Tuvanaka na Vakamau e Rokovi Kina o Jiova

1-2. Na cava e vinakata o Jiova ena nomu siga ni vakamau?

O SA veimusumusuki oti mo vakamau? Ke vaka kina, qori e gauna marautaki dina! De dua o ogaoga tiko ena vakavakarau ni nomu vakamau. E kauaitaka o Jiova nomu vakawati. E vinakata mo marautaka nomu siga ni vakamau,a kei na nomu veisiga nimataka.—Vkai. 5:18; Sere 3:11.

² E bibi me rokovi o Jiova ena nomudrau vakamau. Na vuna? O na cakava vakacava? E vakatabakidua na ulutaga qo vei ira na vakavakarau ena vakamau, ia na kena ivakavuvuli ena yaga vei keda kece meda rokovi Jiova ke da tiko ena dua na vakamau, se ni rau kerea noda ivakasala na vakarau vakamau.

VUNA MO ROKOVI JIOVA KINA

3. Na cava me rau vakasamataka tiko o rau na vakarau vakamau ni rau vakavakarau tiko? Na vuna?

³ Na cava me rau vakasamataka tiko o rau na vakarau vakamau ni rau vakavakarau tiko? Na nodrau vakatulewa me salavata kei na ivakavuvuli i Jiova e tu ena nona Vosa. Na vuna? Ni o Jiova sara ga e tauyavutaka na vakawati. E tuvanaka na imatai ni vakamau, me rau vau vata o Atama kei Ivi. (Vkte. 1:28; 2:24) Kena ibalebale, me bibi duadua na rai ni Kalou vei ira na vakavakarau tiko ena vakamau.

4. Na cava e dua na vuna mo rokovi Jiova kina ena nomu siga ni vakamau?

⁴ Qo e dua na vuna levu mo kauaitaka kina na rai i Jiova ena nomu siga ni vakamau: O koya e Tamamu vakalomalagi, e nomu iTokani dredre tale ga. (Iper. 12:9) O vinakata mo drau veitokani tiko ga. O na sega ni via cakava e dua na ka ena siga qori se dua tale na siga, me rarawa kina na nomu iTokani. (Same 25:14) Ni o dau nanuma lesu na ka kece e cakava vei iko o Jiova kei na gauna se bera mai, o na vinakata mo rokovi koya ena nomu siga ni vakamau.—Same 116:12.

DRAU NA ROKOVI JIOVA VAKACAVA?

5. Ena yaga vakacava na iVolatabu ni rau tuvanaka na nodrau vakamau o rau na vakarau vakawati?

⁵ E sega ni tukuni ena iVolatabu e dua na lawa me baleta na soqo ni vakamau vaKarisito se na kena kana. Ni duidui na ituvaki, na ivakarau vakavanua, kei na ka rau vinakata. Mera doka tale ga na lotu vaKarisito dina na lawa e vakarautaka o Sisa. (Maciu 22:21) Ia na vakamau e yavutaki ena ivakavuvuli vakaivolatabu ena rokovi kina o Jiova, ena marautaka tale ga. Na ivakavuvuli vakaivolatabu cava mo nanuma tiko?

6. Na cava e bibi kina vei rau na vakarau vakawati me rau muria na lawa ni matanitu?

⁶ Me muri na lawa ni matanitu. (Roma 13:1, 2) Ena levu na vanua, ni bera na vakamau, e vinakati vei rau na vakarau vakawati me rau muria na lawa ni matanitu. E bibi me rau kila rawa na lawa ni vanua rau tiko kina. Ke drau sega ni kila na kena icakacaka, mo drau taro vei ratou na qase.b

7. Na cava mo drau vakadeitaka me baleta nomudrau soqo ni vakamau?

⁷ Vakadeitaka me dokai na soqo ni vakamau. (1 Kor. 10:31, 32) Drau na vinakata me laurai ena nomudrau soqo na vua ni yalo tabu, sega ni yalo ni vuravura. (Kala. 5:19-26) Me salavata kei na ivakavuvuli vakaivolatabu me baleta na ulunivuvale, e nona itavi na tagane vou me vakadeitaka ni na marautaki na soqo ni vakamau, me dokai tale ga. Ena rawati vakacava qori? Ni dua na ivunau ni vakamau e yavutaki vakaivolatabu, e caka ena dela ni loloma kei na veidokai, era na kila kina e levu ni vakamau e ituvatuva ni Kalou. Ena yaga tale ga vei ira na tiko ena soqo mera kila ni vakamau e dua na soqo bibi. Qori na vuna era vakatulewataka kina e levu era vakarau vakamau me caka qori ena Vale ni Soqoni, ke rawa. Ke drau via vakayagataka na Vale ni Soqoni me caka kina nomudrau vakamau, mo drau volavola vei ratou na qase ni se vo levu tu na gauna.

