Sucu Tale​—Ena Rawati Kina na Bula?

O NA sauma vakacava na taro, “O sa sucu tale?” E milioni vakacaca mai na veimatalotu e vuravura raraba ena sega ni bera nodra sauma na taro ena “Io!” Era vakabauta ni sucu tale e ivakatakilakila ni lotu vaKarisito dina, na sala duadua ga me rawati kina na bula. Nodra rai e tautauvata kei ira na iliuliu ni lotu me vakataka na daunicioloji o Robert C. Sproul, a vola: “O koya e sega ni sucu tale, . . . e sega ni lotu vaKarisito.”

O vakabauta tale ga ni sucu tale e ivakadei ni nomu rawata na bula? Ke vaka kina, sega ni vakabekataki ni o na via vukei ira na wekamu kei ira nomu itokani mera cakava tale ga qori. Ia e dodonu mera kila e liu na kedrau duidui e dua e sucu tale kei koya e sega. O na vakamacalataka vakacava vei ira na ibalebale ni sucu tale?

E levu era vakabauta ni “sucu tale” e kena ibalebale na nona vakavouya e dua na nona bula, me biuta na nona itovo makawa qai cakava na ka e vinakata na Kalou. E vakabulai mai na nona mate tu vakayalo e liu, sa rawa gona ni veiwekani vinaka kei na Kalou.

O na kurabui ke tukuni ni qori e sega ni yavutaki vakaivolatabu? O via kila na ka e tukuna me baleta na sucu tale? Ena yaga dina vei iko na nomu wilika vinaka na ulutaga qo. Cava na vuna? Na ka dina o kila me baleta na sucu tale ena tara nomu bula kei na veika o namaka me baleta na gauna se bera mai.

Cava e Tukuna na iVolatabu?

Ena iVolatabu, na malanivosa “sucu tale” e kune duadua ga ena Joni 3:1-12, VV, e tukuni kina na nodrau veitalanoa vakavure vakasama o Jisu kei na dua na iliuliu ni lotu e Jerusalemi. O na wilika qori ena kato e tiko ena ulutaga qo. Yalovinaka wilika vinaka sara.

E tukuna kina o Jisu e vica na ka me baleta na ‘sucu vou.’a Na veika e kaya o Jisu ena sauma vei keda e lima na taro bibi:

◼ E vakacava na bibi ni sucu vou?

◼ E vakatau beka vei keda na sucu vou?

◼ Na cava e kena inaki?

◼ E vakayacori vakacava?

◼ Na veisau cava e rawati kina?

Meda veivosakitaka yadua mada na taro qori.

[iVakamacala e ra]

[Kato/​iYaloyalo ena tabana e 4]

“E Dodonu Mo ni Sucu Tale”

