ULUTAGA NI VULI 49
SERE 44 Nodra Masu na Yalomalua
Mo Vuli ena iVola i Jope ni o Veivakasalataki
“Qo, rogoca mada noqu vosa Jope.”—JOPE 33:1.
KA E VAKABIBITAKI
Eda na vulica ena ivola i Jope na sala me yaga kina noda ivakasala.
1-2. Na cava ratou sega ni namaka na tolu na itokani nei Jope kei Ilaiu?
E VAKA e kama na veigasau na itukutuku i Jope vei ira ena Tokalau. Sa vakarusai na ka kece e taukena na turaga vutuniyau qori. Ni ratou rogoca na tolu nona itokani, o Elifasi, Pilitati, kei Sofa na ka e yacovi koya, ratou lai raici koya i Usi me ratou vakacegui koya. Ia ni ratou yaco yani, ratou sega ni namaka na ka ratou raica.
2 Raitayaloyalotaka mada qo. Sa kau tani kece na ka e taukena o Jope. Sa ra yali kece nona qelenisipi, bulumakau, kameli, kei na asa. Ratou mate na luvena kei na levu nona dauveiqaravi. Se bale tu ga na vale e lutuki ratou na luvena. Oti qori, e tauvimate tale ga o Jope. E robota kece na yagona na bo mosimosi. Ratou raici koya tu yani vakayawa na tolu na tagane qori ni rarawa tu o Jope qai dabe tu ena dravusa. Cava ratou cakava? Rauta ni vitu na siga, ratou sega ni tukuna e dua na ka vua na turaga sa dabe mosimosi tu qori. (Jope 2:12, 13) E gole tale ga yani e dua na cauravou na yacana o Ilaiu, e lai dabe volekati ratou. E tekivu vosa sara o Jope ni vosavakacacataka na siga e sucu kina qai vinakata me mate. (Jope 3:1-3, 11) Kena ibalebale, e vinakati sara ga me vakacegui o Jope! Na ka ratou na tukuna na tagane qori kei na kena itautau ena kilai kina ke ratou itokani i Jope se ratou kauaitaki koya dina.
3. Na cava eda na dikeva?
3 E uqeti Mosese o Jiova me vola na ka ratou tukuna kei na ka ratou cakava na tolu na itokani i Jope, kei Ilaiu. E macala ni vica na ka e tukuna o Elifasi e rairai uqeti koya kina e dua na timoni. Ia na ka e tukuna o Ilaiu e uqeti koya kina o Jiova. (Jope 4:12-16; 33:24, 25) Sa rauta me tu ena ivola i Jope eso na ivakasala vinaka, ia e tu tale ga kina eso na ivakasala ca. Dua na ka eda vulica ena ivola i Jope, ya na ka meda cakava nida veivakasalataki. Kena imatai, eda na dikeva nodratou ivakaraitaki ca na tolu na itokani nei Jope. Oti, eda na veivosakitaka nona ivakaraitaki vinaka o Ilaiu. Eda na vulica tale ga na sala a rawa ni yaga kina vei ira na Isireli na ivola i Jope, kei na kena yaga vei keda nikua.
SALA RATOU VAKASALATAKI JOPE KINA NA NONA ITOKANI
4. Na cava ratou sega ni veivakacegui kina na itokani i Jope? (Raica tale ga na iyaloyalo.)
4 E kaya na iVolatabu ni ratou lako na itokani i Jope me ‘ratou lai duavata kei koya, me ratou vakacegui koya tale ga’ ni ratou rogoca na ituvaki vakaloloma sa tu kina. (Jope 2:11) Ia ratou a sega ni vakacegui koya. Qo e tolu na vuna. Kena imatai, e totolo ga nodratou tinitinimaki. Kena ivakaraitaki, ratou nanuma ni totogitaki o Jope ena vuku ni ka ca e cakava.a (Jope 4:7; 11:14) Kena ikarua, levu nodratou ivakasala e veivakayalolailaitaki, e sega ni veivakacegui, e mosimosi. Kena ivakaraitaki, eratou vosavosa vakavuku ia e sega ni veivakacegui na ka ratou tukuna. (Jope 13:12) E tukuna vakarua o Pilitati vei Jope ni sa rui levu nona vosa. (Jope 8:2; 18:2) E veibeci nona ivosavosa o Sofa vei Jope ni tukuna ni “ululala.” (Jope 11:12) Kena ikatolu, ratou sega ni kailavaki Jope, ia na itautau ni nodratou vosa e veibeci, e veivakalialiai, e veibeitaki. (Jope 15:7-11) Ratou beitaki Jope tiko ni cala, ia ratou sega ni vakacegui koya se vakaukauataka nona vakabauta.
