Watchtower LAIBRI ENA INTERNET
Watchtower
LAIBRI ENA INTERNET
vakaViti
  • IVOLATABU
  • IVOLA
  • SOQONI
  • E Bula Dina o Setani?
    Na Vale ni Vakatawa—2014 | Noveba 1
    • ULUTAGA LEVU | E BULA DINA O SETANI?

      E Bula Dina o Setani?

      iVakatakarakara kei Setani, na agilosi ca

      iVakatakarakara kei Setani e Madrid, mai Sipeni, e dusia tiko ni agilosi ca qai dau veivakacalai

      “Au susu mai El Salvador. Niu dau talaidredre, ena kaya o Na: ‘Ena vesuki iko na Tevoro!’ Au na sauma: ‘Veitalia!’ Au vakabauta ni bula tiko na Kalou, sega ni o Setani.”​—ROGELIO.

      O duavata kei Rogelio? Vakacava o duavata kei na rai qo?

      • O Setani e sega ni bula dina tiko, e ivakatakarakara ga ni ka ca.

      • E bula dina tiko o Setani ia e sega ni kauai ena ka eda cakava.

      • E ka bula vakayalo kaukaua o Setani, qai kaukaua nona veivakamuai.

      E vica na milioni era tokona na dui rai qori. Vakacava e bibi me kilai na rai cava e donu? Ke sega ni bula dina tiko o Setani, sa dua na veivakacalai levu qo vei ira na kaya ni bula tiko. Ke bula dina tiko qai sega ni kauai ena ka era cakava e levu, sega na betena nodra qaqarauni se rere. Ia ena vakarerevaki sara ke daulawaki qai dauveivakamuai o Setani.

      Meda raica mada na isau vakaivolatabu ni taro qo: O cei o Setani—e ivakatakarakara ga ni dua na ka ca se ka bula vakayalo? Ke bula dina tiko, ena rawa ni vakaleqai iko? Ke vaka kina, o na taqomaki iko vakacava?

  • E iVakatakarakara ga ni ka ca o Setani?
    Na Vale ni Vakatawa—2014 | Noveba 1
    • E vakaraica tu mai lomalagi o Setani na rarawa i Jope

      ULUTAGA LEVU | E BULA DINA O SETANI?

      E iVakatakarakara ga ni ka ca o Setani?

      Nida wilika tiko na iVolatabu, de dua eda rawa ni nanuma ni ivakatakarakara ga ni ka ca kece o Setani. Qori beka na ka e tukuna na iVolatabu me baleti koya? Ia cava ga e qai vakamacalataki kina ena iVolatabu ni rau a veivosaki o Setani kei Jisu Karisito, a veivosaki tale ga kei na Kalou Kaukaua? Vakasamataka mada e rua na gauna a veivosaki kina kei rau.

      VEIVOSAKI KEI JISU

      E temaki Jisu vakatolu na Tevoro ena gauna se qai tekivu cakacaka vakaitalatala kina. Kena imatai, e temaki Jisu me vakayagataka vakatani nona kaukaua soli vakalou me vakaceguya nona viakana. Oti qai uqeti Jisu me vakamatei koya ga me kauaitaki kina. Kena itinitini nona solia vei Jisu me lewa na matanitu taucoko e vuravura, ia me sokalou vakalekaleka e liu vua. E saqata kece na nona veitemaki qaseqase o Jisu, ni cavuqaqataka na ka e volai ena iVolatabu ena gauna kece e temaki kina.—Maciu 4:1-11; Luke 4:1–13.

      E vosa tiko vei cei o Jisu? A vosa tiko ina dua na ka ca e tiko vua? E tukuni ena iVolatabu ni o Jisu “e vakatovolei ena ka kece me vakataki keda, ia e sega ni bau valavala ca.” (Iperiu 4:15) E kaya tale ga na iVolatabu: “E sega ni valavala ca, se kune e gusuna na veivakaisini.” (1 Pita 2:22) E sega ni valavala ca o Jisu, e yalodina tiko ga qai sega ni bucina e lomana na ca. Sega gona ni vosa tiko o Jisu ina dua na ka ca e tiko e lomana, a vosa sara tiko ga vua e dua na ka bula vakayalo.

