MAJI 2-8, 2026
SERE 97 Bula ena Vosa ni Kalou
Vakaceguya Tiko ga Nomu “Bula Vakayalo”
NODA TIKINIVOLATABU NI 2026: “Era marau o ira na kauaitaka nodra bula vakayalo.”—MACIU 5:3.
KA E VAKABIBITAKI
Eda na vulica na sala ena yaga tiko ga kina vei keda na kakana, isulu, kei na ivakaruru vakayalo e vakarautaka o Jiova.
1. Na cava eso na ka eda gadreva? (Maciu 5:3)
NI BULI keda o Jiova, e kila vinaka na veika eda gadreva. Kena ivakaraitaki, meda bula tiko e bibi na kakana, isulu, kei na vale. Ke sega qori ena dua mada ga na gauna lekaleka, ena dredre na bula. E buli keda tale ga o Jiova meda gadreva na veika vakayalo. (Wilika Maciu 5:3.) Ke da vinakata meda marau dina, e bibi meda kauaitaka noda bula vakayalo qai nuitaki Jiova tiko ga.
2. Eda tautauvata vakacava kei na daukerekere?
2 Na cava na ibalebale ni noda “kauaitaka” noda “bula vakayalo”? Na ibalebale ni kena vosa taumada e baleta tiko e dua e daukerekere ena yalo tabu. Eda lai vakasamataka kina e dua na daukerekere e dabe toka ena yasa ni gaunisala, e vakaloloma na kena irairai, e kakabasubasu tu nona isulu. E malumalumu ni sega tu ni kana, e vakasisilataki na kena irairai, e vakacilavisiga, ena bogi e curumi batabata. E kila na daukerekere qori ni bibi me vukei me rawa ni bula tiko. Me rawa ni bulabula tale ga vakayalo e dua, e bibi me kauaitaka nona bula vakayalo, me daukerekere ena yalo tabu. Ena gumatua gona me vakayagataka vinaka na isolisoli vakayalo e vakarautaka o Jiova vei ira na lomani koya.
3. Na cava eda na veivosakitaka ena ulutaga qo?
3 Eda na veivosakitaka e liu na nona ivakaraitaki na marama ni Finaisi e kerei Jisu me vukei koya. Eda na vulica kina e tolu na itovo mera vakaraitaka o ira na kauaitaka nodra bula vakayalo. Oti, eda na qai dikeva nodratou ivakaraitaki e tolu na tagane vakayalo, na yapositolo o Pita, Paula, kei Tui Tevita.
IVAKARAITAKI NI YALOMALUMALUMU, KUA NI SORO, KEI NA VAKABAUTA
4. Na cava e lai raici Jisu kina na marama ni Finaisi?
4 Dua na gauna, e lai raici Jisu na marama ni Finaisi. E “dau curumi timoni vakalevu” na luvena yalewa. (Maciu 15:21-28) E tekiduru vei Jisu qai kerea nona veivuke. E vakaraitaka na marama qori eso na itovo talei. Meda dikeva mada.
5. Na itovo cava e vakaraitaka na marama ni Finaisi? Cava e cakava o Jisu? (Raica tale ga na iyaloyalo.)
5 E vakaraitaka na marama ni Finaisi na yalomalumalumu dina. Eda kila vakacava? E sega ni leva ni vakatauvatani koya o Jisu kei na dua na luvenikoli, era dau susuga e vale na lewe ni Veimatanitu. Na cava o na cakava ke tukuna qori vei iko o Jisu? O na leva qai sega ni kerea tale nona veivuke? A sega ni cakava qori na marama ni Finaisi. E sega ni vakaraitaka wale ga na yalomalumalumu, ia e sega ni soro ni vakamasuti Jisu tiko ga me vukei koya. Na vuna? E vakabauti Jisu. Na nona vakabauta na marama qori e uqeti Jisu sara ga me cakava e dua na ka vakatubuqoroqoro. A sega wale ga ni tukuna vua o Jisu ni talai mai me vukei ira ga “na sipi ni matanitu o Isireli era yali tu,” e vakatala tani tale ga na timoni e curumi luvena tiko.