Ni o veivakasalataki, mo kua ni veibeci. Me nomu inaki mo veivakacegui (Raica na parakaravu 4)
5. Na cava e yacovi Jope ni rogoca nodratou ivakasala na nona itokani?
5 Sa rauta me sega ni yaga na nodratou ivakasala na itokani i Jope. E yalolailai sara ga kina. (Jope 19:2) O sa qai kila na vuna e va kina ya nona ivosavosa. E lai cala nona rai, e vosa tale ga vakalialia. (Jope 6:3, 26) Na ka ratou tukuna na itokani i Jope e sega ni yavutaki ena rai i Jiova, ratou sega tale ga ni lomani koya. Qori na vuna e vakayagataki ratou kina o Setani. (Jope 2:4, 6) E rawa ni yaga vakacava na italanoa qo vei ira ena gauna sa oti, kei keda ena gauna qo?
6. Na cava a rawa nira vulica na qase ni Isireli ena nodratou ivakaraitaki ca na itokani i Jope?
6 Sala a rawa ni yaga kina vei ira na Isireli. Ni tauyavutaka oti o Jiova na matanitu o Isireli, e lesia eso na tagane matua, o ira na qase, mera turaganilewa ena matanitu me yavutaki ena nona ivakatagedegede dodonu. (Vkru. 1:15-18; 27:1) E vinakati vei ira na tagane qori mera vakarorogo vinaka ni bera nira veivakasalataki se vakatulewa. (2 Vei. 19:6) E vinakati tale ga mera taro, mera kua ni tinitinimaki nira sa kila kece na kena dina. (Vkru. 19:18) Mera kua ni vosa vakalialia vei ira na lai kerea nodra veivuke. Na vuna? Era na yalolailai kina, era na sega tale ga ni via talaucaka na lomadra. (Lako 22:22-24) Qori eso na ka e rawa nira vulica na qase ni Isireli ena ivola i Jope.
7. O cei tale e rawa nira veivakasalataki e Isireli? A rawa ni yaga vakacava vei ira na ivola i Jope? (Vosa Vakaibalebale 27:9)
7 E sega ni nodra itavi ga na qase matua ni Isireli mera veivakasalataki. E nodra itavi kece na Isireli, o ira na gone kei na qase, tagane se yalewa, mera vakasalataka e dua na nodra itokani me vakavinakataka nona sokalou se nona itovo. (Same 141:5) O ira ga na itokani dina era na veivakasalataki vakadodonu. (Wilika Vosa Vakaibalebale 27:9.) Ke ra vuli na Isireli ena nodratou veivakasalataki na itokani i Jope, era na kila na ka mera kua ni tukuna se cakava nira veivakasalataki.
8. Na cava meda qarauna nida veivakasalataki? (Raica tale ga na iyaloyalo.)
8 Sala e yaga kina vei keda. Nida lotu vaKarisito, eda vinakata meda vukei ira na tacida ena gauna era rarawa kina. Ia meda cakava qori, meda kua sara ni muria na ka ratou cakava na itokani i Jope. Kena imatai, meda kua ni tinitinimaki totolo, ia meda vakadeitaka ni ka eda tukuna e dina. Kena ikarua, me yavutaki na noda ivakasala ena Vosa ni Kalou, me kua ni noda rai ga me vaka e cakava vakalevu o Elifasi. (Jope 4:8; 5:3, 27) Kena ikatolu, me kua ni kaukaua noda vosa se veivakalewai. Nanuma tiko ni dina eso na ka e tukuna o Elifasi kei rau na nona itokani, dua mada ga na ka ratou tukuna e lavetaka e dua na dauvola iVolatabu. (Vakatauvatana Jope 5:13 kei na 1 Korinica 3:19.) Ia e levu na ka ratou tukuna me baleta na Kalou e sega ni dina qai vakararawataki Jope, e kaya gona o Jiova ni ratou lasu. (Jope 42:7, 8) Na ivakasala vinaka ena sega ni nanumi kina ni yalodredre o Jiova se sega ni lomani ira nona dauveiqaravi. Meda veivosakitaka mada qo na ka eda vulica vei Ilaiu.