      Nodrau veivosaki tale ga qori e vakadinadinataka ni bula dina o Setani.

      • Vakasamataka nona solia na Tevoro vei Jisu me lewa na matanitu kece e vuravura, ia me sokalou e liu vua. (Maciu 4:8, 9) Ena ka wale na ka e tukuna qori o Setani ke sega ni bula dina tiko. E sega mada ga ni bau vakacala o Jisu nona tukuna o Setani ni tu vua na lewa.

      • Ni cakitaka kece na veitemaki qori o Jisu e ‘biuti koya’ o Setani ‘me waraka e dua tale na gauna veiganiti.’ (Luke 4:13) Vakacava e laurai e ke ni o Setani e ivakatakarakara ga ni dua na ka ca se dua na dauveivorati gumatua?

      • Dikeva nira “lako mai eso na agilosi mera vakacegui” Jisu. (Maciu 4:11) Vakacava o ira na agilosi era vakacegui Jisu ra qai vakayaloqaqataki koya, era ka bula dina vakayalo? Io. Cava ga meda kaya kina ni o Setani e sega ni dua na ka bula vakayalo?

      VEIVOSAKI KEI NA KALOU

      Na kena ikarua e baleti Jope na turaga e dau doka na Kalou. E tukuni ena kena itukutuku ni rua na gauna rau veivosaki kina na Tevoro kei na Kalou. Ia ena gauna ruarua qori a vakacaucautaki Jope na Kalou ena nona yalodina. E kaya o Setani ni qarava tiko ga na Kalou o Jope me rawaka kina, e volia na Kalou nona yalodina. E vaka me kaya tiko na Tevoro ni kilai Jope vinaka sara ni vakatauvatani kei na Kalou. E vakalaivi Setani na Kalou me kauta tani na iyau kece i Jope, me vakamatei ira na luvena, vakavuna mada ga nona tauvimate.a Toso na gauna sa qai vakavotui na lasu i Setani me baleti Jope, ni dina ga na Kalou. E vakalougatataki o Jope ena nona yalodina.—Jope 1:6-12; 2:1-7.

      Na nodrau veivosaki tiko qori na Kalou kei Setani, a vosa tiko o Jiova vua e dua na ka ca e tiko e lomana? E kaya na iVolatabu: “Ko koya na Kalou, sa dodonu na nonai valavala.” (2 Samuela 22:31) E kaya tale ga na Vosa ni Kalou: “E savasava, e savasava, e savasava o Jiova na Kalou, o koya e Kaukaua Duadua.” (Vakatakila 4:8) O koya e savasava qai uasivi, e sega ni laurai vua na duka ni ivalavala ca, e tawacala. Matata kina ni o Jiova e taucoko qai sega ni cala. Sega gona ni dua na ka ca e laurai vua.

      E sotava na leqa o Jope ena nodrau veivosaki na Kalou kei Setani

      Ia eso era na rairai tukuna ni a sega ni bula dina o Jope, sega gona ni yaco na veivosaki qori. Vakacava e dina qori? E vakadinadinataki ena so tale na tikinivolatabu ni a bula dina o Jope. Kena ivakaraitaki na Jemesa 5:7-11, e tukuni kina na ivakaraitaki i Jope me uqeti ira na lotu vaKarisito mera dau vosota na ituvaki dredre, mera nanuma tale ga ni na vakaicovitaka o Jiova na nodra vosota. Ena yaga na ivakaraitaki qori ke a sega ni bula dina o Jope, sega tale ga ni vakacacani koya o Setani? E tukuni tale ga ena Isikeli 14:14, 20, na yaca i Jope, Noa kei Taniela ni ratou turaga yalododonu. Me vakataki Noa kei Taniela, a bula dina o Jope, na turaga dau vakabauta. Ni bula dina o Jope, kena ibalebale ni a bula tale ga o koya e vu ni nona vakacacani.

      E vakamatatataka na iVolatabu ni o Setani e ka bula dina vakayalo. Ia o na rairai vaqaqa, ‘E rawa ni vakaleqai au kei na noqu vuvale nikua?’

      VAKACAVA ENA GAUNA QO?

