MAJI 9-15, 2026
SERE 45 Na Vakanananu ni Lomaqu
O na Rawa ni Valuta na Yalolailai
“Au sa vakaloloma dina!”—ROMA 7:24.
KA E VAKABIBITAKI
Eda na vulica na ka meda cakava nida yalolailai.
1-2. E dau vakacava nona rai o Paula ena so na gauna? Eda tautauvata vakacava kei Paula? (Roma 7:21-24)
NA CAVA o dau vakasamataka ni cavuti na yapositolo o Paula? O dau vakasamataka mai e dua na daukaulotu yaloqaqa, qasenivuli maqosa, se dauvola iVolatabu? Qori dina na ka e kilai kina. Ia eso na gauna e dau yalolailai tale ga. Me vakataki keda ga, eso na gauna e dau cala nona rai.
2 Wilika Roma 7:21-24. E vola o Paula vei ira e Roma eso na rai eda kila vinaka nikua. E lotu vaKarisito yalodina ia e veivala tiko na lomana, ya nona via cakava na loma ni Kalou kei na nona via cakava na ka ca. Kena ikuri, eso na gauna e cala nona rai me baleta nona cala makawa kei na dua na leqa e sotava tiko.
3. Na cava eda na vulica ena ulutaga qo? (Raica tale ga na “iVakamacala ni Vosa.”)
3 Eso na gauna e yalolailaia o Paula, ia e sega ni vinakata me lewai koya qori. Eda na vulica ena ulutaga qo e vica na taro: Na cava e nanuma kina o Paula ena so na gauna ni “vakaloloma”? E valuta vakacava na yalolailai? Eda na valuta tale ga vakacava na yalolailai?
VU NI NONA YALOLAILAI O PAULA
4. Na cava e dau vakayalolailaitaki Paula?
4 Ka e dau cakava e liu. Ni bera ni lotu vaKarisito o Paula, e dau kilai e liu me o Saula, e dau cakava e levu na ka ca. Kena ivakaraitaki, e marautaka sara ga nona vakaviriki ena vatu na turaga yalodina o Sitiveni me mate. (Caka. 7:58; 8:1) E liutaka tale ga o Saula nodra tusaqati vakaukaua na lotu vaKarisito.—Caka. 8:3; 26:9-11.
5. E vakaleqai Paula vakacava na ka e dau cakava e liu?
5 Ni sa mai lotu vaKarisito o Paula, eso na gauna e dau vakaleqa na lomana na veika e dau cakava e liu. Ni toso na gauna e rairai vakaleqa vakalevu na lomana nona dau tusaqati ira na lotu vaKarisito. Kena ivakaraitaki, e kaya ena imatai ni nona ivola vei ira e Korinica rauta na 55 G.V.: “E sega mada ga ni ganita meu vakatokai meu yapositolo niu dau vakacacana na ivavakoso ni Kalou.” (1 Kor. 15:9) Oti tale e rauta ni lima na yabaki, ni volavola vei ira e Efeso, e vakamacalataki koya me “lailai duadua vei ira na yalosavasava kece.” (Efeso 3:8) Ni volavola o Paula vei Timoci, e kaya “niu dau vosabeca na Kalou, au dau veivakacacani, au qai dau veibeci.” (1 Tim. 1:13) Vakasamataka mada nona rai ni veisiko ena ivavakoso qai sotava eso a tusaqata se na lewe ni nodra vuvale.