Me rawa ni vukei na marama ni Finaisi, e vinakati me yalomalumalumu, kua ni soro, me vakabauta tale ga (Raica na parakaravu 5)
6. Eda na vakatotomuria vakacava na marama ni Finaisi?
6 Me vakacegui noda gagadre vakayalo, e bibi meda yalomalumalumu, kua ni soro, me kaukaua tale ga noda vakabauta a vakaraitaka na marama ni Finaisi. O koya e yalomalumalumu, ena sega ni soro me kere veivuke vua na Kalou. E bibi tale ga me kaukaua noda vakabauti Karisito Jisu qai nuitaki ira e vakayagataka tiko mera dusimaki ira nona tisaipeli. (Maciu 24:45-47) Erau marautaka o Jiova kei Luvena me rau vakaceguya nodra gagadre vakayalo o ira na vakaraitaka na itovo qori. (Vakatauvatana Jemesa 1:5-7.) Meda dikeva mada qo na sala e vakarautaka kina o Jiova na keda kakana vakayalo, noda isulu, kei na noda vale se ivakaruru. Me yaga vei keda na isolisoli qori, eda na vulica na ka e cakava na yapositolo o Pita, Paula kei Tui Tevita.
KANA VINAKA TIKO GA VAKAYALO ME VAKATAKI PITA
7. Na itavi cava e lesi vei Pita? Cava e vinakati tale ga me cakava? Vakamacalataka. (Iperiu 5:14–6:1)
7 Dikeva mada nona ivakaraitaki na yapositolo o Pita. O koya na imatai ni Jiu e kila ni o Jisu na Mesaia, e vakayagataka o Jiova me vakani ira nona tamata ena “vosa ni bula tawamudu.” (Joni 6:66-68) Ni bera ni lesu i lomalagi o Jisu, e lesi Pita me “vakani ira na [nona] sipi lalai.” (Joni 21:17) E qarava ena yalodina o Pita na ilesilesi qori, e vakayagataki koya tale ga o Jiova me vola e rua na ivola ena iVolatabu. Ia e vinakati tale ga vei Pita me vakani koya vakayalo. Kena ivakaraitaki, e vulica na ivola sa vola oti na yapositolo o Paula. E vakadinadinataka ni “kilakilai dredre” eso na ka e vola o Paula. (2 Pita 3:15, 16) Ia e sega ni soro o Pita, e vakabauta ni na vukei koya o Jiova me kila vinaka na ibalebale ni “kakana dina” qori qai muria.—Wilika Iperiu 5:14–6:1.
8. Na cava e cakava o Pita ena veidusimaki vou ni agilosi?
8 E vakaraitaka o Pita nona vakabauti Jiova ni muria na veidusimaki. Kena ivakaraitaki, ni tiko ena ikelekele ni waqa ena korolevu o Jopa, e raivotutaka ni tukuna vua e dua na agilosi me vakamatea qai kania na veimataqali manumanu e tukuni ena Lawa ni dukadukali. Vei ira na Jiu, na veidusimaki qori e cala sara tu ga. A tukuna o Pita: “Sega sara Turaga, au se sega vakadua ni kania na ka e dukadukali se tawasavasava.” E qai tukuni vua: “Kua ni tukuna ni dukadukali na ka sa vakasavasavataka na Kalou.” (Caka. 10:9-15) E veisautaka sara ga o Pita nona rai. Eda kila vakacava? Ni oti ga nona raivotu, ratou yaco yani e tolu na tagane e tala yani o Konilio, e sega ni Jiu, ratou kerei Pita ni via raici koya na nodratou turaga. E sega tu ga ni dau lako o Pita ena nodra vale na kai Veimatanitu. Ena nodra rai na Jiu nira dukadukali. (Caka. 10:28, 29) Ia e totolo ga ni muria o Pita na veidusimaki vou e tukuna o Jiova. (Vkai. 4:18) E vunau vei Konilio kei ira nona vuvale, e marautaka nira ciqoma na ka dina, e sobuti ira na yalo tabu ra qai papitaiso.—Caka. 10:44-48.
9. Na cava e rua na sala ena yaga kina noda vulica na veika titobu ena Vosa ni Kalou?
9 Me vakataki Pita, e bibi meda gunuva tiko ga na wainisucu se na ivakavuvuli rawarawa vakaivolatabu. E bibi tale ga meda taleitaka na kakana dina vakayalo, qori na ka dina e dredre toka meda kila na kena ibalebale. E vinakati na gauna kei na sasaga meda kila kina na veika titobu ena Vosa ni Kalou. Na cava e yaga kina? Qo e rua na kena yaga: Dua, eda na vulica na veika me baleti Jiova eda na lomani koya kina vakalevu, eda dokai koya tale ga. Kena ikarua, ena uqeti keda sara ga meda tukuna yani na veika vakatubuqoroqoro me baleta na Tamada vakalomalagi. (Roma 11:33; Vkta. 4:11) Cava tale eda vulica ena ivakaraitaki i Pita? Ni veisau eso na ka eda kila ena Vosa ni Kalou, e bibi meda veisautaka totolo noda rai kei na noda itovo. Qori ga na sala eda na kana tiko kina vakayalo, eda na yaga tale ga vei Jiova.
