Me Vakacegui Iko na Veivakadonui i Jiova

1. Na cava era na rairai vaqaqa eso na dausokalou yalodina i Jiova?

E VEIVAKACEGUI dina na noda kila ni o Jiova e dau vakadonui ira na nona tamata vakailawalawa! E kaya na iVolatabu: “Dau marautaki ira na nona tamata o Jiova.” (Same 149:4) Ia ena so na gauna, era dau yalolailai eso ra qai vaqaqa, ‘E vakadonui au tiko o Jiova?’ E levu na dau sokalou yalodina i Jiova ena gauna vakaivolatabu era dau vakatitiqa va qori.—1 Sam. 1:6-10; Jope 29:2, 4; Same 51:11.

2. O cei e vakadonuya o Jiova?

² E vakamatatataka na iVolatabu ni o Jiova ena rawa ni vakadonui keda na kawa ivalavala ca. Ena sala cava? Bibi meda vakabauti Jisu Karisito meda papitaiso tale ga. (Joni 3:16) Eda vakaraitaka kina e matana levu nida sa veivutunitaka noda ivalavala ca, eda sa yalataka tale ga vua na Kalou nida na cakava na lomana. (Caka. 2:38; 3:19) E marau vakalevu o Jiova nida cakava qori meda rawa kina ni nona itokani voleka. Ke da gumatua meda dei ena noda yalayala vei Jiova, ena vakadonui keda, ena raici keda tale ga meda nona itokani voleka.—Same 25:14.

3. Na cava eda na veivosakitaka?

³ Na cava era na rairai nanuma kina eso ni sega ni vakadonui ira na Kalou? E vakaraitaka vakacava o Jiova ni vakadonuya e dua? Ena vakadeitaka vakacava e dua na lotu vaKarisito ni vakadonui koya na Kalou?

VUNA ERA NANUMA KINA ESO NI SEGA NI VAKADONUI IRA O JIOVA

4-5. Ke da beci keda mada ga, na cava meda vakadeitaka?

⁴ Eso era dau beci ira nira se gone. (Same 88:15) E kaya e dua na tacida gone o Adrien: “Au dau beci au sara ga. Au vakasamataka niu se gone au dau masulaki ratou na noqu vuvale me ratou na bula ena parataisi, ia au kila vinaka ni sega ni ganiti au meu na bula kina.” E kaya o Tony, e sega ni susu ena vuvale lotu vaKarisito: “Rau sega vakadua ni kaya vei au na noqu itubutubu ni rau lomani au, se rau marautaka na ka au cakava. Au nanuma kina ni sega ni dua na ka au cakava me vakamarautaki rau.”

⁵ Ke da dau beci keda ena so na gauna, meda nanuma tiko ni o Jiova ga e vagolei keda mai vua. (Joni 6:44) E dau raica na noda itovo vinaka eda sega ni vakasamataka tu. E kila tale ga na lomada. (1 Sam. 16:7; 2 Vei. 6:30) Eda nuidei gona ni tukuna o koya nida ka talei.—1 Joni 3:19, 20.

6. Na cava e nanuma o Paula me baleta na nona cala makawa?

⁶ Nira se bera ni vulica na ka dina eso, e dau vakaleqa tu ga na lomadra na ka era cakava (1 Pita 4:3) Eso mada ga na lotu vaKarisito era saga tiko ga mera valuta na nodra malumalumu. Vakacava o iko, o dau nanuma ena so na gauna ni sega ni vosoti iko o Jiova? Ke dina qori, kua ni yalolailai eso tale ga na dausokalou yalodina i Jiova e va qori na nodra rai. Kena ivakaraitaki, e nanuma na yapositolo o Paula ni vakaloloma dina ena gauna e vakasamataka kina na nona malumalumu. (Roma 7:24) Ia e veivutunitaka o Paula na nona ivalavala ca mani papitaiso. E se tukuna tiko ga ni “imurimuri sara ni yapositolo,” e “torosobu duadua vei ira” na ivalavala ca.—1 Kor. 15:9; 1 Tim. 1:15.

7. Na cava meda nanuma tiko me baleta na noda cala makawa?

⁷ E yalataka na Tamada vakalomalagi ke da veivutuni ena vosoti keda. (Same 86:5) Koya gona, ke da veivutunitaka dina na noda valavala ca, eda rawa ni nuitaka na vosa i Jiova ni sa vosoti keda.—Kolo. 2:13.