6. Na cava tale e rarawataka vakalevu o Paula? (Raica tale ga na ivakamacala e ra.)
6 E dua na votonikau. E tukuna o Paula e dua na ka e vakararawataki koya tiko vakalevu e vaka “e dua na votonikau.” (2 Kor. 12:7) E sega ni tukuna na ka e vakavuna, ia eda kila ena nona vosa vakatautauvata ni rawa ni dusia e dua na mate, nuiqawaqawa, se dua tale na ka e rarawataka.b
7. E vakaleqai Paula vakacava nona malumalumu? (Roma 7:18, 19)
7 Nona malumalumu. E sasaga o Paula me valuta nona malumalumu. (Wilika Roma 7:18, 19.) E via cakava na ka dodonu, ia e vakadredretaka qori na yagona ivalavala ca. E tukuna ni veivala tiko ga na yagona ivalavala ca kei na nona via cakava na ka dodonu. Ia e sasaga tiko ga o Paula me veisau. (1 Kor. 9:27) Ena rarawa mada ga ke dau basika tale mai nona malumalumu!
KA E CAKAVA O PAULA ME VALUTA NA YALOLAILAI
8. E kilai vakacava ena ivola i Paula na sala e valuta kina nona malumalumu?
8 Eda kila ena ivola i Paula ni vakasamataka vakatitobu na sala me valuta kina kei ira na tacina na gagadre ca ena veivuke ni yalo tabu. (Roma 8:13; Kala. 5:16, 17) E vakamatatataka o Paula na gagadre kei na itovo mera valuta na lotu vaKarisito. (Kala. 5:19-21, 26) E dusia qori ni dau vakasamataka vakatitobu o Paula nona malumalumu, e qara ivakasala ena iVolatabu me kila na ka me veisautaka qai cakava sara. Eda vakadeitaka ni muria sara tiko ga na nona ivakasala.
9-10. E valuta vakacava o Paula na yalolailai? (Efeso 1:7) (Raica tale ga na iyaloyalo.)
9 E dau yalolailai o Paula ena so na gauna, ia e saga me donu nona rai. Kena ivakaraitaki, e marautaka na irogo vinaka era mai tukuna nona itokani era dau tomani koya. (2 Kor. 7:6, 7) E marautaka nona veitokani kei ira na mataveitacini. (2 Tim. 1:4) E kila tale ga ni vakadonui koya o Jiova. Io, e marautaka o Paula nona rawa ni qarava na Kalou “ena lewaeloma e savasava.” (2 Tim. 1:3) Ni vesu tu mada ga e Roma, e uqeti ira na mataveitacini mera “marau . . . ena vuku ni Turaga.” (Fpai. 4:4) Eda sega ni vakabauta me cavuta qori e dua e dau yalolailai. E macala, ni gauna e dau yalolailai kina o Paula e veisautaka totolo nona rai me marau kina.
10 Dua tale na sala e valuta kina o Paula na yalolailai ni vakabauta ni ivoli e nona iloloma sara ga na Kalou vua. (Kala. 2:20; wilika Efeso 1:7.) Qori na vuna e nuitaka kina na veivosoti i Jiova ena vuku i Jisu Karisito. (Roma 7:24, 25) E tu nona cala makawa kei na nona malumalumu o Paula, ia e rawa ni ‘vakaraitaka vua na Kalou na veiqaravi tabu’ ena marau.—Iper. 9:12-14.
Eso na gauna e vakaleqa na loma i Paula na ka e dau cakava e liu, ia e valuta na yalolailai ni dau vakasamataka na ivoli (Raica na parakaravu 9-10)
11. E veivakayaloqaqataki vakacava na ivakaraitaki i Paula?
11 Me vakataki Paula, de dua e dau veivala tu ga na lomada. Rawa ni ka eda vakasamataka, ka eda cakava, se tukuna. De dua eda kaya tale ga, ‘Au sa vakaloloma dina!’ Qo na ka e tukuna e dua na tacida yalewa o Elizac e yabaki 20 vakacaca, me baleta nona rai: “E vakayaloqaqataki au noqu vakasamataka na ivakaraitaki i Paula. Au marau ni kila ni cakava tale ga o Paula na veiveisau me vakataki au. Qori e vakaraitaka ni kila vinaka o Jiova na kedra ituvaki na nona tamata.” Me vakataki Paula, cava meda cakava me savasava noda lewaeloma, meda marau tale tiko ga nida yalolailai?