      Vakasamataka ke ra toki mai na vanua o tiko kina e dua na ilala daubasulawa. Macala ga ni na leqataki na bula kei na nodra veivakamuai na daubasulawa qori. Ia vakatauvatana kei na ituvaki e yaco dina qo: Sa kolotaki mai vuravura o Setani kei ira nona timoni era ka bula vakayalo me vakataki koya ga, nira talaidredre vua na Kalou. Na cava ena yaco? Vakasamataka vata kei na ka o rogoca ena tabana ni itukutuku ena nomu vanua vaka kina e vanuatani.

      • Vakacava o rogoca ni torocake tiko ga na ivalavala voravora dina ni sagai e vuravura raraba me tarovi?

      • Vakacava e torocake tiko ga na iyaloyalo ni vakatevoro dina ni levu na itubutubu era kauai?

      • Vakacava o raica ni vakacacani tiko ga na itikotiko, dina ni sagai vagumatua me taqomaki?

      • Vakacava e tiko e dua na idre kaukaua e vakavuna na leqa ni kawatamata se mani vakacava na noda sasaga?

      Raica mada se o cei e kaya na iVolatabu e vu ni leqa nikua: “Sa qai kolotaki sobu na gata levu, na gata makawa, e vakatokai na Tevoro se o Setani, o koya e vakacala tiko na vuravura taucoko; e kolotaki sobu i vuravura kei ira na nona agilosi. . . . Drau na rarawa na vuravura kei na wasawasa, ni sa lako sobu vei kemudrau na Tevoro, e cudru vakalevu, ni kila tiko ni sa lekaleka nona gauna.” (Vakatakila 12:9, 12) Levu era sa vakadinadinataka na veika sa tukuni oti mai cake, era vakadeitaka ni o Setani e dua dina na ka bula vakarerevaki, e lewa tiko na vuravura nikua.

      O na vakataroga se o na taqomaki vakacava. Dodonu ga mo kauai kina. Na ulutaga tarava ena dusimaki iko ena ka mo cakava.

      a O Jiova na yaca ni Kalou e tukuni ena iVolatabu.

  • Meda Rerevaki Setani?
    Na Vale ni Vakatawa—2014 | Noveba 1
    • ULUTAGA LEVU | E BULA DINA O SETANI?

      Meda Rerevaki Setani?

      Rau vaqara cagi bulabula i tuba na veiwatini ni vagagai nodrau loma ni vale ena cagi ca

      E sega ni laurai qai vakarerevaki na kasi gaga na carbon monoxide—me vakataki Setani ga

      Dredre me kilai se cava qo. E sega na kena roka, iboi, se me kilai ni vu ni nodra mate e levu. Ni laurai o ira na mate tiko e vuravura, e sivia na veimama era mate ena vagagai ni kasi gaga qo na carbon monoxide. Ia e vinaka ni sa tiko na sala e rawa ni kilai kina na kasi gaga qo, rawa tale ga nida taqomaki kina. Levu era sa biuta ena nodra vale na misini vakalivaliva me kilai kina ke sa tiko na kasi qori ena nodra vale, ra qai yavala totolo mera taqomaki ira.

      E vaka sara ga na kasi gaga qori o Setani ni sega ni laurai qai vakarerevaki. Ia eda marau ni taqomaki keda na Kalou. Eda na sega gona ni rerevaki Setani ke da vakayagataka vinaka na isolisoli e vakalougatataki keda kina na Kalou.

      Noda vakatulewa. E tukuni ena Jemesa 4:7: “Moni vorata na Tevoro, ena qai dro tani vei kemuni.” E kaukaua o Setani, ia e sega ni rawa ni vakasaurarataki keda meda cakava na ka eda sega ni vinakata. E tu vei iko na galala ni vakatulewa. E kaya na 1 Pita 5:9: “Moni tudei ga ena nomuni vorati koya.” Nanuma tiko ni a biubiu o Setani ni oti nona vorata vakatolu o Jisu nona veitemaki. (Maciu 4:11) O rawa tale ga ni vorati Setani va qori.

      Veiwekani kei na Kalou. E veiuqeti na Jemesa 4:8 meda “toro voleka vua na Kalou.” E sureti keda sara ga o Jiova meda veiwekani voleka kei koya. Cava mo cakava? Kena imatai na nomu vulica e levu tale na ka me baleti koya ena iVolatabu. (Joni 17:3) Na ka o vulica me baleti Jiova ena uqeti iko mo lomani koya, mo cakava tale ga na lomana. (1 Joni 5:3) Na cava ena cakava na Tamada vakalomalagi ni o saga mo drau veiwekani voleka?  E tomana o Jemesa ena qai “toro voleka mai vei kemuni [na Kalou].”

