Mo Tukuna na ka Dina ena Yalovinaka

1. Na cava meda cakava meda lewena kina na vuvale i Jiova?

ENA imatai ni gauna eda sota kina kei ira na tacida, eda dau taroga: “O mai kila vakacava na dina?” Eso era kaya nira “susu ena dina.” Eso tale era kaya nira se “vou ena dina.” Eda tukuna qori ni dusimaka na ivakarau ni noda bula na ka dina ena Vosa ni Kalou. Na vuna? Eda kila nida na lewe ga ni vuvale i Jiova ke da vakaraitaka nida taleitaka na ka dina, eda muria tale ga. E okati kina noda dina ena ka eda tukuna kei na ka eda cakava.​—Same 15:​1-3.

2. (a) Na cava e kilai kina o Jisu? (b) Cava e cakava na ka dina e vakavulica o Jisu?

² E kilai o Jisu ni dau tukuna na ka dina. Era kila na kena meca ni dau tukuna na ka dina, nira sega mada ga ni taleitaka ena so na gauna. (Maciu 22:16) E tukuna o Jisu na ka ena cakava na ka dina: “Au kauta mai na veitawasei, rau na veitawasei na veitamani tagane, o rau na veitinani yalewa, kei rau na veivugoni yalewa.” (Maciu 10:35) E sega ni vinakata o Jisu me cati nona itukutuku kei na ka eratou vunautaka nona imuri, ia e kila ni na yaco qori. (Maciu 23:37) E kila tiko ni nona itukutuku ena wasea rua na vuravura. Eso era na taleitaka na ka dina, eso tale era na cata.​—2 Ces. 2:​9-11.

3. Na cava eda na veivosakitaka ena ulutaga qo?

³ Me vakataki Jisu, eda na dau dina e veigauna ke sega mada ga ni taleitaki. Kena ikuri, eda vunautaka na ka dina, eda vakavulica tale ga ke ra sega ni taleitaka mada ga eso. Kena ibalebale qo meda sa kua ni kauaitaka na sala kei na gauna meda tukuna kina na ka dina? Sega! Eda na veivosakitaka e liu ena ulutaga qo na isaunitaro qo: Eda na kunea e vei na ka dina? Oti eda na qai dikeva na isaunitaro tarava: Na inaki cava meda tukuna kina na ka dina, na kena itukutukuni, kei na gauna cava? Eda na kila ena kena isau na sala meda vakavinakataka kina noda tukuna na ka dina, ya nida vosa ena yalovinaka, kei na gauna donu.

EDA NA KUNEA E VEI NA KA DINA?

4. Na cava e iVurevure kina ni ka dina o Jiova?

⁴ O Jiova e iVurevure ni ka dina. E dina na ka kece e tukuna. Kena ivakaraitaki, e dina na ka kece e tukuna me baleta na ka e donu kei na ka e cala. (Same 19:9; 119:​142, 151) E yaco dina nona yalayala se bera mai. (Aisea 55:​10, 11) E sega ni yalayala lasu. (Tiko 23:19) Io, e sega ni lasu rawa o Jiova! (Iper. 6:18) Sa rauta me kilai ni “Kalou daudina” o Jiova.​—Same 31:5.

5. Na cava e sega ni dredre kina me kunei “na Kalou daudina”? Vakamacalataka. (Cakacaka 17:27)

⁵ Era kaya eso ni dredre mera kunei Jiova “na Kalou daudina.” Ia e cala qori. Eda raica sara tu ga na ivakadinadina ni bula dina tiko. (Roma 1:20) E kaya na yapositolo o Paula vei ira na kai Kirisi vuli vinaka e Aceni, ni vinakata na Kalou meda “kunei koya,” e sega tale ga “ni yawa o koya vei keda yadua.” (Wilika Cakacaka 17:27.) Io, o Jiova e vagolei ira mai na yalomalumalumu era vaqara tiko na ka dina.​—Joni 6:44.

6. Na cava eso na ka dina e tu ena iVolatabu? Cava o vakavinavinakataka kina nomu kila na dina?

⁶ Dua na sala eda na kunei Jiova kina nida vulica na iVolatabu. Era uqeti ena yalo tabu na tagane era vola. (2 Pita 1:​20, 21) Kena ibalebale, na ka kece e tu ena iVolatabu e dina, meda nuitaka. Kena ivakaraitaki, eda nuitaka na ka e tukuna me baleta na buli ni lomalagi kei na ka e tu e vuravura. (Vkte. 1:​1, 26) Eda vakabauta na ka e kaya me baleta na vu ni noda valavala ca, rarawa kei na mate. (Roma 5:12; 6:23) Eda nuitaka na ka e tukuna ni o Jiova ena vakayagataki Luvena me vakaotia na ka e cakava o Setani, na “tama ni lasu.” (Joni 8:44; Roma 16:20) Eda nuitaka tale ga na ka e yalataka ni na vakarusai ira na tamata ca o Jisu, ena vakaturi ira na mate, ena veisautaka na vuravura me parataisi qai vukei keda meda uasivi. (Joni 11:​25, 26; 1 Joni 3:8) E dua na ka totoka e solia vei keda o Jiova! E vakavulici keda ena ka dina, e vinakata tale ga meda vakavulici ira eso tale.​—Maciu 28:​19, 20.

