovo vinaka qori e wili kina na vakabauta, vuku, yalomatua kei na rerevaki Jiova. (Same 19:9, 10; Vkai. 3:13-15; 1 Pita 1:7) Mo vakatotomuria gona na iwalewale ni veivakavulici i Paula ni o vukei ira nomu gonevuli me dei nodra vakabauta kei na nodra veiwekani voleka kei na Tamadra vakalomalagi.—2 Kor. 1:24.

13. Eda na vakaraitaka vakacava na vosovoso kei na yalorawarawa nida vukei ira na tataleitaki? (2 Korinica 10:4, 5) (Raica tale ga na iyaloyalo.)

¹³ Meda muria na iwalewale ni veivakavulici i Jisu nida vakaraitaka na vosovoso kei na yalorawarawa. Meda kua ni taroga na ka ena vakavu madua. Ke dredre me kila vinaka eso na ka e vulica, kua ni veivosakitaka tiko ga, me toso ga nomudrau vuli qai lesuva tale mai. Ke dredre me vakabauta e dua na ivakavuvuli, solia vua na gauna me vakawakana e lomana na ka dina. (Joni 16:12; Kolo. 2:6, 7) E tukuna na iVolatabu ni ivakavuvuli lasu e vaka e dua na ka sa vakawakana tu, e vinakati me talaraki. E vakayagataka na iVolatabu na kena vosa taumada ni vaka tiko e dua na valececere e vinakati me basuraki. (Wilika 2 Korinica 10:4, 5) Mo kua gona ni basuraka nona valececere nomu gonevuli, ia mo vukei koya ga me nona iVakaruru o Jiova.—Same 91:9.

NIRA MAI SOQONI NA KA VOU

14. Meda raici ira vakacava na ka vou era mai soqoni?

¹⁴ E vinakata o Jiova meda kua ni vakaduiduitaki ira na ka vou, se vanua cava era lako mai kina, era dravudravua se vutuniyau, se nodra isususu. (Jeme. 2:1-4, 9) Eda vakaraitaka vakacava na loloma vei ira na ka vou era mai soqoni?

15-16. Eda na kauaitaki ira vakacava na ka vou ena soqoni?

¹⁵ Kena irairai era mai soqoni eso nira via kila na ka e dau caka kina, se uqeti ira e dua tale. Meda kua gona ni tu suka meda vosa vei ira. Meda kauaitaki ira, ia me kua ga ni sivia tale. Kerei koya mo drau dabe vata. Drau vakayagataka vata nomu iVolatabu kei na ivola e vulici, se solia e dua na nodra. Meda kauaitaka tale ga nodra rai. Kena ivakaraitaki, e kaya e dua na turaga e mai soqoni vua na tacida tagane e kauaitaki koya ni leqataka nona isulusulu. E vakacegui koya na tacida qori ni tukuna nida vakataki koya ga na iVakadinadina i Jiova. E lai papitaiso sara na turaga qori, ia e sega ni guilecava rawa na ka e tukuna vua na tacida. Qo e dua na ka meda qarauna: Nida kauaitaki ira na ka vou ni bera na soqoni se ni sa oti, meda kua ni siova na ka e sega ni dodonu meda kila.—1 Pita 4:15.

¹⁶ Eda na kauaitaki ira tale ga na vulagi, ni veidokai noda ivosavosa, ivakamacala, kei na noda itavi ena soqoni nida vakamacalataka e dua na ka me baleti ira se na nodra vakabauta. Meda kua ni tukuna eso na vosa ena rawa ni vakatarabetaki ira se ra beci kina. (Taito 2:8; 3:2) Kena ivakaraitaki, eda na sega ni veivosakitaka e dua na ka era vakabauta ena sala mera beci kina. (2 Kor. 6:3) Era na qaqarauni sara ena tikina qori na tacida era vunau ena buturara. Era na nanumi ira tale ga na vulagi era sureti nira vakamacalataka eso na vosa era sega ni kila na kena ibalebale.

17. Na cava meda cakava nida kunei ira “na yalomalumalumu”?

¹⁷ Sa qai bibi tiko ga e veisiga noda cakacaka ni veivakatisaipelitaki. Eda na vaqarai ira tiko ga “na yalomalumalumu era muria na sala mera bula tawamudu.” (Caka. 13:48) Nida sa kunei ira, meda sureti ira sara ga mera vulica na iVolatabu, mera lako tale ga ina soqoni. Nida cakava qori, eda sa vukei ira tiko mera muria “na sala e basika ina bula.”—Maciu 7:14.