      Vulica tiko na iVolatabu na cauravou, masuta na Kalou, qai vakarusa na iyaya ni vakatevoro

      Vakarautaka o Jiova na kakana vakayalo mo taqomaki kina

      Yalataka ni na veitaqomaki. E kaya na Vosa Vakaibalebale 18:10: “Na yaca i Jiova sa vale-cecere kaukauwa: Sa dro kina na yalododonu, ka sa bula.” Ia sega ni kena ibalebale qori ni yacana e vaka tiko e dua na kaukaua vuni. Kena ibalebale ga, ni o ira na dokai koya era rawa ni kerea nona veitaqomaki ena gauna ga era vinakata kina.

      iVakaraitaki yaga. E veiuqeti dina na ka e tukuni ena Cakacaka 19:19 me baleti ira na se qai tavuki ga ina lotu vaKarisito e Efeso: “E levu sara ga na daucakaisausau era kauta yani na nodra ivola ra qai lai vakama e matadra kece. Era cakacakataka na kena isau kece, e 50 na udolu na tikinisiliva.”a Era vakarusa na lotu vaKarisito qori na nodra iyaya kece ni vakatevoro, veitalia ke isau levu. Ena yaga tale ga vei keda na ivakaraitaki qori. Sa takalevu e vuravura na vakatevoro kei na vakacuru. So mada ga na iyaya se ivalavala ni vakacuru e rairai sega ni vakarerevaki ia sa sureta sara tiko ga na timoni. E bibi gona meda saga ena noda igu kece mera biu tani na veika kece qori.—Vakarua 18:10-12.

      Sa yabaki 50 o Rogelio, sa cavuti oti mai, sa qai kila ni bula dina tiko na Tevoro. Cava na vuna e veisau kina nona rai? E kaya o Rogelio: “Qori e imatai ni gauna me dua kina noqu iVolatabu. Au vakadeitaka ena ka au vulica kina ni bula dina tiko na Tevoro. Na ka tale ga au vulica au vorata rawa kina nona veitemaki.”

      “Au vakadeitaka ena ka au vulica ena iVolatabu ni bula dina tiko na Tevoro. Na ka tale ga au vulica au vorata rawa kina nona veitemaki”

      O na via raica na siga ena vakawabokotaki kina o Setani? O na rawa ni raica. E kaya na iVolatabu ni na “kolotaki ina drano bukawaqa e caudre tu ena sulifure,” o koya e dau vakacalai ira tiko e levu. (Vakatakila 20:10) Ia ena sega ni vakamai rawa e dua na ka bula vakayalo ena bukawaqa kei na sulifure. E vakatakarakarataka gona na rusa vakadua na drano bukawaqa qori. Sa na sega ni bula tale tiko o Setani. E gauna marautaki dina qori vei ira na dau lomana na Kalou!

      Ia mo vulica tiko ga ena gauna qo na ka kece me baleta na Kalou kei na nona inaki.b Vakasamataka mada na gauna o na rogoca kina ni tukuni, “Sa sega ni qai bula tale tiko o Setani!”

      a Ke tukuni tiko e ke na siliva ni Roma na dinari, qo ena tautauvata kei na kedra isau e 50,000 na daucakacaka ena dua na siga—dua dina na ilavo levu!

      b Me ikuri ni ivakamacala me baleti Setani kei na rai ni Kalou me baleta na vakatevoro, raica na wase 10 ni ivola Na Cava Sara Mada e Kaya na iVolatabu? Tarogi ira na iVakadinadina i Jiova me dua nomu ilavelave se rai ina www.pr418.com.

iVola vakaViti (1982-2026)
Sogota
Dolava
  • vakaViti
  • Vakauta
  • Digia
  • Copyright © 2025 Watch Tower Bible and Tract Society of Pennsylvania
  • iVakavakayagataki
  • Kemu iTukutuku
  • Privacy Settings
  • JW.ORG
  • Dolava
Vakauta