NA INAKI CAVA MEDA TUKUNA KINA NA KA DINA?

7-8. Vakacava e bibi na inaki ni noda tukuna na ka dina? Tukuna e dua na ivakaraitaki. (Marika 3:​11, 12) (Raica tale ga na iyaloyalo.)

⁷ Eda sa dikeva mai ni bibi meda dau dina ke da via lewenivuvale i Jiova. Ia meda vakamarautaki koya, e bibi tale ga vei Jiova na inaki eda tukuna kina na ka dina. Dikeva mada na ka e yaco ena nona cakacaka vakaitalatala e vuravura o Jisu. (Wilika Marika 3:​11, 12.) Ni vunau tiko volekata na Wasa o Kalili, era osodrigi yani e dua na ilala levu. E maliwai ira eso era curumi timoni, era mai cuva vua ra qai kacivaka vei Jisu: “O iko na Luve ni Kalou.” Na cava era tukuna kina na timoni na ka dina me baleti Jisu? Kena irairai ni duatani tiko na nodra inaki, era vinakata mera vakabauti vei ira na tu e kea, toso na gauna era na rawai ira mera kua ni qaravi Jiova. Era tukuna na ka dina na timoni, ia e ca nodra inaki nira nanumi ira ga. E kila vinaka o Jisu na nodra inaki, e sega sara ga ni taleitaka. E vakaroti ira mada ga mera kua ni vunautaki koya.

⁸ Na cava eda vulica ena italanoa qo? E kauaitaka o Jiova na inaki ni noda tukuna na ka dina. E bibi me vinaka na inaki ni noda vunautaka na ka dina, me vakalagilagi ga kina o Jiova, sega ni o keda!​—Maciu 5:16; vakatauvata na Cakacaka 14:​12-15.

9. Na cava meda qarauna? Na vuna?

⁹ Qo e dua tale na ituvaki meda qarauna meda kua kina ni vakalagilagi. Kaya mada ke tukuna vei iko e dua na tacida nuitaki eso na itukutuku me maroroi, ia o qai lai talanoataka. Ke ra qai kila o ira na rogoca ni dina na ka o tukuna vei ira, de dua era na qoroqoro ra qai nanuma ni o kila tiko e levu tale na itukutuku me maroroi. Qori e rawa ni vakavuna mera raici iko cake, ia ena sega ni taleitaka o Jiova. (Vkai. 11:13) Na vuna? Eda sa tukuna mada na itukutuku me maroroi, e cala tale ga na inaki eda tukuna kina.

NA KENA ITUKUTUKUNI?

10. Na cava na ibalebale ni noda vosa ena “yalovinaka”? (Kolosa 4:6)

¹⁰ Wilika Kolosa 4:6. E tukuna na yapositolo o Paula vei ira na lotu vaKarisito e Kolosa ni bibi mera vosa ena “yalovinaka ena gauna kece.” Cava na kena ibalebale ya? Na ibalebale ni kena vosa vaKirisi, oya ni bibi me yaga na ka eda tukuna, me tau ena yalovinaka, me uqeti ira na rogoca.

11-12. Na cava meda qarauna kina noda vakavulica na ka dina? Vakamacalataka. (Raica tale ga na iyaloyalo.)

¹¹ E bibi meda muria na ivakasala i Paula meda vosa ena yalovinaka nida vakavulica na ka dina. Na iVolatabu e vakatauvatana na ka dina kei na iseleiwau gata e wasea na yagoda kei na lomada. Se kilai kina na ka e tu e lomada, se noda inaki. (Iper. 4:12) Ia ke da sega ni maqosataka noda vakayagataka na iVolatabu, eda rawa ni vakacudrui ira na rogoci keda. Ena sala cava?