“E dua na nodra i liuliu na Jiu, a yacana ko Nikotimo, ka lewe ni i lawalawa ka ra vakatokai na Farisi. A qai lako ko koya vei Jisu e na dua na bogi ka kaya vua, ‘Vakavuvuli, keimami sa kila ni ko ni sa lako mai vua na Kalou me i vakavuvuli, ni sega ni dua na tamata e cakava rawa na veicakacaka mana ko ni sa cakava oqo ke sega ni tiko vata kei koya na Kalou.’ Sa qai sauma ko Jisu ka kaya vua, ‘Au tukuna vakadodonu sara vei iko: kevaka e sega ni sucu tale e dua na tamata, e na sega ni raica rawa na matanitu ni Kalou.’ Sa kaya vua ko Nikotimo, ‘E na sucu rawa vakaevei e dua na tamata ni sa tamata bula tu? E rawa li ni curu tale ki na kete i tinana ka me qai la’ki sucu tale mai?’ Sa qai kaya ko Jisu, ‘Au tukuna vakadodonu sara vei iko: kevaka e sega ni sucu e dua na tamata e na wai kei na Yalo Tabu e na sega ni curu rawa ki na matanitu ni Kalou. Sa vakayago na ka sa sucu e na yago; ia sa vakayalo na ka sa sucu e na Yalo. Kakua ni kurabui ni’u sa kaya vei iko, ‘E dodonu mo ni sucu tale.’ Sa dau liwa na cagi ki na yasana e digitaka; ko sa rogoca ga na kena rorogo, ia ko sega ni kila na yasana e lako mai kina se na yasana e lako yani kina. Sa vaka tale ga kina ko ira yadua era sa sucu e na Yalo Tabu.’ Sa qai vosa ko Nikotimo ka kaya vua, ‘E na yaco rawa vakaevei na veika oqo?” Sa qai sauma ko Jisu ka kaya vua, ‘Ko iko na nodra i vakavuvuli na Isireli, ko qai sega tu ni kila na veika oqo, ne? Au tukuna vakadodonu sara vei iko, keitou kaya tiko na ka keitou kila, ka keitou tukuna na ka keitou sa raica; ia ko ni sega ga ni vakabauta na neitou i tukutuku. Kevaka au sa tukuna vei kemuni na veika vakavuravura ko ni qai sega ni vakabauta, ko ni na qai vakabauta rawa vakaevei kevaka au tukuna vei kemuni na veika vakalomalagi?’”​—Joni 3:1-12, VV.

Sucu Vou​—E Vakacava na Kena Bibi?

ENA nodrau veitalanoa kei Nikotimo, a vakaraitaka kina o Jisu ni dua dina na ka bibi na sucu vou se sucu tale. E vakamatatataka vakacava qori?

Raica mada na sala e vakabibitaka kina o Jisu na sucu vou ena nodrau veitalanoa kei Nikotimo. A kaya: “Kevaka e sega ni sucu tale e dua na tamata, e na sega ni raica rawa na matanitu ni Kalou.” (Joni 3:3, VV) Na vosa “kevaka” kei na “sega” e vakaraitaka ni bibi na sucu vou. Kena ivakatautauvata: Ni tukuna e dua, “Ke sega na matanisiga, ena sega na rarama,” e kena ibalebale ni vinakati na matanisiga me rarama kina na vanua. Ena vakasama vata qori, a tukuna o Jisu ni vinakati dina na sucu tale me qai raici na Matanitu ni Kalou.

Kena irairai me kua na vakatitiqa, e tinia o Jisu ena nona kaya: “E dodonu mo ni sucu tale.” (Joni 3:7, VV) E vakamatatataka e keri o Jisu ni bibi se dodonu me sucu tale e dua ‘me curu ina matanitu ni Kalou.’​—Joni 3:5.

E raica vakabibi o Jisu na sucu vou, e dodonu gona mera kila na lotu vaKarisito na kena itukutuku dina. O nanuma ni vakatau vua e dua na lotu vaKarisito nona sucu tale?

[Tikina bibi ena tabana e 5]

“Ke sega na matanisiga, ena sega na rarama”

Sucu Vou—E Vakatau Vei Keda Yadua?

O CEI e vakavuna na sucu vou? Nira veiuqeti eso na iliuliu ni lotu mera sucu tale na lotu vaKarisito, era cavuqaqataka na vosa i Jisu: “E dodonu mo ni sucu tale.” (Joni 3:7, VV) Era veisautaka na vosa qori me ivakaro, era tukuna “Ni sucu tale!” Era vakavuvulitaka ni tamata yadua e vakabauta, e dodonu me lewa me talairawarawa vei Jisu, me sucu vou tale ga. Ena vakasama qori, e nanumi kina ni sucu vou e vakatau sara ga vei keda yadua. Ia e salavata beka qori kei na ka e tukuna o Jisu vei Nikotimo?