8. Ena dokai tiko ga vakacava na soqo ni kana? (Roma 13:13)

⁸ Wilika Roma 13:13. Ke drau vakatulewataka me dua na kena kana, cava mo drau cakava me kua ni laurai kina na yalo ni vuravura? Na vosa vaKirisi e vakadewataki me “marau vakalialia,” e vakaibalebaletaka na soqo e caka kina na gunu vakasivia kei na ivakatagi e lako sara tu me yacova na bogilevu. (Raica na study note “wild parties” ena Roma 13:13.) Ke drau vakatulewataka me vakarautaki na gunu, drau vakasamataka rawa na ka me caka me kua ni dua e gunu vakasivia.c Ke vakarautaki na ivakatagi, me kua ni rogolevu sara me rawa nira veirogoci na vulagi nira veitalanoa tiko. Drau rogoca rawa na ivakatagi kei na qaqana me kua ni dua e tarabe kina.

9. Na cava me rau nanuma tiko na vakarau vakamau me baleta na ka ni veivakamarautaki se ke dua e vosa ena soqo ni kana?

⁹ Vakacava e tuvanaki mera vosa vakalekaleka eso, se saravi eso na itaba, vidio, se so tale na ka ni veivakamarautaki ena soqo ni kana? Qori ena guiguilecavi dredre kina na soqo. Ia me vakadeitaki ga ni ka kece e caka me veiuqeti. (Fpai. 4:8) Mo taroga: ‘Era na dokai kina eso tale? Ena rokovi kina na ituvatuva ni vakawati?’ Koya e bibi duadua, mo taroga: ‘Ena rokovi kina o Jiova?’ Ena rairai veiganiti me tukuni eso na ka lasa, ia me qarauni me kua na veiwali velavela. (Efeso 5:3) Ke ra vosa vakalekaleka eso na lewenivuvale se itokani, mera kila tiko na ka drau vinakata, mera doka tale ga.

10. Na cava me rau yalomalumalumu kina na vakarau vakawati ni rau vakavakarau tiko ena vakamau? (1 Joni 2:15-17)

¹⁰ Drau yalomalumalumu. (Wilika 1 Joni 2:15-17.) E marautaka o Jiova mera rokovi koya nona dauveiqaravi, mera kua ni cakava na ka mera rokovi kina o ira. Kena ibalebale na lotu vaKarisito e yalomalumalumu ena sega ni vakayagataka e levu na ilavo, me ‘dokadokataka’ tale ga na ka e tu vua. Ena yaga vakacava ke rawarawa ga nomudrau vakamau? De dua ena vaka na soqo nei Mike, na tacida mai Norway. E kaya: “E sega neirau dinau, e rawa ni keirau painia tiko ga. E rawarawa ga neirau soqo ni vakamau, ia e totoka qai guiguilecavi dredre.” E kaya o Tabitha, na tacida yalewa mai Idia: “Keirau sega ni lomaocaoca. Ni rawarawa ga neirau soqo, e lailai kina na ka e tuvanaki qai sega ni vakavu veivosaki.”

11. Rau na vakaraitaka vakacava na yalomalumalumu na vakarau vakamau ena nodrau isulu kei na sasauni? (Raica tale ga na iyaloyalo.)

¹¹ Vakacava drau sa vakatulewataka na ka mo drau dara? E macala ga ni drau vinakata mo drau rairai vinaka. Ena gauna mada ga vakaivolatabu, era kauaitaka vakabibi na vakarau vakawati na kedra irairai. (Aisea 61:10) E macala ni isulu drau na dara ena siga ni vakamau ena rairai duatani mai na vo ni soqo, e bibi ga me rakorako. (1 Tim. 2:9) Ia me kua ni bibi duadua ena nomudrau siga ni vakamau na nomudrau isulu, na kemudrau irairai, se so tale na ka.—1 Pita 3:3, 4.