8-9. Eda rawa ni valuta vakacava na rai nida sega ni vakamarautaki Jiova ena ka eda cakava?

⁸ Eda via qaravi Jiova kece mai vu ni lomada. Ia era nanuma eso nira sega ni cakava tiko e levu na ka me vakadonui ira kina o koya. E kaya e dua na tacida o Amanda: “Au nanuma ni noqu solia noqu vinaka, ya meu cakava e levu sara na ka. Au namaka kina me levu na ka au cakava. Niu sega ni rawata qori au nanuma kina niu na vakararawataki Jiova me vaka ga noqu vakararawataki au.”

⁹ Eda na valuta vakacava na rai nida sega ni cakava tiko na ka e vakamarautaki Jiova? Meda nanuma tiko ni o Jiova e yalorawarawa. E vinakata meda cakava ga na ka eda rawata. E taleitaka na ka eda cakava ena vukuna ia meda cakava ga mai vu ni lomada. Meda vakasamataki ira tale ga na ivakaraitaki vakaiVolatabu era qaravi Jiova mai vu ni lomadra. Eda rawa ni vakasamataki Paula. E gumatua me vica vata na yabaki, e lakova tale ga na vanua yawa me tauyavutaka e levu na ivavakoso. Ia ni yalani na nona cakacaka vakavunau ena vuku ni kena ituvaki, vakacava e sega ni vakadonui koya kina na Kalou? Sega. E cakava tiko ga na ka e rawata, e vakalougatataki koya kina o Jiova. (Caka. 28:30, 31) E duidui tale ga na ka eda rawa ni cakava ena vuku i Jiova. Ia e bibi ga vua na inaki eda cakava kina. Meda dikeva mada qo eso na sala e vakaraitaka kina o Jiova ni vakadonui keda.

E VAKARAITAKA VAKACAVA O JIOVA NONA VEIVAKADONUI?

10. Sala cava eda rawa ni “rogoca” kina na nona vakadonui keda o Jiova? (Joni 16:27)

¹⁰ E vakayagataka na iVolatabu. E taleitaka o Jiova me vakaraitaka na nona vakadonui ira e lomana. E vakaraitaki ena iVolatabu e rua na gauna ni tukuna kina vei Jisu ni lomani koya, e vakadonui koya tale ga ni Luvena lomani. (Maciu 3:17; 17:5) Vakacava o via rogoca tale ga na nona veivakadeitaki o Jiova ni vakadonui iko? E sega ni vosa sara ga mai vakadodonu vei keda o Jiova, ia e vakayagataka na nona vosa volai. Eda rawa ni “rogoca” na nona veivakadonui nida wilika na vosa i Jisu ena Kosipeli. (Wilika Joni 16:27.) e vakatotomuria vinaka o Jisu na itovo i tamana. Na gauna gona eda wilika kina na nona vakaraitaka o Jisu ni vakadonui ira na nona imuri yalodina era sega ni uasivi, eda rawa sara ga ni raitayaloyalotaki Jiova ni tukuna tiko vei keda na vosa qori.—Joni 15:9, 15.

11. Vakacava e sega ni vakadonui keda o Jiova ke da sotava tiko na veika dredre? (Jemesa 1:12)

¹¹ Ena ka e cakava. E vinakata sara ga o Jiova me vukei keda, me vaka nona vakarautaka na veika vakayago. Eso na gauna ena rairai vakatara o Jiova meda sotava na veika dredre me vaka na turaga yalododonu o Jope. (Jope 1:8-11) Nida sotava na veika dredre, meda kua ni nanuma ni sa sega ni vakadonui keda na Kalou. Ia qori e dua na sala eda rawa ni vakaraitaka kina na levu ni noda lomani Jiova kei na noda nuitaki koya. (Wilika Jemesa 1:12.) Eda na vakila nona loloma kei na veitokoni ni vukei keda meda vosota.