DARA TIKO GA NA ISULU VAKAYALO ME VAKATAKI PAULA
10. Na cava na ibalebale ni noda dara na isulu vakayalo? (Kolosa 3:8-10)
10 Meda vakamarautaka na Kalou, e bibi meda vakayagataka vinaka e dua tale na isolisoli i Jiova, qori na isulu vakayalo. Cava na kena ibalebale? E vola na yapositolo o Paula ni bibi meda “luvata tani na itovo makawa” qai sulumaka “na itovo vou.” (Wilika Kolosa 3:8-10.) E ka ni sasaga noda dara na isulu qori. Meda dikeva mada na ivakaraitaki i Paula. Ni se gone, e sasaga vakaukaua me vakadonui koya na Kalou. (Kala. 1:14; Fpai. 3:4, 5) Ia ni sega vua na kilaka dodonu me baleta na inaki ni Kalou, e ca sara tu ga na nona bula vakayalo. Ni sega ni kila na ivakavuvuli i Karisito salavata kei na dokadoka, ya na vuna e “dau veibeci” kina, ni sulumaka tiko na itovo makawa.—1 Tim. 1:13.
11. Na cava me veisautaka o Paula? Vakamacalataka.
11 Ni bera ni lotu vaKarisito o Paula, e dau yalototolo. E tukuni ena ivola na Cakacaka ni dau katakatataki ira na tisaipeli i Jisu ena nona ‘vakarerei ira qai via vakamatei ira sara ga.’ (Caka. 9:1) Ni sa dua na lotu vaKarisito, e macala ga ni saga vakaukaua me luvata nona itovo makawa qori. (Efeso 4:22, 31) Ia ni sega ni duavata kei Panapasa, e tubu kina e “dua na veiba katakata.” (Caka. 15:37-39) E basika tale na malumalumu nei Paula, ia e sasaga tiko ga. E ‘vakamalumalumutaka tiko ga na yagona,’ ena nona valuta nona malumalumu me vakadonui koya o Jiova.—1 Kor. 9:27.
12. E luvata rawa vakacava o Paula na nona itovo makawa?
12 Sa qai rawa ni luvata tani o Paula nona itovo makawa qai sulumaka na itovo vou ni sega ni nuitaka ga nona kaukaua. (Fpai. 4:13) Me vakataki Pita, e nuitaka o Paula na “kaukaua e solia na Kalou.” (1 Pita 4:11) Ia eso na gauna e dau cala. Ni yalolailai, e dau vakasamataka na veika vinaka e cakava vua na Tamana vakalomalagi, qori e uqeti koya me sasaga tiko ga.—Roma 7:21-25.
13. Eda na vakatotomuri Paula vakacava?
13 Ke sa dede mada ga noda tiko ena dina, eda na vakatotomuri Paula nida saga tiko ga meda luvata tani na itovo makawa qai sulumaka na itovo vou, na isulu vakayalo e vakarautaka o Jiova. Ke basika tale noda malumalumu, me vaka na yalototolo se vosa vakalialia, meda kua ni yalolailai. Ia meda saga tiko ga noda isausau, ya me veisautaki noda vakasama kei na noda itovo. (Roma 12:1, 2; Efeso 4:24) Nida cakava tiko qori, meda nanuma qo: E rawa ni vakalailaitaki se vakalevutaki na isulu me rauti keda, ia me rauti keda na isulu vakayalo e vakarautaka o Jiova, e vinakati sara ga meda veisautaki keda. E bibi meda veisau meda yacova kina na ivakatagedegede ni Kalou.
TIKO GA ENA IVAKARURU VAKAYALO ME VAKATAKI TEVITA
14-15. Na sala cava e vakarautaka kina o Jiova na ivakaruru vakayalo? (Same 27:5) (Raica tale ga ena waqana.)
