Ni o Sikovi Ira Lesu na Taura Na Vale ni Vakatawa kei na Yadra!, O Rawa ni Kaya:
“Ena nodaru veitalanoa sa oti, au a solia toka vei kemuni e dua Na Vale ni Vakatawa. De dua oni sa raica ni yaca taucoko ni ivola oqori Na Vale ni Vakatawa—Kacivaka na Matanitu i Jiova. Nikua, au vinakata meu vakamacalataka se Matanitu vakacava oqo kei na ka ena kauta mai vei kemudou vakamatavuvale.” Cega na brochure na Loma ni Kalou ina lesoni 6, wilika qai vakamacala kina, ia me vakatau ena nona galala o itaukeinivale.
“E sega soti ni dede na noqu a sikovi kemuni mai, au a solia toka Na Vale ni Vakatawa kei na Yadra! Na ivola oqori erau uqeti keda meda doka na iVolatabu kei na kena ivakatagedegede savasava. Niu vakabauta ni bibi vei keda yadua meda kila na Vosa ni Kalou, au lesu tiko mai meu mai vakaraitaka mada e dua na ka ena veivuke ena tikina oqo.” Vakayagataka na brochure na Loma ni Kalou se ivola na Kila, sureta me vuli iVolatabu.
Tovolea na iwalewale oqo ni o solia e dua na ivola makawa e 192 na taqana:
“E dau vakabibitaki vakalevu na vuli. Na cava beka oni nanuma, na vuli vakacava me saga e dua me rawata kina na vakacegu kei na marau? [Waraka me sauma. Wilika na Vosa Vakaibalebale 9:10, 11.] Na ivola oqo [tukuna na yaca ni ivola o solia] e yavutaki ena iVolatabu. E dusia na ivurevure duadua ga ni kilaka ena rawati kina na bula tawamudu.” Vakaraitaka e dua na kena ivakaraitaki ena ivola, uqeti itaukeinivale me wilika.
Ke laulau e dua na iwalewale ni vunau o dau vakayagataka qai uqeta na tataleitaki, mo vakayagataka tiko ga! Qai veimoiyaka ga me sota vinaka kei na ivola e soli ena vula yadua.
[Kato ena tabana e 6]
Sala Mera Soli Kina e So Tale na iVola
E koto ena Watch Tower Publications Index na iwalewale e rawa ni vakayagataki mera soli kina e so tale na ivola kei na brochure, ena ruku ni ulutaga levu na:
Presentations (iWalewale ni Vunau)
List by Publication (Yaca ni iVola)
[Kato ena tabana e 6]
Veisureti Vakadodonu
Mo rawa ni tekivutaka e dua na vuli iVolatabu, vakacava mo tovolea mada e dua vei ira na iwalewale ni veisureti vakadodonu oqo?:
“Oni taleitaka beka mo ni kila e so na isaunitaro bibi vakaivolatabu ena loma ni dua ga na gauna lekaleka? Me kena ivakaraitaki, . . .” Digitaka e dua na taro ena itekitekivu ni dua vei ira na lesoni ena brochure na Loma ni Kalou o nanuma ni na kauai kina o itaukeinivale.
“Au via vakaraitaka mada vei kemuni na icakacaka ni neimami dau veivakavulici wale ena iVolatabu. Ena lima beka ga na miniti. E rawa beka ni daru tovolea?” Ke vakaio kina, vakayagataka na lesoni 1 ena brochure na Loma ni Kalou mo vakaraitaka kina na icakacaka ni vuli, qai digitaka e dua se rua na tikinivolatabu mo drau wilika. Ni oti oya, tarogi koya: “Na gauna cava beka oni rawa ni galala vakalekaleka tale kina me daru vulica na lesoni e tarava?”
“E levu e tu na nodra iVolatabu, ia era lecava ni tu kina na isaunitaro bibi me baleta na noda veigauna mai muri. Ke vulici na ivoladusidusi oqo [na brochure na Loma ni Kalou se ivola na Kila], ena dua na aua ena loma ni dua na macawa, sa na rawa ni matata kina vei kemuni ena loma ni vica wale ga na vula e so na tikina bibi mai na iVolatabu. Au na marautaka meu vakaraitaka vei kemuni na iwalewale ni vuli oqo.”
“Au mai sureti kemuni de oni na taleitaka mo ni vulica wale e vale na nomuni iVolatabu. Ke oni vakadonuya, au na via vakaraitaka vakalekaleka na sala era veivosakitaka kina e vale na iVolatabu na veimatavuvale ena rauta na 200 na vanua. Daru rawa ni veivosakitaka e dua ga vei ira na ulutaga oqo. [Vakaraitaka na lewenivola ena ivola na Kila.] E vei beka oni taleitaka?” Waraka me digitaka o itaukeinivale. Cega na wase e digitaka, tekivutaka sara na vuli ena imatai ni parakaravu.
“Au dau veivakavulici wale ena iVolatabu, au rawa ni vakavulica tale e so. Oqo na idusidusi vakaivolatabu e dau vakayagataki. [Vakaraitaka na ivola na Kila.] Na vuli oqo e vica wale ga na vula na kena dede, ia e sauma na taro me vaka: Na cava e vakatara kina na veika rarawa na Kalou? Na cava eda qase kina da qai mate? Na cava e yaco vei ira na wekada lomani era mate? Eda na toro voleka vakacava vua na Kalou? E rawa beka meu vakayagataka e dua na lesoni oqo meu vakaraitaka kina na icakacaka ni vuli?”