12. Na cava o rawa ni vulica vei Dmitrii?

¹² Dikeva mada e dua na tacida mai Esia o Dmitrii. E vakacegui mai na nona cakacaka e sega tu ni cakacaka me vica vata na vula. Mani nanuma me vakalevutaka na nona cakacaka vakaitalatala, e vakaraitaka tale ga ni nuitaki Jiova. Ia ni oti e vica vata tale na vula e se sega tiko ga ni cakacaka. Oti qori e tauvimate bibi e sa sega mada ga ni veitosoyaki rawa. Ni tagane vakawati, e tama tale ga e nanuma ni sa sega na kena yaga. E vaqaqa tale ga ke se vakadonui koya tiko ga o Jiova. Dua na yakavi e tabaka o luvena yalewa ena dua na tikiniveva na Aisea 30:15, e tukuni kina: “Oni na kaukaua ke oni tiko vakacegu, oni vakanuinui tiko.” E kauta sara yani ena nona yasa ni loga qai tukuna vua, “Ta, ni o yalolailai, mo nanuma tiko na tikinivolatabu qo.” E raica gona o Dmitrii, ni se veirauti tiko ga na kakana ena nodratou vale, nodratou isulu, kei na vanua me ratou tiko kina e vakavinavinakataki Jiova kina, e kaya: “E vinakati ga meu lomavakacegu, meu nuitaka tiko ga na noqu Kalou.” Ke o sotava tiko e dua na ituvaki va qori, mo nuidei ni kauaitaki iko o Jiova qai vukei iko mo vosota.

13. O cei e rawa ni vakayagataka o Jiova me vakaraitaka nona vakadonui keda? Ena sala cava?

¹³ E vakayagataki ira na mataveitacini. O Jiova e vakayagataki ira na mataveitacini me vakaraitaka nona vakadonui keda. Kena ivakaraitaki, e rawa ni uqeta eso tale mera vakayaloqaqataki keda ena gauna donu. E vakadinadinataka qori e dua na tacida yalewa mai Esia ena gauna e nuiqawaqawa tu kina. E vakacegui mai na nona cakacaka, e tauvimate bibi. Oti, e valavala ca bibi o watina, e qai vakacegui mai na nona itavi vaqase ni ivavakoso. E kaya na tacida yalewa: “Au sega ni kila se cava e yaco tiko kina qo. Au veinanuyaka de dua na ka ca au cakava, e sega ni vakadonui au kina o Jiova.” E mani vakamasuti Jiova na tacida qori me vakadeitaka vua na nona veivakadonui. Na cava e cakava o Jiova? E kaya na tacida yalewa: “Era vosa vei au na qase ni ivavakoso, era vakadeitaka vei au ni se lomani au tiko ga o Jiova.” Toso na gauna, e kerei Jiova tale na tacida yalewa qori me vukei koya. E kuria: “Ena siga vata qori, au taura kina e dua na nodra ivola na mataveitacini ena ivavakoso. Niu wilika na nodra vosa ni veivakacegui, au kila sara ga ni rogoca o Jiova na noqu masu.” Io, e dau vakaraitaka o Jiova na nona veivakadonui ena nodra vosa vakayalovinaka na tacida.—Same 10:17.

14. Na cava e dua tale na sala e vakaraitaka kina o Jiova na nona vakadonui keda?

¹⁴ Na cava e dua tale na sala e vakaraitaka kina o Jiova na nona vakadonui keda? Oya ni vakayagataki ira na mataveitacini mera vakasalataki keda ena gauna donu. Kena ivakaraitaki, ena imatai ni senitiuri, o Jiova e vakayagataka na yapositolo o Paula me vola e 14 na ivola uqeti vakalou vei ira na tacina vakayalo. E okati ena ivola qori na veivunauci, ia e tau ena yalololoma. Na cava e uqeti Paula kina o Jiova me okata ena nona ivola na veivunauci se ivakasala va qori? E Tama vinaka o Jiova, e dau vakadodonutaki ira na luvena “e lomana.” (Vkai. 3:11, 12) Ke dua gona e vakasalataki keda mai na iVolatabu, meda raica qori me nona veivakadonui na Kalou, sega ni nona cudruvi keda. (Iper. 12:6) Na cava eso tale na sala e vakaraitaka kina o Jiova na nona veivakadonui?