14 Meda vakila na marau dina, e sega ni vinakati ga na kakana vakayalo kei na isulu vakayalo. E vinakati tale ga na ivakaruru vakayalo. Cava na kena ibalebale qori, eda na vakadeitaka vakacava nida na taqomaki kina?
15 E tukuna tiko o Tui Tevita na ivakaruru vakayalo e vakarautaka o Jiova. (Wilika Same 27:5.) E taqomaki ira nona tamata o Jiova me kua ni dua se dua na ka me vakaleqa nodra vakabauti koya. E taqomaki ira vakacava vei ira na dau veitusaqati? E yalataka ni na tawayaga na iyaragi kece e buli mera valuti kina. (Same 34:7; Aisea 54:17) E kaukaua o Setani kei ira nona ilala, ia era na sega ni vakaleqai keda vakadua. Ke ra vakamatei keda mada ga, ena vakaturi keda tale o Jiova. (1 Kor. 15:55-57; Vkta. 21:3, 4) E dau vukei keda tale ga o Jiova meda vosota na nuiqawaqawa, ni rawa ni vakaleqai keda vakadua. (Vkai. 12:25; Maciu 6:27-29) E vakarautaka tale ga na Tamada dauloloma na vuvale vakayalo era lewena na tacida era dau tokoni keda, kei ira na qase mera vakatawani keda. (Aisea 32:1, 2) Nida tiko ena soqoni ni ivavakoso, eda dau vakadreti ena sala meda vakayagataka vinaka kina na veitaqomaki i Jiova.—Iper. 10:24, 25.
E qara na tacida qo na veivuke vakayalo ni tiko ena soqoni kei ira na mataveitacini (Raica na parakaravu 14-15)
16. Na sala cava e taqomaki Tevita kina o Jiova?
16 Ni talairawarawa vei Jiova o Tevita, e taqomaki ni vakatulewa vinaka. (Vakatauvatana Vosa Vakaibalebale 5:1, 2.) Ia ni beca na ivakatagedegede i Jiova, e sega ni taqomaki koya ena ca ni ka e cakava. (2 Sam. 12:9, 10) Ia e taqomaki koya vakacava o Jiova nira vakalolomataki koya eso? E sova na lomana vei Jiova ena masu, e vakacegui koya tale ga me kua ni lomaocaoca qai vakadeitaka vua ni lomani koya vakalevu, ena karoni koya.—Same 23:1-6.
17. Eda na vakatotomuri Tevita vakacava?
17 Eda na vakatotomuri Tevita nida qara na ivakasala i Jiova nida vakatulewa. Meda nanuma tale ga nida na rarawa ena so na gauna nida vakatulewa ca, ia ena sega ni taqomaki keda o Jiova ena ca ni ka eda cakava. (Kala. 6:7, 8) Nira vakararawataki keda eso, meda sova na lomada vei Jiova ena masu qai nuitaki koya me taqomaka na lomada kei na noda vakasama.—Fpai. 4:6, 7.
VAKACEGUYA TIKO GA NOMU GAGADRE VAKAYALO
18. Na cava e bibi kina meda kauaitaka noda bula vakayalo? Eda na vakaceguya tiko ga vakacava noda gagadre vakayalo? (Raica tale ga na iyaloyalo.)
18 E tukuni ena noda tikinivolatabu ni 2026: “Era marau o ira na kauaitaka nodra bula vakayalo.” Sa qai bibi sara qori nikua. Na vuna? Nida bula maliwai ira na sega ni mamarau, era sega ni kauaitaka nodra bula vakayalo, se ra saga mera vakaceguya ga vakataki ira nodra gagadre vakayalo ena lotu lasu kei na vuku vakatamata. Meda kua sara ni vakatotomuri ira. Ena sala cava? Nida kania tiko ga na kakana vakayalo e vakarautaka o Jiova, eda sulumaka tiko ga na itovo vou qai tiko dei ga ena ivakaruru vakayalo.
Meda vakaceguya tiko ga noda gagadre vakayalo nida kania na kakana vakayalo, sulumaka na itovo vou, qai tiko ga ena ivakaruru (Raica na parakaravu 18)a
SERE 162 Kauaitaka Noqu Bula Vakayalo
a IVAKAMACALA NI IYALOYALO: E vakani koya vakayalo na tacida yalewa qori mai na iyaloyalo sa oti ni vulica na Vale ni Vakatawa, e sulumaka sara na itovo vou ni vakaraitaka na veikauaitaki, e qara tale ga nodrau veivuke na qase ni rau vakatawani koya ena yalololoma.