Ni wiliki vinaka na ka e tukuna o Jisu, e sega ni vakavuvulitaka ni vakatau ina tamata yadua me sucu vou se sega. Na cava na vuna? Na vosa vaKirisi e vakadewataki me “sucu tale” e rawa ni kena ibalebale tale ga “dodonu me sucu mai cake.”a Me salavata kei na ikarua ni kena ibalebale, na sucu vou e vu “mai cake”​—“mai lomalagi” se ‘mai vua na Tamada.’ (Joni 19:11; Jemesa 1:17) Io, na Kalou e vakavuna na sucu vou.​—1 Joni 3:9.

Ke dei tiko ena noda vakasama na vosa “mai cake,” eda na vakadeitaka ni sega ni rawa vua e dua me lewa nona sucu vou. Vakasamataka mada na nona sucu e dua na gone. E vakavuna ga vakataki koya? Sega! E vakavuna o tamana. Na sucu vou e va tale ga qori, e vakavuna ga na Tamada vakalomalagi. (Joni 1:13) E donu kina na ka e tukuna na yapositolo o Pita: “Me da ia na vakavinavinaka vua na Kalou na Tama ni noda Turaga ko Jisu Karisito! Sa vakasucumi keda vou ko koya e na vuku ni nona loloma levu.”​—1 Pita 1:3, VV.

E Dua Beka na iVakaro?

Eso era na rairai taroga, ‘Ke sega dina ni rawa vua e dua me lewa ga nona sucu tale, na cava ga e vakarota kina o Jisu: “E dodonu mo ni sucu tale”?’ E taro vinaka qori. Ke ivakaro dina, sa vakaukauataki keda tiko o Jisu meda cakava e dua na ka eda sega ni lewa. Qori e sega ni vakasama vakayalomatua. Na cava ga na ibalebale ni kena tukuni e dodonu moni “sucu tale”?

E sega ni ivakaro na malanivosa ya ke laurai vinaka na vosa taumada e volai kina, e dua ga na itukutuku. Ni tukuna gona o Jisu e dodonu moni “sucu tale,” e tukuna tiko ga e dua na itukutuku, e sega ni ivakaro. E kaya: “E bibi moni sucu mai cake.”​—Joni 3:7, Modern Young’s Literal Translation.

Vakasamataka mada na ivakatautauvata qo ni kedrau duidui na itukutuku kei na ivakaro. Raitayaloyalotaka e dua na siti e vica vata na kena koronivuli. E dua vei ira qori e nodra koronivuli na gone itaukei era tiko vakayawa mai na siti. Dua na siga e lako yani e dua na gonetagane e sega ni gone itaukei, e tukuna vei qasenivuli liu, “Au via vuli ena koronivuli qo.” E tukuna sara na qasenivuli liu, “E dodonu mo itaukei.” E sega ni vakarota tiko e keri o qasenivuli liu, “Mo dua na itaukei!” Ia e tukuna tiko ga na ka e vinakati vei ira na via vuli ena koronivuli ya. Ena nona tukuna tale ga o Jisu: “E dodonu mo ni sucu tale,” e vakaraitaka tiko ga na ka e vinakati vua e dua me ‘curu ina Matanitu ni Kalou.’

Ena vakasama qori, e vure cake mai kina e dua tale na taro me baleta na sucu vou. Na cava na kena inaki? Na isau ni taro qo e bibi ena kena kilai na ka dina me baleta na sucu tale.

[iVakamacala e ra]

[iYaloyalo ena tabana e 6]

Erau tautauvata vakacava na sucu vou kei na nona sucu e dua na gone?

Sucu Vou—Na Cava na Kena iNaki?