KA MEDA CAKAVA MEDA VALUTA KINA NA YALOLAILAI
12. Eda na valuta vakacava na yalolailai nida muria tiko ga noda ituvatuva vakayalo?
12 Muria tiko ga nomu ituvatuva vakayalo. Ni dua noda ituvatuva vinaka vakayalo, ena donu tiko ga noda rai. Eda na vakatauvatana qori kei na ka meda cakava meda bulabula vinaka kina. Nida kana vinaka, vakaukauayago wasoma, moce vinaka tale ga, eda na bulabula kina. Eda dau marau tale ga nida wilika wasoma na Vosa ni Kalou, vakavakarau ena soqoni, tiko kina, meda saumitaro, meda lai vunau tale ga. Nida cakava qori, eda na valuta kina na yalolailai.—Roma 12:11, 12.
13-14. E yaga vakacava nodra muria eso na tacida nodra ituvatuva vakayalo?
13 Dikeva mada na ivakaraitaki nei John, e yabaki 39, e laurai vua e dua na mataqali kenisa. E yalolailai sara ga ena gauna e rogoca kina. E taroga: ‘Au mai tauvimate tu vakacava niu se gone?’ E se qai yabaki tolu o luvena tagane ena gauna qori. E valuta vakacava o John na yalolailai? E kaya: “Niu wawale, au vakadeitaka me toso ga neitou ituvatuva vakayalo. Keitou tiko ena soqoni kece, keitou lai vunau e veimacawa, keitou sokalou tale ga vakavuvale ni dredre mada ga ena so na gauna.” Ni railesu o John, e kaya: “Ni sa oti na lomaleqa, e donu tale noqu rai niu kila ni lomani au o Jiova, e vakaukauataki au. Ena rawa ni cakava tale ga qori vei iko me vaka ga e cakava vei au.”
14 E kaya o Eliza sa cavuti oti mai: “Niu dau tiko ena soqoni au vuli tale ga vakataki au, au vakadeitaka kina ni lomani au tu ga o Jiova, e rogoci au tale ga. Qori na ka au marautaka.” E tukuna o Nolan, na ivakatawa ni tabacakacaka mai Aferika, me baleti koya kei watina o Diane: “Keirau dau muria tu ga neirau ituvatuva vakayalo ni keirau yalolailai mada ga. O Jiova ga ena vukei keirau me donu neirau rai. Io, ena vukei keirau tu ga o Jiova qai vakalougatataki keirau. Keirau sega ni kila ena cakava vakacava, ia ena cakava dina.”
15. Na cava tale meda cakava meda valuta kina na yalolailai? Vakatauvatana.
15 Ke da yalolailai tiko ga, e tiko eso tale na ka meda cakava. Kena ivakatautauvata: kaya mada ke mosi na dakumu. Me oti na mosi, o na sega ni taubale tiko ga e veisiga. O na via kila na vu ni mosi, de dua mo vakekeli, se raici vuniwai. Ke basika tale ga na yalolailai, de dua meda vakekeli ena iVolatabu kei na noda ivola, se raica e dua na tacida matua. Meda dikeva mada qo eso tale na vakatutu.
16. Na cava mo cakava mo kila kina na vu ni nomu yalolailai? (Same 139:1-4, 23, 24)
16 Masulaka mo kila na ka e ganiti iko. E kila o Tui Tevita ni kilai koya vinaka o Jiova. E mani kerei Jiova me vukei koya me kila na vu ni nona “nuiqawaqawa.” (Wilika Same 139:1-4, 23, 24.) Mo kerei Jiova tale ga me vukei iko mo kila na vu ni nomu yalolailai, kei na sala mo valuta kina. Kena ikuri, o rawa ni taroga qo: ‘Na cava au dau nuiqawaqawataka? Na cava e vakavuna noqu yalolailai? Ni tekivu cala noqu rai, au na vakasamataka tu ga seu veisautaka?
