Taro na Dauwiliwili
Ena gauna cava ena oti kina na nodra kacivi na lotu Vakarisito era nuitaka na bula i lomalagi?
E sega ni sauma vakadodonu na iVolatabu na taro oqori. Eda kila nira tekivu lumuti na tisaipeli i Jisu ena 33 S.K. e nodra inuinui kina na bula vakalomalagi. (Cakacaka 2:1-4) Eda kila tale ga ni gauna eratou mate kina na yapositolo, o ira na “witi,” na lotu Vakarisito dina, era lumuti era “tubu vata” kei ira na lotu Vakarisito vakailasu, o ira na “sila ca.” (Maciu 13:24-30) Ni bera ni cava na veiyabaki ni 1800, sa laurai levu tale nodra veiqaravi na lotu Vakarisito lumuti. Ena 1919, era sa tekivu tamusuki na “vuata kei vuravura,” wili kina na kena vakacavari na nodra kumuni mai na ivovo ni lumuti.—Vakatakila 14:15, 16, VV.
Ni bera ni cava na veiyabaki ni 1800 me yacova na 1931, na inaki bibi ni cakacaka vakavunau oya na nodra kumuni mai na ivovo ni lewe ni yago i Karisito. Ena 1931 era sa mai vakayacani na Gonevuli ni iVolatabu ena yaca e yavutaki ena iVolatabu na iVakadinadina i Jiova. Ena itabataba ni Watchtower, 15 Noveba 1933, e vakamacalataki kina ni yaca kilaitani oqo e vakaibalebaletaki ena “pene” e tukuna o Jisu ena vosa vakatautauvata ena Maciu 20:1-16. Na 12 na aua e cavuti ena vosa vakatautauvata e vakabauti ni tautauvata kei na 12 na yabaki mai na 1919 ina 1931. E dau vakabauti tu e liu ni sa cava ena 1931 na veikacivi ina Matanitu vakalomalagi. Ia, o ira na kacivi mera veiliutaki vata kei Karisito ena 1930 kei na 1931 era a qai kacivi e “muri.” (Maciu 20:6-8) Qai veisau ena 1966 na ibalebale ni vosa vakatautauvata oya, ni sa qai matata ni sega ni baleta na kena mai cava na nodra kacivi na lumuti.
Ena 1935 na “[i]soqosoqo levu” ena Vakatakila 7:9-15 e kilai mera lewena na ‘so tani tale na sipi,’ o ira na lotu Vakarisito era nuitaka na bula ena vuravura. O ira oqo era na vakumuni e vuravura donuya na “iotioti ni veisiga,” era na qai vakabulai vakailawalawa ena Amaketoni. (Joni 10:16; 2 Timoci 3:1, NW; Vakatakila 21:3, 4) Ni oti na yabaki oya e mai vakabibitaki ena cakacaka ni veivakatisaipelitaki na nodra kumuni mai na isoqosoqo levu. Vakabibi ni oti na 1966 e vakabauti ni sa mai cava na veikacivi i lomalagi ena 1935. E vakadinadinataki oqo ni voleka ni o ira kece na papitaiso ni oti na 1935 era vakadeitaka ni nodra inuinui na bula e vuravura. Ni oti na gauna oya, e vakabauti ni kevaka e kacivi e dua ina bula vakalomalagi, ena sosomitaki koya ga na lotu Vakarisito lumuti e tawayalodina.
Sega ni vakabekataki, ke dua na lumuti e sikalutu qai sega ni veivutuni, ena kaciva o Jiova e dua tale me sosomitaki koya. (Roma 11:17-22) Kena irairai era sega ni le levu na lumuti era tawayalodina. Ena yasana adua, ni toso tiko na gauna, e so vei ira na lotu Vakarisito era papitaiso ni oti na 1935 era sa vakadinata e yalodra ni nodra inuinui na bula i lomalagi. (Roma 8:16, 17) O koya gona, eda na sega ni vakadeitaka rawa na gauna e mai cava kina nodra kacivi na lotu Vakarisito era nuitaka na bula i lomalagi.
Meda raica vakacava e dua e vakadeitaka e lomana ni dua na lumuti qai tekivu me vakayagataka na madrai kei na waini ena iVakananumi ni mate i Jisu? Me kua ni vakalewai. Ena vakatulewa ga kina o Jiova. (Roma 14:12) Ia, o ira na lotu Vakarisito lumuti era na sega ni vinakata mera raici nira duatani. Era sega ni vakabauta ni duatani sara mada ga na nodra “kilaka” vei ira e so era matua vakayalo era lewe ni isoqosoqo levu baleta wale ga nira lumuti. Sega tale ga nira vakabauta ni levu cake na cakacaka ni yalo tabu vei ira ni vakatauvatani kei ira nodra itokani so tani tale na sipi, se mera namaka mera na qaravi se mera kaya ni nodra vakayagataka na waini kei na madrai era sa na uasiviti ira na qase era lesi ena ivavakoso. Ena yalomalumalumu era na vakasamataka ni so era lumuti ena imatai ni senitiuri era a sega ni qase se dauveiqaravi ni ivavakoso. (1 Timoci 3:1-10, 12, 13; Taito 1:5-9; Jemesa 3:1) So vei ira na lotu Vakarisito lumuti era a malumalumu sara mada ga vakayalo. (1 Cesalonaika 5:14) O ira na tacida yalewa, dina ga nira lumuti, era sega ni veivakavulici ena ivavakoso.—1 Timoci 2:11, 12.
Ia, o ira na lumuti lotu Vakarisito kei ira nodra itokani so tani tale na sipi era na saga mera kaukaua tiko ga vakayalo, ra qai bulataka na vua ni yalo tabu nira uqeta na veiyaloni ena loma ni ivavakoso. Na lotu Vakarisito kece, se ra lumuti se so tani tale na sipi, era gumatua na kacivaka na itukutuku vinaka kei na nodra veivakatisaipelitaki ni dusimaki ira tiko na iLawalawa Dauvakatulewa. Era marautaka na lotu Vakarisito lumuti mera cakava oqo kevaka e inaki ni Kalou vei ira ena gauna kece era qaravi Jiova tiko kina e vuravura.