Eda iTokani ni Kalou ke da Kilai Koya Vinaka
E kaukaua na Dauveibuli, ia e tiko na nona itovo talei. E vinakata meda kilai koya qai nona itokani. (Joni 17:3; Jemesa 4:8) Qori na vuna e vakatakila kina vei keda e levu na ka me baleti koya.
E Tiko na Yacana na Dauveibuli
“Mera kila na tamata ni o kemuni, na yacamuni ga o Jiova, o kemuni ga oni Cecere Duadua e vuravura taucoko.”—SAME 83:18.
E kaya na iVolatabu ni o Jiova na Kalou dina duadua ga. E bulia na lomalagi kei na vuravura, kei na veika bula kece. E dodonu meda sokaloutaki koya duadua ga. —Vakatakila 4:11.
E Kalou Dauloloma o Jiova
“Ni Kalou ga na loloma.”—1 JONI 4:8.
E vakaraitaka vei keda o Jiova e levu nona itovo ena iVolatabu kei na veika e bulia. Na loloma e nona itovo talei duadua, e kilai tani kina. Na levu ga ni noda kilai Jiova, na levu tale ga ni noda lomani koya.
E Dauveivosoti o Jiova
“Oni Kalou dau via veivosoti.”—NIEMAIA 9:17.
O Jiova e kila nida sega ni uasivi. Ke da dau cala, ena tu vakarau gona me “veivosoti.” Nida kerea nona veivosoti qai sasaga meda muduka na itovo ca, ena vosoti keda qai sega ni cudruvi keda.—Same 103:12, 13.
Vinakata o Jiova Meda Masu Vua
“E voleka o Jiova vei ira kece na kacivi koya . . . E rogoca o koya na nodra tagi ni kere veivuke.”—SAME 145:18, 19.
O Jiova e sega ni vinakata me qaravi ena dua na ivakarau ni sokalou (ritual) se ivakatakarakara. E dau rogoca noda masu me vaka ga nona rogoci luvena e dua na itubutubu dauloloma.