E LEVU era vakabauta ni dodonu me sucu tale e dua me rawa ni bula tawamudu. Ia raica mada na ka e tukuna o Jisu me baleta na inaki ni sucu vou. E kaya: “Kevaka e sega ni sucu tale e dua na tamata, e na sega ni raica rawa na matanitu ni Kalou.” (Joni 3:3, VV) Koya gona, e bibi me sucu tale e dua me rawa ni curu ina Matanitu ni Kalou, sega ni rawati ni bula tawamudu. ‘Ia,’ era na rairai kaya eso, ‘erau sega beka ni dusia tiko ga e dua na icovi na curu ina Matanitu ni Kalou kei na rawati ni bula?’ E sega ni vaka kina. Me rawa nida kila na kedrau duidui, meda veivosakitaka mada e liu na ibalebale ni “matanitu ni Kalou.”

Na Matanitu ni Kalou e dua dina na matanitu. Qori na ituvatuva e vakayagataka na Kalou me veiliutaki kina. E tukuna na iVolatabu ni o Jisu Karisito na “Luve ni tamata” e Tui ni Matanitu ni Kalou, era na veiliutaki tale ga kei koya eso. (Taniela 7:1, 13, 14; Maciu 26:63, 64) Kuria ya, a vakatakilai ena raivotu vua na yapositolo o Joni ni o ira na veiliutaki kei Karisito era digitaki ‘mai na veiyavusa, duivosavosa, veimataqali, kei na veimatanitu’ mera ‘liutaka na vuravura.’ (Vakatakila 5:9, 10, VV; 20:6) E kaya tale ga na Vosa ni Kalou nira lewena na “qele-ni-sipi lailai” e le 144,000 ‘ra qai voli mai vuravura.’​—Luke 12:32; Vakatakila 14:1, 3, VV.

E tauyavu mai vei na Matanitu ni Kalou? Na “matanitu ni Kalou” e vakatokai tale ga me “matanitu vakalomalagi,” kena ibalebale o Jisu kei ira na veiliutaki kei koya era lewa mai lomalagi. (Luke 8:10; Maciu 13:11) Koya gona, era na veiliutaki ena Matanitu ni Kalou mai lomalagi o Jisu kei ira na nona itokani era digitaki mai vuravura.

Na cava e vakaibalebaletaki ena nona kaya o Jisu ni dodonu me sucu tale e dua me ‘curu ina matanitu ni Kalou’? Kena ibalebale ga ni dodonu me sucu tale e dua me rawa ni veiliutaki kei Karisito mai lomalagi. Na inaki gona ni sucu vou me vakarautaki ira na lewe ni ilawalawa lailai e yalani na kedra iwiliwili, era digitaki mai vuravura mera veiliutaki mai lomalagi.

Eda sa raica oti mai ni sucu vou e dua na ka bibi, e vakavuna na Kalou, era vakarautaki kina na lewe ni ilawalawa era digitaki mai vuravura mera veiliutaki mai lomalagi. Ia e vakayacori vakacava na sucu vou?

[Tikina bibi ena tabana e 7]

E inaki ni sucu vou mera vakarautaki kina na lewe ni ilawalawa e yalani na kedra iwiliwili, era digitaki mai vuravura mera veiliutaki mai lomalagi

[iYaloyalo ena tabana e 7]

Ena veiliutaki ena Matanitu ni Kalou o Karisito kei ira na digitaki mai vuravura mera lewa ena Matanitu ni Kalou

Sucu Vou​—Ena Vakayacori Vakacava?

E SEGA ni tukuna wale ga vei Nikotimo o Jisu na bibi, na inaki ni sucu vou, kei na vuna, e tukuna tale ga na sala ena vakayacori kina. A kaya o Jisu: “Kevaka e sega ni sucu e dua na tamata e na wai kei na Yalo Tabu e na sega ni curu rawa ki na matanitu ni Kalou.” (Joni 3:5, VV) Koya gona, ena sucu tale e dua ena wai kei na yalo tabu. Na cava e vakaibalebaletaka na ‘wai kei na yalo tabu?’

“Wai kei na Yalo Tabu”​—Cava Rau Vakatakarakarataka?