12. Na cava me rau cata kina na vakarau vakawati eso na ka e sega ni vakaivolatabu ena nodrau vakamau?

¹² Cata na soqo e sega ni vakaivolatabu. (Vkta. 18:4) E vakadukadukalitaka o Setani na vakamau ena levu na ivakavuvuli lasu, itovo vakavanua, kei na ka vakatevoro. E vakaroti keda o Jiova meda kua ni vakaitavi ena ka dukadukali va qori. (2 Kor. 6:14-17) Ke lomatarotarotaki eso na soqo se ka vakavanua ena vanua o tiko kina, mo drau dikeva tale na vanua era vu mai kina kei na kena ivakavuvuli vakaivolatabu, ni bera ni drau vakatulewataka na ka me caka ena nomudrau vakamau.

13. Rau na vakatotomuria vakacava na rai i Jiova na veiwatini me baleta na iloloma?

¹³ Vakacava e kena ivakarau ena nomu vanua meda soli iloloma vei rau na veiwatini? Na iloloma eda na via solia ena vakatau ena levu ni ilavo e tu vei ira na sureti. Eda uqeti na lotu vaKarisito meda soli ka, nida na marau kina. (Vkai. 11:25; Caka. 20:35) Ia rau na sega ni vinakata na veiwatini mera nanuma na sureti ni dodonu mera soli iloloma, se mera nanuma ni rau na sega ni taleitaka na iloloma e sau lailai. Eda na vakatotomuri Jiova nida saga me tiko vei keda na nona rai me baleta na iloloma, mera solia na ka mai vu ni lomadra me vakatau ena kedra ituvaki.—2 Kor. 9:7.

ME KUA NI YACO NA LEQA

14. Na cava eso na ka e vakadredretaka nodra soqo ni vakamau eso?

¹⁴ Ena rairai tiko eso na ka ena vakadredretaka na kena tuvanaki nomudrau soqo me rokovi kina o Jiova. Kena ivakaraitaki, ena via dredre me rawarawa ga nomudrau vakamau. E kaya o Charlie, mai na Yatu Solomoni: “Ni levu na neirau itokani, e dredre sara ga me keirau vakatulewataka o cei mera sureti. E kena ivakarau eke mera sureti kece!” E kaya o Tabitha, sa tukuni oti mai: “Ena vanua au tiko kina e matau me ka levu na soqo. E dredre me rau ciqoma neirau itubutubu ni keirau na sureta ga e rauta ni le 100.” E kaya o Sarah, mai Idia: “Eso era kauaitaka ga na irogorogo kei na levu ni ilavo. O ira na wekaqu e ka lelevu na nodra soqo ni vakamau, au vinakata me ka levu sara na noqu.” Na cava mo drau cakava me kua ni va qori nomudrau soqo?

15. Na cava e bibi kina na masu ena vakavakarau ni vakamau?

¹⁵ Drau masulaka nomudrau ituvatuva ni vakamau. Drau masulaka vei Jiova nomudrau vakatulewa se dua na ka drau leqataka tiko. (Fpai. 4:6, 7 kei na study note “in everything”) Drau kerei koya me vukei kemudrau mo drau vakatulewa vinaka, mo drau lomavakacegu ni drau nuiqawaqawa, mo drau yaloqaqa tale ga ena gauna e vinakati kina. (1 Pita 5:7) Ni drau raica na sala e sauma kina o Jiova nomudrau masu, drau na nuitaki koya vakalevu. E kaya o Tabitha, sa tukuni oti mai: “Keirau leqataka ni keitou na duiyaloyalo vakavuvale. Na gauna kece keirau dau veivosakitaka kina neirau ituvatuva ni vakamau, keirau dau masu rawa. Keirau vakila sara ga na veivuke i Jiova, keirau veiyaloni tiko ga kina, vaka kina o ratou na neirau vuvale.”

16-17. Ena yaga vakacava na veivosaki vinaka ni drau tuvatuvanaki ena vakamau?

