Na Cakacaka Bibi Duadua
1. Ni bibi duadua vei keda na cakacaka vakaitalatala, na cava eda na cakava?
1 Na cava eda dau vakauqeti kina meda vakayagataka noda gauna, noda bula, kei na noda iyau, ena cakacaka vakaitalatala? Qo ga na cakacaka bibi duadua! Nida vakasamataka na levu ni kena yaga, ena uqeti keda qori meda vakaitavi ena cakacaka ena sega ni tokaruataki qo.—Caka. 20:24.
2. Ena lagiti vakacava na yacana cecere o Jiova ena noda vunau?
2 Me Vakalagilagi na Yaca i Jiova: E vakabibitaki ena cakacaka vakavunau ni Matanitu i Jiova e veiliutaki kina o Jisu, ena sosomitaka na matanitu kece vakatamata qai vakaotia na noda leqa kece. (Maciu 6:9, 10) Ena vakalagilagi o Jiova ni o koya duadua ga ena vakabulai keda mai na tauvimate kei na mate. (Aisea 25:8; 33:24) Nida vakatokai ena yacana, era na vakalagilagi Jiova tale ga eso tale nira raica na noda ivakarau vinaka kei na noda gugumatua. (1 Pita 2:12) Eda na marau ke da vakatakila e vuravura raraba na yaca ni Turaga Cecere Duadua o Jiova!—Same 83:18.
3. Era kalougata vakacava o ira na ciqoma na itukutuku ni Matanitu ni Kalou?
3 Vakabulai: O Jiova e ‘sega ni vinakata me rusa e dua, e vinakata ga meda veivutuni kece.’ (2 Pita 3:9) Ia era na kila vakacava eso tale na ivalavala e okata o Jiova me dodonu kei na kena e sega, ke sega ni dua e vakavulici ira? (Jona 4:11; Roma 10:13-15) Ena vinaka cake na ivakarau ni nona bula e dua e ciqoma na itukutuku vinaka ni biuta na ivalavala e veivakaleqai. (Maika 4:1-4) E rawa tale ga ni nuitaka na bula tawamudu. Eda na vakabulai, vaka kina o ira era rogoci keda nida gumatuataka na vunau kei na veivakavulici. (1 Tim. 4:16) E dokai dina na cakacaka bibi eda vakaitavi kina!
4. Na cava meda vakaitavi vakalevu kina ena vunautaki ni Matanitu ni Kalou kei na nodra vakavulici eso tale mera tisaipeli?
4 Sa na voleka ni mudu vakasauri na veika tawadodonu e vuravura ena veivakararawataki levu. Era na bula o ira na sokaloutaki Jiova. Koya gona, na cakacaka e vakatotolotaki, e bibi, qai yaga e vakayacori tiko nikua, na vunau kei na nodra vakavulici eso tale mera tisaipeli. Meda vakaliuca tiko mada ga na cakacaka qori ena noda bula!—Maciu 6:33.