Ni dauvakadidike ni lotu vakaJiu o Nikotimo, e kila vinaka na ivakavakayagataki ni “yalo ni Kalou” ena iVolatabu vakaIperiu​—e rawa ni veiuqeti na igu kaukaua ni Kalou me cakava na ka veivakurabuitaki e dua. (Vakatekivu 41:38; Lako Yani 31:3; 1 Samuela 10:6) Ni vakayagataka o Jisu na vosa “yalo,” e rairai kila o Nikotimo ni vakaibalebaletaki ena yalo tabu, na igu kaukaua ni Kalou.

Vakacava na wai? Raica mada eso na ka e volatukutukutaki a yaco ni bera na veivosaki kei Nikotimo vaka kina ni oti. E laurai kina ni ratou veipapitaisotaki ena wai o Joni na Dauveipapitaisotaki kei ratou na tisaipeli i Jisu. (Joni 1:19, 31; 3:22; 4:1-3) E kilai levu na ivalavala qori e Jerusalemi. E rairai kila kina o Nikotimo ni sega ni wai raraba e cavuta o Jisu, e dusia ga na wai e caka kina na papitaiso.a

Papitaiso “e na Yalo Tabu”

Ke ibalebale ni “sucu e na wai” na papitaiso ena wai, na cava na ibalebale ni ‘sucu ena yalo tabu’? Ni bera na nodrau veivosaki o Nikotimo kei Jisu, e tukuna o Joni na Dauveipapitaisotaki ni bibi ruarua na papitaiso ena wai kei na yalo tabu. E kaya: ‘E dina ka’u sa papitaisotaki kemudou ena wai: ia ena papitaisotaki kemudou o koya [Jisu] ena yalo tabu.’ (Marika 1:7, 8) Na isevu ni papitaiso qori e vola o Marika ena nona Kosipeli. E kaya: “A sa yaco e na gauna ko ya, sa lako mai Nasareci e Kalili ko Jisu, a sa papitaisotaka ko Joni e na Joritani. Ia ni sa cabe sara ko koya mai na wai, sa qai raici lomalagi ni sa wase rua, kei na Yalo Tabu ni sa lako sobu vua me vaka na ruve.” (Marika 1:9, 10) E papitaisotaki ena wai o Jisu ena gauna e toni kina ena Joritani, e papitaiso ena yalo tabu mai lomalagi ena gauna e sobuti koya kina.

Ni oti e rauta na tolu na yabaki nona papitaiso, e vakadeitaka o Jisu vei ratou na nona tisaipeli: “Ni oti ga ‘qo e vica na siga dou sa na qai papitaisotaki e na Yalo Tabu.” (Cakacaka 1:5, VV) E yaco qori ena gauna cava?

Era soqoni toka ena dua na vale e Jerusalemi ena Penitiko 33 S.K., e le 120 na tisaipeli i Jisu. ‘E lako vakasauri mai lomalagi e dua na rorogo e vaka na cagi vakacevaruru kaukaua, e vakasinaita na vale taucoko. Era raica na ka e vaka na yameyame ni buka, ra vakasinaiti kece ena yalo tabu.’ (Cakacaka 2:1-4) Ena siga vata ya, era uqeti eso tale e Jerusalemi mera papitaiso ena wai. E tukuna vei ira e dua na ilala na yapositolo o Pita: “O i kemuni yadua mo ni veivutuni ka papitaisotaki e na yaca i Jisu Karisito, me bokoci [“vosoti,” NW] kina na nomuni i valavala ca, ka na qai soli vei kemuni na i loloma ni Kalou, ko ya na Yalo Tabu.” Na cava e yaco? “Era sa mani papitaisotaki ko ira era vakabauta na nona vosa; ka rauta e 3,000 na tamata e vakaikuritaki kina na kedra i wiliwili na vakabauta e na siga koya.”​—Cakacaka 2:38, 41, VV.