¹⁶ Drau vakamacala vakavinaka ena veidokai. (Vkai. 15:22) E levu na ka me vakatulewataki me baleta nomudrau vakamau, me vaka na tikinisiga, na levu ni ilavo me vakayagataki, o cei mera sureti, kei na levu tale na ka. Ni bera ni drau vakatulewa, drau raica tale na ka drau sa tuvanaka, drau veivosakitaka tale ga na ivakavuvuli vakaivolatabu me muri, kei na nodra ivakasala na lotu vaKarisito matua. Ni drau tukuna nomudrau dui nanuma, drau vosa ena yalovinaka, me laurai na yalomatua, drau yalorawarawa tale ga. Ke ra vakatututaka na wekamudrau voleka, me vakataki rau nomudrau itubutubu, eso na ka e sega ni cala, drau muria. Qori e dua na siga marautaki tale ga vei ira. Ke drau sega ni via cakava na ka era vakatututaka, drau vakamacalataka ena veidokai. (Kolo. 4:6) Mo drau vakamatatataka vei ira na wekamudrau ni bibi duadua me marautaki nomudrau soqo, me rokovi kina o Jiova.

¹⁷ Ke rau sega ni tiko ena dina nomudrau itubutubu, ena dredre toka mo drau vakamacalataka nomudrau vakatulewa. Ia drau rawa ni tukuna vei ratou na vuna e va kina ya na nomudrau vakatulewa. E kaya o Santhosh, e dua na tacida tagane mai Idia: “Ratou vinakata na neirau vuvale me caka e levu na ivakarau ni sokalou vakaIdu ena neirau vakamau. E taura na gauna me keirau vakamacalataka vei ira neirau vakatulewa. Ia keirau cakava eso na ka era vakatututaka ni keirau kila ni sega ni vakacudrui Jiova. Kena ivakaraitaki, keirau veisautaka na kakana me vaka era vinakata, keirau vakatulewataka tale ga me kua ni caka na lagasere se danisi ni sega ni matau vei ira.”

18. Na cava mo drau cakava me qaravi vinaka kina nomudrau soqo? (1 Korinica 14:40) (Raica tale ga na iyaloyalo.)

¹⁸ Drau tuvatuvanaki vakavinaka. Ni drau tuvatuvanaki vinaka, drau na sega ni lomaocaoca vakasivia ena nomudrau siga ni vakamau. (Wilika 1 Korinica 14:40.) E kaya o Wayne mai Taiwan: “Ni vo e vica na siga me keirau vakamau, keirau bose kei ira na via veivuke ena neirau soqo. Keirau vakamacalataka na neirau ituvatuva ena siga ya, keirau vakatovotovotaka tale ga eso na ka ena caka ena Vale ni Soqoni me qaravi vinaka kina na soqo.” Ni drau dokai ira na nomudrau vulagi, drau saga me caka na ka kece ena kena gauna.

19. Na cava mo drau cakava me lewai vinaka na ka me caka ena soqo ni kana?

¹⁹ Ena wali e levu na leqa ke drau vakasamataka rawa eso na ka ena yaco. (Vkai. 22:3) Kena ivakaraitaki, ke matau ena vanua drau tiko kina mera lako yani na sega ni sureti ena gauna ni kana, drau vakasamataka rawa na ka me caka. Vakadeitaka vei ira na weka era sega ni tiko ena dina na ka mera namaka, vakamacalataka tale ga nomudrau rai ena so na ivakarau ni vakamau e dau caka. O rawa ni vakaraitaka vei ira na ulutaga “Cava e Dau Caka ena Nodra Vakamau na iVakadinadina i Jiova?” ena jw.org. Me lewai vinaka na ka me caka ena nomudrau soqo ni kana, drau lesia e dua na tacida tagane matua me “iliuliu ni soqo.” (Joni 2:8) Ke drau vakamatatataka vua na nomudrau ituvatuva ena siga ni vakamau, ena vukei kemudrau me rokovi tiko ga na soqo me vaka ga drau vinakata.

20. Na cava me rau nanuma tiko na vakarau vakawati me baleta na nodrau siga ni vakamau?

²⁰ De dua drau na nuiqawaqawa ni drau vakasamataka na levu ni ka me tuvanaki ena nomudrau siga ni vakamau. Ia drau nanuma tiko ni nomudrau vakamau e dua ga na siga. E itekitekivu ga ni nomudrau bula mo drau qaravi Jiova vata. Saga me rawarawa ga nomudrau vakamau qai rokovi kina o Jiova. Drau nuitaki Jiova. Ni drau muria nona veidusimaki, drau na tuvanaka e dua na vakamau ena guiguilecavi dredre, drau na sega tale ni veivutunitaka.—Same 37:3, 4.