Ni o veivakasalataki, (1) mo kila na dina ni itukutuku kece, (2) vakayagataka na Vosa ni Kalou, (3) mo vosa tale ga ena yalololoma (Raica na parakaravu 8)
SALA E VAKASALATAKI JOPE KINA O ILAIU
9. Vakamacalataka na vuna me vakacegui kina o Jope ni ratou vosa oti na nona itokani. E vukei koya vakacava o Jiova?
9 Ni sa oti na nona veiba o Jope kei ratou na nona itokani, e sega sara ga ni vakilai na vakacegu. Na levu ni ka ratou tukuna e rauta ni 28 na wase ni iVolatabu, e levu tale ga na ka e tukuni e tau ena dela ni cudru kei na katakata. Sa rauta me rarawa tu ga o Jope! E vinakati tiko ga me vakacegui, me vakadodonutaki tale ga. E vukei koya vakacava o Jiova? E vakayagataki Ilaiu me vakasalataki koya. Cava ga e galuvaka tu o Ilaiu? E kaya: “Au gone ga dou qai kenaturaga. Au mani galu ga ena veidokai.” (Jope 32:6, 7) E kila o Ilaiu na ka era qai kila e levu ena gauna qo: Sa dede na nodra bula na itabaqase, levu na ka era vulica, ya na vuna era vuku kina, levu tale ga na ka era kila ni vakatauvatani kei ira na gone. Ia ni vosovoso o Ilaiu me rogoci Jope vinaka kei ratou na nona itokani, sa vinakata sara ga me vosa. E kaya: “Na nona vuku e dua e sega ni vakatau ga ena yabaki, era sega ni kila duadua ga na qase na ka dodonu.” (Jope 32:9) Cava e tukuna tarava o Ilaiu, e vacava na kena itautau?
10. Na cava e cakava o Ilaiu ni bera ni vakasalataki Jope? (Jope 33:6, 7)
10 Ni bera ni vakasalataki Jope o Ilaiu, e vinakata me lomavakacegu o Jope qai tu vakarau me rogoci koya. E cakava vakacava? Kena imatai, e lewavinaka na ivakarau ni yalona. Eda kila qori ni tukuna na iVolatabu ni a cudru tu o Ilaiu. (Jope 32:2-5) Ia e sega vakadua ni vosa vakaukaua vei Jope. E veivakacegui ga na ka e tukuna. Kena ivakaraitaki, e tukuna vei Jope: “Raica! Au vakataki iko ga ena mata ni Kalou dina.” (Wilika Jope 33:6, 7.) Oti sa qai tukuna ni a rogoca vinaka tiko na ka e tukuna o Jope. E cavuta mada ga o Ilaiu e vica na tikina bibi a tukuna. (Jope 32:11; 33:8-11) E cakava tale qori ena so tale na gauna e vakasalataki Jope kina.—Jope 34:5, 6, 9; 35:1-4.
11. E vakasalataki Jope vakacava o Ilaiu? (Jope 33:1)
11 Ni vakasalataki Jope o Ilaiu, e vakaraitaka ni doka tiko ga na turaga yalodina qori. Kena ivakaraitaki, e cavuta na yacana, de dua ratou sega ni cakava qori na tolu na tagane ya. (Wilika Jope 33:1.) E rairai nanuma tiko na nona vinakata me vosa ena gauna ratou veiba tiko kina o Jope kei ratou na nona itokani. E solia gona na gauna vei Jope me vosa ni bera ni vakasalataki koya. (Jope 32:4; 33:32) E vakasalataki Jope tale ga ni sega ni vinaka eso na ka e tukuna kei na ka e cakava. E qai tukuna vua ena yalovinaka na vuku i Jiova, nona kaukaua, lewadodonu, kei na dei ni nona loloma. (Jope 36:18, 21-26; 37:23, 24) E macala ga ni ivakasala yaga qori e tu vakarau kina o Jope me ciqoma e levu tale na ivakasala ena tukuna na Dauveibuli. (Jope 38:1-3) E rawa ni yaga vakacava na ivakaraitaki nei Ilaiu vei ira ena gauna sa oti, kei keda ena gauna qo?
12. E vakayagataki ira vakacava na parofita o Jiova mera veidusimaki? A rawa ni yaga vakacava vei ira na Isireli na ivakaraitaki vinaka nei Ilaiu?