Rua na iValavala ni Papitaiso

Na cava e vakaraitaka me baleta na sucu vou na papitaiso e cavuti mai cake? E rua na ivalavala e vakayacori kina na sucu vou. Nanuma tiko o Jisu a papitaiso e liu ena wai, oti sa qai sobuti koya na yalo tabu. Era papitaiso e liu ena wai o ira na imuri taumada i Jisu (eso e papitaisotaki ira o Joni na Dauveipapitaisotaki), oti sa qai sobuti ira na yalo tabu. (Joni 1:26-36) O ira tale ga na le 3,000 na tisaipeli vou era papitaiso e liu ena wai, sa qai sobuti ira na yalo tabu.

Nida vakasamataka tiko na papitaiso ena Penitiko 33 S.K., na cava meda namaka ena gauna qo me baleta na sucu vou? Ena vakayacori ena sala vata ga era vakadinadinataka na tisaipeli kei ira na imuri taumada i Jisu. Taumada, e dodonu me veivutuni, biuta nona itovo ca, me yalataka vei Jiova me sokaloutaki koya, vakaraitaka nona yalayala e matanalevu ena nona papitaiso ena wai. Ke digitaki koya na Kalou me veiliutaki ena nona Matanitu, ena qai lumuti ena yalo tabu. Na imatai ni kalawa (papitaiso ena wai) ena cakava ga e dua; na kena ikarua (papitaiso ena yalo tabu) ena cakava na Kalou. E sucu vou o koya e caka ruarua vua na papitaiso.

Ena nodrau veitalanoa kei Nikotimo o Jisu, na cava na vuna e cavuta kina “sucu e na wai kei na yalo tabu”? Qori me vakabibitaka ni dua na veisau veivakurabuitaki era na vakila o ira na papitaiso ena wai kei na yalo tabu. Ena veivosakitaki qori ena ulutaga tarava.

[iVakamacala e ra]

[iYaloyalo ena tabana e 9]

O Joni a papitaisotaki ira ena wai na Isireli era veivutuni

Sucu Vou​—Na Veisau Cava e Rawati Kina?

NA CAVA e tukuna kina o Jisu na ‘sucu ena yalo tabu’ ena nona ivakamacala me baleta na papitaiso ena yalo tabu? (Joni 3:5) Na vosa “sucu” ni vakayagataki vakaivakatakarakara e kena ibalebale “itekitekivu,” kena ivakaraitaki na malanivosa “sucu ni matanitu.” Koya gona, na “sucu vou” e dusia e dua na “itekitekivu vou.” Na vosa vakaivakatakarakara “sucu” kei na “sucu vou” e vakabibitaka ni na tekivu vou na nodra veiwekani kei na Kalou o ira na papitaiso ena yalo tabu. Ena sala cava ena veisau kina vakadua na veiwekani qori?

Ena nona vakamacalataka na yapositolo o Paula na nona vakarautaki ira na lai veiliutaki e lomalagi na Kalou, a vakayagataka e dua na vosa vakatautauvata me baleta na vuvale. E vola vei ira na lotu vaKarisito ena nona gauna nira na ‘yaco mera luve ni Kalou,’ ena cakava vei ira na ka “me vaka vei ira na luvena.” (Kalatia 4:5, VV; Iperiu 12:7) Meda raica tale mada na vosa vakatautauvata me baleta na gonetagane e via vuli ena nodra koronivuli na gone itaukei. Eda na kila ena ivakaraitaki ni gonesusu na veisau e yaco vua e dua e papitaiso ena yalo tabu.

Veisau e Yaco

Na gonetagane e tukuni ena vosa vakatautauvata e sega ni rawa ni vuli ena koronivuli ni sega ni gone itaukei. Ia kaya mada ni yaco e dua na veisau levu. E susugi koya e dua na tama itaukei. E yaga vakacava qori vei gonetagane? Ni gonesusu, ena rawa ni soli tale ga vua na dodonu ni gone itaukei​—oka kina me vuli e koronivuli. E dua sara na veisau levu oya ni vakasamataki na veika sa rawa ni cakava o gone.