¹² Vakasamataka na ituvaki qo. Ena cakacaka vakavunau, eda sotava e dua na turaga e dau masu vakalevu ina matakau, e soqova tale ga na Kirisimasi kei na Siganimate kei ratou nona vuvale. Eda rawa sara ga ni vakaraitaka vua mai na iVolatabu ni ka vakalialia nona masu tiko ina matakau, o vakaraitaka tale ga vua ni yavutaki ena lotu butobuto na Kirisimasi kei na Siganimate. (Aisea 44:​14-20; 2 Kor. 6:​14-17) Ke da cakava qori ena imatai ni veisiko, eda sa tukuna tiko na ka dina, ia eda sega ni maqosataka noda vakayagataka na Vosa ni Kalou.

13. Eda na vakaisaluakitaka vakacava noda vosa ena masima?

¹³ E tukuna tale ga o Paula ni bibi me vakaisaluaki ena masima na eda tukuna. E sega ni tukuna tiko meda vunitaka na dina. Ia e uqeti keda meda vakaisaluakitaka noda vosa me rawa ni rogovinaka vei ira na “tovolea” se rogoca. (Jope 12:11) E sega ni rawarawa qori. Nida dau vakasaqa mada ga, eda nanuma nira na taleitaka eso tale na kakana e kana vinaka vei keda. Eda nanuma tale ga ni noda ivosavosa era na taleitaka na tamata kece. Ia e sega ni dina qori. Kena ivakaraitaki, e nodra ivakarau vakavanua eso mera dau vosa vakadodonu, vei ira mada ga na qase cake. Eso tale e sega ni kena ivakarau vei ira qori, ni veibeci. E tukuna o Paula ni bibi meda kila na “ka [meda] tukuna vua na tamata yadua.” Kena ibalebale me vakaisaluaki na ka eda tukuna, me kua ni vakatau ena ka eda taleitaka se noda ivakarau vakavanua, ia mera taleitaka o ira na rogoci keda.

NA GAUNA CAVA?

14. Vakacava e vakavulici ratou nona tisaipeli o Jisu ena ka kece e kila? Vakamacalataka.

¹⁴ E dau vosa tu ga ena yalovinaka o Jisu vei ratou nona imuri, e vakavulici ratou tale ga ena levu na ka. (Mari. 6:34) Ia e levu tale na ka me ratou kila. E sega ni saga o Jisu me vakavulici ratou ena ka kece e kila, ni vakaiyalayala ga na ka ratou rawata. Kena ikuri, e kila ni se bera ni kena gauna me ratou vulica eso tale na ka dina. Io, e tukuna ni ratou na sega ni taura rawa na kena ibalebale. (Joni 16:12) Cava eda vulica?

15. Vakacava meda vakavulici ira noda gonevuli ena ka kece ena dua ga na gauna? Vakamacalataka. (Vosa Vakaibalebale 25:11) (Raica tale ga na iyaloyalo.)

¹⁵ Na cava eda vulica ena ivakaraitaki i Jisu? Noda kila na ka dina, e sega ni kena ibalebale meda vakavulica na ka kece ena dua ga na gauna. Eda na vakatotomuri koya vakacava? Meda vakasamataka tiko na kedra ituvaki na tamata. Vakasamataka tale mada na turaga e soqova na Kirisimasi kei na Siganimate kei ratou nona vuvale. Eda kila ni yavutaki ena lotu butobuto na soqo qori, e cata tale ga na Kalou. Ia kaya mada ke o tekivu vuli iVolatabu kei na turaga qori ni vo e dua se rua na macawa me Kirisimasi. Vakacava o na vosa vakayalovinaka vua ke o vakaraitaka na ka e tukuna na iVolatabu me baleta na soqo e yavutaki ena lotu butobuto o qai namaka me sa kua ni soqova na Kirisimasi? Eso na gonevuli era na muria totolo na ka era vulica. Ia eso tale ena taura na gauna mera veisautaka nodra rai kei na nodra itovo. Eda na vukei ira noda gonevuli mera toso, nida tukuna vei ira na ka e vinakati mera kila ena gauna donu.​—Wilika Vosa Vakaibalebale 25:11.

16. Eda na vukei ira vakacava noda gonevuli mera “muria tiko ga na ka dina”?

¹⁶ E dua na ka eda marautaka, ya nida vakavulica eso tale ena ka dina me baleti Jiova. Eda na vukei ira mera “muria tiko ga na ka dina” ke da cakava qo: Mo ivakaraitaki vinaka tiko ga vei ira. (3 Joni 3, 4) Me laurai ena nomu bula ni o vakabauta na vosa ni yalayala ena iVolatabu. Me vinaka na inaki ni nomu tukuna na ka dina. Ni o vakavulica na ka dina, mo vosa ena yalovinaka kei na yalomalua ena gauna donu. Kena ikuri, mo vakalagilagi Jiova ga ena ka kece. Ke o cakava qori, o vakaraitaka ni o qaravi Jiova na Kalou daudina.