12 Sala a rawa ni yaga kina vei ira na Isireli. Ena nodra gauna na Isireli, e lesi ira na parofita o Jiova mera tukuna na nona inaki. Kena ivakaraitaki ena nodra gauna na Dauveilewai, e lesi Tepora me dusimaki ira vakayalololoma na Isireli, e vakayagataki Samuela tale ga o Jiova me dusimaki ira na Isireli mai na gauna se gone kina. (Dvei. 4:4-7; 5:7; 1 Sam. 3:19, 20) Ia ena nodra gauna na tui, e vakayagataki ira tiko ga na parofita o Jiova me vakayaloqaqataki ira na nona tamata, me vakasalataki ira tale ga na biuta na sokalou savasava. (2 Sam. 12:1-4; Caka. 3:24) A rawa sara ga nira vuli ena ivakaraitaki nei Ilaiu o ira na tagane kei na yalewa yalodina mera kila na ka mera tukuna kei na kena itukutukuni nira veivakasalataki.
13. Eda na uqeti ira vakacava na tacida?
13 Sala e yaga kina vei keda. Nida lotu vaKarisito, eda vakatakila na inaki ni Kalou nida tukuna na ka e tu ena nona Vosa na iVolatabu. Dua tale na sala eda cakava kina qori, ya me veiuqeti noda vosa vei ira na tacida. (1 Kor. 14:3) E bibi tale ga mera kauaitaka na qase ni ivavakoso mera “vosa vakayalovinaka” vei ira na mataveitacini, vei ira mada ga era dau cudrucudru se dau vosa “vakalialia.”—1 Ces. 5:14; Jope 6:3.
14-15. Vakamacalataka na sala ena vakatotomuri Ilaiu kina e dua na qase ni veivakasalataki.
14 Vakasamataka mada na ituvaki qo. E kila e dua na qase ni ivavakoso ni yalolailai tiko e dua na tacida yalewa ena nona ivavakoso. Rau veitomani sara kei na dua tale na tacida tagane me rau lai vakayaloqaqataki koya. Ni ratou veivosaki tiko, e tukuna na tacida yalewa ni rarawa tiko. E kaya ni sa lako tiko ena soqoni kei na vunau, ia e sega tiko ga ni marau. Cava ena cakava na qase qori?
15 Kena imatai, ena via kila sara ga na kena ituvaki. Me rawati qori, ena vinakati me taro qai vakarorogo vinaka. Vakacava e nanuma na tacida yalewa ni sega ni lomani koya o Jiova? E ‘lomaocaocataka tiko’ na bula ni veisiga? (Luke 21:34) Kena ikarua, ena saga na qase ni ivavakoso me vakavinavinakataki koya. Ni sotava tiko na ituvaki qori, se lako tiko ga ena soqoni kei na cakacaka vakavunau. Kena ikatolu, ni sa kila vinaka na qase na kena ituvaki kei na vu ni nona yalolailai, ena qai vakayagataka na iVolatabu me vakadeitaka vua ni lomani koya na Kalou.—Kala. 2:20.
VULI TIKO GA ENA IVOLA I JOPE
16. Eda vuli tiko ga vakacava ena ivola i Jope?
16 E levu sara na ka eda vulica ena ivola i Jope! Eda dikeva ena ulutaga sa oti na vuna e vakatara kina na Kalou na rarawa kei na sala meda vosota kina. Eda dikeva ena ulutaga qo ni na yaga na noda ivakasala nida vakatotomuria na ivakaraitaki vinaka nei Ilaiu, sega ni o ratou na tolu na itokani i Jope. Ni bera ni o vakasalataka e dua, e vinaka mo dikeva tale na ivola i Jope. Ke sa dua na gauna balavu o sega ni wilika tu na ivola i Jope, me nomu isausau mo wilika tale mada. O na raica na kena yaga vei iko me vaka ga na gauna e volai kina.
SERE 125 “Marau na Dauloloma!”
a Kena irairai ni timoni e vakacalai Elifasi e kaya tiko nida sega ni yalododonu vua na Kalou, eda na sega tale ga ni vakamarautaki koya. Na raicala qori e vakaleqa sara ga na rai nei Elifasi. E cavuta vakatolu qori vei Jope.—Jope 4:17; 15:15, 16; 22:2.