E va tale ga qori na ka era vakila na sucu vou. Vakasamataka mada eso na ka e rau tautauvata kina. Ena rawa wale ga ni vakadonui me vuli na gonetagane ena vosa vakatautauvata ke rawata na kena ivakatagedegede​—oya me dua na gone itaukei. Ia ena sega ni rawata vakataki koya qori. Ena vakasama vata qori, eso era na vakadonui mera veiliutaki ena Matanitu ni Kalou se matanitu vakalomalagi, ia mera rawata na kena ivakatagedegede—⁠oya mera “sucu tale.” Era na sega ni rawata ga vakataki ira qori ni vakatau vua na Kalou na sucu vou.

Na cava e veisautaka na ituvaki kei gonetagane? E vakalawataki na nona susu. Qori e sega ni veisautaka nona itovo, ia e veisau ga na ka e rawa ni cakava ni vakayacori oti kece na ka vakalawa me baleta na nona susu. E dua na itekitekivu vou vua ya—⁠e vaka sara ga e sucu vou. Qo ni sa gonesusu, e tu vua na dodonu me vuli ena koronivuli, me marautaka tale ga na vuvale vou e sa lewena.

Era vakila tale ga na veisau e dua na ilawalawa tamata ivalavala ca, ni vakalawataka o Jiova na yavu ni nodra vakadonui mera luvena vakacabecabe. E lewe tale ga ni ilawalawa qori na yapositolo o Paula, e vola vei ira na nona itokani ena vakabauta: “Na yalo ga sa qisi kemuni mo ni luve ni Kalou ka yaco rawa kina mo ni kaya vua na Kalou, ‘Apa! Tamaqu.’ A yalo oqo sa vakadinadinataka ki na yaloda ni da sa luve ni Kalou.” (Roma 8:15, 16, VV) Ni veivakadonui na Kalou, o ira na lotu vaKarisito e vakamacalataka o Paula era sa lewe ni vuvale ni Kalou se vakatokai mera “luve ni Kalou.”​—1 Joni 3:1; 2 Korinica 6:18.

E sega ni veisautaka na kedra ituvaki nira se ivalavala ca tiko ga. (1 Joni 1:8) Ia me vaka e tukuna o Paula, e vakadonui ira na Kalou mera luvena ni vakayacori oti kece na ka vakalawa. Na yalo tabu ni Kalou e vakadeitaka tale ga vei ira nira na bula kei Karisito e lomalagi. (1 Joni 3:2) Na veivakadeitaki qori ni yalo tabu e veisautaka sara ga nodra rai me baleta na bula. (2 Korinica 1:21, 22, VV) Qori e dua na itekitekivu vou vei ira​—e vaka ga era sucu vou.

Na iVolatabu e tukuna me baleti ira na luvena vakacabecabe na Kalou: “Era na bete ni Kalou kei Karisito, ka ra na lewa vata kaya ka dua na udolu na yabaki.” (Vakatakila 20:6) O ira na luvena vakacabecabe na Kalou era na veiliutaki kei Karisito ena Matanitu ni Kalou se matanitu vakalomalagi. E tukuna na yapositolo o Pita vei ira eso tale na lotu vaKarisito ni na soli vei ira “nai votavota sa sega ni ca rawa, a sa sega ni dukadukali, a sa sega ni malai mai [“seavu,” NW], sa maroroi mai lomalagi” me nodra. (1 Pita 1:3, 4) Sa dua dina na ivotavota talei!

E dua tale na taro e vure cake mai me baleta na veiliutaki. Ke ra veiliutaki vakatui mai lomalagi o ira na sucu tale, era na liutaki cei? Ena saumi na taro qori ena ulutaga tarava.

[iYaloyalo ena tabana e 10]

Na cava e kaya o Paula me baleta nona yaco e dua me luve ni Kalou?