ESO TALE NA SALA E VAKADONUI KEDA KINA O JIOVA

15. E solia vei cei o Jiova na yalona tabu? Na cava e vakanuideitaki keda kina qori?

¹⁵ O Jiova e solia na yalona tabu vei ira e vakadonuya. (Maciu 12:18) Eda rawa ni taroga, ‘Vakacava au dau vakaraitaka eso na itovo e okati ena vua ni yalo tabu ni Kalou?’ O raica ni o sa vosovoso tiko vakalevu ni vakatauvatani kei na gauna o se bera ni kilai Jiova kina? Na levu ga ni nomu vulica na sala mo vakaraitaka kina na itovo e okati ena vua ni yalo tabu, o na nuidei sara ga ni vakadonui iko o Jiova!—Raica na kato “E Okati ena Vua ni Yalo Tabu na ...”

16. O cei e vakayagataka o Jiova me vunautaka na itukutuku vinaka? Na cava nomu rai? (1 Cesalonaika 2:4)

¹⁶ E marau o Jiova me vakacolati ira e vakadonuya mera vunautaka na itukutuku vinaka. (Wilika 1 Cesalonaika 2:4.) Dikeva na sala e yaga kina qori vua e dua na tacida yalewa o Jocelyn ni vunautaka na itukutuku vinaka. Dua na siga ni yadra mai, e lomabibi sara ga. E kaya: “Sa sega vei au na kaukaua, au nanuma ni sega na kequ yaga. Ia au painia tiko ena gauna ya, na siga tale ga qori meu lako kina ena cakacaka vakavunau. Au mani masu, au gole sara yani.” Ena mataka qori e sota sara o Jocelyn kei Mary, e dua na marama yalovinaka e taleitaka me vuli iVolatabu. Oti tale e vica na vula e qai talanoataka o Mary ni a masu tiko vua na Kalou me vukei koya ena gauna e tukituki yani kina o Jocelyn. Ni vakasamataka lesu o Jocelyn na veika e yaco qori, e kaya: “E vaka sara ga e tukuna tiko vei au o Jiova, ‘Au vakadonui iko.’” Macala ga nira na sega ni taleitaka eso na noda cakacaka vakavunau. Ia eda rawa ni nuidei ni marautaka o Jiova nida solia noda vinaka kece meda vunautaka na itukutuku vinaka.

17. Na cava o vulica ena ka e tukuna o Vicky me baleta na ivoli? (Same 5:12)

¹⁷ O Jiova e vakayagataka na yaga ni ivoli vei ira e vakadonuya. (1 Tim. 2:5, 6) Vakacava ke da vakabauta na ivoli, eda papitaiso sara, ia eda se nanuma tiko ga ni sega ni vakadonui keda o Jiova? Meda nanuma tiko ni sega ni rawa nida nuitaka na lomada, ia meda nuitaki Jiova. E okati ira na vakabauta na ivoli mera yalododonu e matana qai yalataka me vakalougatataki ira. (Wilika Same 5:12; Roma 3:26) Kena ivakaraitaki o Vicky, e yaga vua nona vakasamataka vakatitobu na ivoli. Dua na siga ni oti nona vakasamataka vakabibi na ivoli, e liaca: “Dua na gauna balavu e vosoti au voli mai kina o Jiova. ... Ia e vaka meu tukuna tiko vua: ‘E sega ni veirauti na nomuni loloma me vakadeitaka ni oni kauaitaki au. E sega ni ganiti au na isoro i Luvemuni.’” Ni vakasamataka vakatitobu o Vicky na iloloma uasivi na keda ivoli, e kila ni lomani koya dina o Jiova. Nida vakasamataka tale ga vakatitobu na ivoli, eda na vakila ni lomani keda dina o Jiova qai vakadonui keda.

18. Na cava eda nuidei kina ke da lomana tiko ga na Tamada vakalomalagi?

¹⁸ De dua eda saga meda muria na ka eda sa veivosakitaka mai, ia eda rairai yalolailai ena so na gauna nida via kila ke vakadonui keda o Jiova se sega. Ke yaco qori, nanuma tiko ni o Jiova e vakadonui “ira na lomani koya tiko ga.” (Jeme. 1:12) Saga gona mo toro volekati Jiova tiko ga, mo kila tale ga na sala e vakaraitaka kina nona vakadonui iko. Nanuma tiko ni o Jiova e “sega ni yawa ... vei keda yadua.”—Caka. 17:27.