17. Na ulutaga cava mo vulica vakataki iko mo vakasamataka kina na ka e veiuqeti? (Raica tale ga na iyaloyalo.)
17 Vulica na ulutaga e ganiti iko. Eso na gauna e vinaka tale ga mo vulica eso na itovo i Jiova. Kena ivakaraitaki, e yaga vakalevu nona vakasamataka na yapositolo o Paula na ivoli kei na veivosoti i Jiova. Mo cakava tale ga qori. Mo vakayagataka na iDusidusi ni Vakadidike ni iVakadinadina i Jiova, na Watch Tower Publications Index, se so tale na ivola vakaivolatabu ena nomu vosa, mo vulica kina eso na ulutaga me vaka na yalololoma i Jiova, nona veivosoti, kei na dei ni nona loloma. Ni o sa raica na ulutaga ena yaga vei iko, vola sara. Vakabira ena dua na vanua me rawarawa nomu raica, qai vulica qori ni o tekivu yalolailai. Saga mo muria na ka o wilika.—Fpai. 4:8.
Mo vulica na ulutaga o na valuta kina na yalolailai (Raica na parakaravu 17)
18. Na ulutaga cava era vulica eso na tacida?
18 O Eliza sa tukuni oti mai, e vulici Jope ena nona vuli vakataki koya. E kaya: “E tautauvata sara ga na keirau ituvaki kei Jope. E veitaravi na ka rarawa e sotava. Ni yalolailai, e rai tu ga vei Jiova ni sega mada ga ni kila na vu ni nona rarawa.” (Jope 42:1-6) E kaya o Diane, sa tukuni oti mai: “Keirau vulica vakaveiwatini na ivola Toro Voleka Vei Jiova. Keirau vakavinavinakataka ni tuli keirau o Jiova me vaka na dautulituli. Ni keirau dau yalolailai, keirau saga me keirau vakasamataka ni tuli keirau tiko o Jiova me keirau vinaka kina. Keirau volekati koya sara ga.”—Aisea 64:8.
VAKANAMATA ENA VURAVURA VOU
19. Na cava meda nanuma tiko?
19 Kevaka mada ga e tiko e dua noda ituvatuva vinaka vakayalo, eda vulica tale ga eso na ulutaga e ganiti keda, meda nanuma tiko ni na sega ni vakaotia vakadua na yalolailai. Eso na gauna ena basika tale mai! Ia o Jiova duadua ga ena vukei keda meda valuta na yalolailai. Meda nuidei ni levu na gauna eda na marautaka noda bula, e savasava noda lewaeloma, eda marautaka tale ga noda qaravi Jiova.
20. Na cava mo vakadeitaka?
20 Meda vakadeitaka mada ga me kua ni vakayalolailaitaki keda na ka eda dau cakava e liu, veika dredre eda sotava tiko nikua, se noda malumalumu. Eda na valuta rawa ga na yalolailai ena veivuke i Jiova. (Same 143:10) Eda vakanamata tu ena siga sa na oti vakadua kina na raicala. Ena gauna qori, sa na sega tale ni dua na ka meda nuiqawaqawataka. Eda sa na marautaka ga e veisiga noda qaravi Jiova, na noda Kalou dauloloma!
SERE 34 Yalodina Tiko Ga
a IVAKAMACALA NI VOSA: Ena ulutaga qo, na vosa “yalolailai” e dusia noda rarawa ena so na gauna, e veiveisau tale ga na ivakarau ni lomada. Qo e sega ni lomabibi vakabalavu, e vinakati kina meda laurai vakavuniwai.
b Eda kila ena ka e vola o Paula ni leqa tiko na matana, e vakadredretaka nona volavola kei na nona cakacaka vakavunau. (Kala 4:15; 6:11) Se rairai vakavuna nona nuiqawaqawa eso na qasenivuli lasu. (2 Kor. 10:10; 11:5, 13) Eda sega ni kila na vu ni nona lomaleqa, eda kila ga ni vakararawataki koya sara ga.
c Sa veisau eso na yaca.