‘Ke Dua e Vakabulai, Kena iBalebale Qori ena Bula Tu Ga’?
Kena isau vakaivolatabu
Sega. Na iVolatabu e sega ni vakavuvulitaka, ‘ke dua e vakabulai, kena ibalebale qori ni na bula.’ E rawa ni luluqa na nona vakabauti Jisu e dua qai sega ni rawata kina na bula. E kaya na iVolatabu ni vinakati na sasaga kei na “vala vakaukaua,” me dei tiko ga kina na vakabauta. (Juta 3, 5) E tukuni vei ira na lotu vaKarisito taumada era ciqomi Karisito mera ‘sasagataka tiko ga nodra bula ena rere kei na sautaninini.’—Filipai 2:12.
E sega ni tokona na iVolatabu na ivakavuvuli, ‘ke dua e vakabulai, ena bula tu ga’
Na iVolatabu e vakasalataki keda ni na sega ni curu ina Matanitu ni Kalou o koya e vakayacora na ivalavala ca bibi. (1 Korinica 6:9-11; Kalatia 5:19-21) Ena sega ni yaga na ivakasala qori ke da kila nida na vakabulai. Ia e vakaraitaka na iVolatabu ni o koya mada ga e vakabulai ena rawa ni lesu ina nona ivalavala taumada. Kena ivakaraitaki e tukuni ena Iperiu 10:26: “Ke da nakita gona meda valavala ca nida sa kila na ivakavuvuli dina, sa na sega tale ni dua na isoro me cabori ena vuku ni noda ivalavala ca.”—Iperiu 6:4-6; 2 Pita 2:20-22.
E vakabibitaka o Jisu na vakabauta ena dua na vosa vakatautauvata, e vakatauvatani koya ena vaini, o ira na nona imuri mera tabanivaini. Eso vei ira era na vakaraitaka nodra vakabauta ena ka era vuataka, se na ka era cakava. Ia ena seavu yani ni toso na gauna, era na qai “viritaki laivi vaka na tabanikau [sega ni vua],” era na sega ni vakabulai. (Joni 15:1-6) E vakayagataka tale ga na vosa vakatautauvata qori o Paula ni kaya vei ira na sega ni dei ena vakabauta nira na “musuki tani.”—Roma 11:17-22.
Era vakaroti na lotu vaKarisito mera “yadra tiko.” (Maciu 24:42; 25:13) Era na sega ni vakabulai o ira na moce vakayalo, se o ira na cakava na “cakacaka ni butobuto,” se o ira na sega ni vakacavara vinaka na cakacaka e lesia o Jisu.—Roma 13:11-13; Vakatakila 3:1-3.
E levu na tikinivolatabu e vakaraitaka ni o ira mada ga era vakabulai ena vinakati mera vosota se yalodina tiko ga me yacova na icavacava. (Maciu 24:13; Iperiu 10:36; 12:2, 3; Vakatakila 2:10) Dua na ka nodra marau na lotu vaKarisito ena imatai ni senitiuri nira vuli mai na nodra vakabauta kei na vosota o ira era vakabauta vata. (1 Cesalonaika 1:2, 3; 3 Joni 3, 4) E veivakadreti na iVolatabu ena bibi ni vosota, vakacava ena yaga na ivakavuvuli qori ke ra vakabulai mada ga o ira era sega ni vosota?
E vakadeitaka o Paula nona vakabulai ena gauna e vakarau vakamatei kina. (2 Timoci 4:6-8) Ena dua na gauna e liu, e kila o koya ni na sega ni rawa ni vakabulai baleta na nona rawai rawarawa ina gagadre ni yago. E kaya kina: “Au vakamalumalumutaka na yagoqu, au qai vakabobulataka, baleta meu kua ni vunau tiko vei ira na so au qai sega tale ni vakadonui.”—1 Korinica 9:27; Filipai 3:12-14.